Тоололго 36 - Библи

Хадамтай эхэнэрэй угайнь зөөри тухай

¹ Иосифой үри һадаһан, Мэнашшээгэй аша, Махиирай хүбүүн Галаадһаа гарбалтай угай удамаршад Моисейдэ болон израильшуудай ударидагшадта, урагуудай толгойлогшонорто ерээд,

² иигэжэ хэлэбэд: – Эзэн израильшуудта жээрэбээр хубита газарыень хубаарила гэжэ манай эзэн ноёндо захиралта үгөө һэн. Манай аха Цэлопэһаадай басагадта хубита газар үгтэхэ ёһотой гэжэ Эзэн манай эзэн ноёндо айладаа һэн.

³ Хэрбэеэ ондоо обогой хүбүүн Цэлопэһаадай басагадай нэгыень һамга абаг лэ даа, тиихэдэнь бидэ яахабибди? Басагадайнь хадамда гарабалынь, манай уг удам хубита газараа алдаха. Тиихэдэнь жээрэбээр абтаһан манай газарай хэмжээн бага болохол.

⁴ Ойн баярай жэлдэ юун болохоб? Тиихэдэнь Цэлопэһаадай басагадай мэдэлдэ байһан газарые хэн абахаб? Манай обог тэрэ газараа алдаха болоно аал?

⁵ Моисей Эзэнэй зарлигые израильшуудта дамжуулан, иигэжэ хэлэбэ: – Иосифой обогой эдэ зон зүб хэлэнэ!

⁶ Эзэн Цэлопэһаадай басагадта иигэжэ захяа: «Хэрбэеэ хадамда гараха гэбэл, өөһэдынгөө обогой хүбүүдтэ хадамда гарагты.

⁷ Тиигэбэлтнай, израильшуудай хубита газар обогһоо обогто үгтэнгүй, угайтнай үенүүдэй гэр бүлэ бүхэндэ үлэхэ.

⁸ Хэрбэеэ басаган эсэгынгээ хубита газарые абаа һаа, өөрынгөө обогой хүндэ хадамда гараг. Израилиин хүбүүн бүхэн угайнгаа газар залгамжалан байг.

⁹ Тиихэдэнь таанадай хубита газарнууд обогһоо обогто орохогүй. Тиигэжэ Израилиин хүн бүхэн уг гарбалайнгаа хубита газарнуудые үлөөг».

¹⁰ Цэлопэһаадай басагад Моисейдэ Эзэнэй зарлигтаһые дүүрэн бэелүүлбэ.

¹¹ Цэлопэһаадай басагад Маһлаа, Тирцаа, Хоглаа, Милкаа болон Ноһаа өөһэдынгөө аха дүүнэртэ хадамда гарабад.

¹² Тэдэнэй үбгэд ба өөһэдөөшье Иосифой хүбүүн Мэнашшээгэй обогой байжа, хубита газарнуудынь тэдэнэй урагта, тэдэнэй эсэгын зондо үлэбэ.

¹³ Ерихоон тушаа сэхэ урда, Иордан мүрэнэй хажуудахи Моһаабай тэгшэ нюруу газарта Эзэн израильшуудта Моисейгээр дамжуулан, эдэ зарлиг ба тогтоолнуудые айладаа юм.