Тоололго 34 - Библи

Ханаһаанай хилэ

¹ Эзэн Моисейдэ иигэжэ айладаба: –

² Израильшуудта Минии энэ захяае дамжуула: Уг залгамжалан дамжуулагдаха Ханаһаанай газар дайдада орохоёо байнат. Ханаһаан орон нютаг иимэ хилэтэй байха:

³ урда хилэтнай Эдоомой захаар Циин сүл губиһаа зурыжа, Дабһата далайн урда эрьеһээ зүүн тээшээ һунан нэмжыхэ.

⁴ Тиигээд урда зүг руу, Акраббиимэй дабаан руу, Циин сүл губи һэтэлээд, урда зүгһээ Кадээш-Барнээгээр гаража, Хацаар-Аддаар хүрэтэр, тиигээд Ацмоон дээгүүр зурын саашалха.

⁵ Ацмоонһоо Египедэй хүндыгөөр мүрэн тээшэ шэглэжэ, тэндэһээ Дундада далай тээшэ зурыха.

⁶ Таанадай баруун хилэ Дундада далайн эрьеэр болоно.

⁷ Таанадай хойто хилэ Дундада далайн эрьеһээ эхилээд, Һоор хада хүрэтэр һунажа,

⁸ Һоор хадаһаа Лэбоо-Хамаат хүрөөд, тэндэһээ Цэдаад,

⁹ Зипроон, Хацаар-Энаан хүрэтэр зурыха. Энэ хадаа танай ороной хойто хилэ болоно.

¹⁰ Таанадай зүүн хилэ Хацаар-Энаанһаа Шэпаам хүрэтэр зурыха.

¹¹ Тиигээд тэрэ хилэтнай Шэпаамһаа саашаа Риблаа хүрэтэр зурын ошохо. Ааинай зүүн талаар Хиннээрэт нуурай баруун эрье хүрэхэ.

¹² Тиигээд Иордан мүрэниие уруудан зубшаһаар, Дабһата далайда хүрэхэ. Энэ таанадай орон нютагай хилэ болоно.

¹³ Тиигээд Моисей израильшуудта иигэжэ захирба: – Таанад энэ газар абахат. Юһэ хахад обогой зондо энэ газар хубаарилхын тула таанад жээрэб татаха ёһотойт.

¹⁴ Юундэб гэхэдэ, Рэүбээнэй, Гаадай обогуудай бүхы зон, Мэнашшээгэй обогой хахад зон хубита газарнуудаа абаа.

¹⁵ Иордан мүрэнэй зүүн талада, Ерихооной шанха урда байгаа газар тэдэ абанхай.

Газар хубаарилгын түлөө харюусагшад

¹⁶ Эзэн Моисейтэй хөөрэлдөөд, тэрээндэ иигэжэ айладаба:

¹⁷ – Газар хубаарилхадаш санаартын хүбүүн Эльазаар, Нүүнэй хүбүүн Иисүүс

¹⁸ болон обог бүхэнһөө нэгэ нэгэ ударидагша шамда туһалха. Эдэ ударидагшадай нэрэнүүд:

^19-28 Обог Хэнэй хүбүүн бэ Туһалха ударидагшын нэрэ Иудын Епуннээгэй хүбүүн Халээб, Симеоной Аммиһүүдэй хүбүүн Шэмүһээл, Бэньямиинэй Хислооной хүбүүн Элидаад, Даанай Ёглиин хүбүүн Буккии, Мэнашшээгэй Эпоодой хүбүүн, Иосифой угай Ханниһээл, Эпрааимай Шиптаанай хүбүүн Кэмүһээл, Зэбүлүүнэй Парнаахай хүбүүн Элицапаан, Иссахаарай Аззанай хүбүүн Палтиһээл, Ашээрэй Шэломиигэй хүбүүн Ахиһууд, Напталиигай Аммиһүүдэй хүбүүн Пэдэһээл.

Хэнэй хүбүүн бэ Туһалха ударидагшын нэрэ

²⁹ Уг залгамжалан дамжуулагдаха Ханаһаанай газар дайдые израильшуудта хубаарилжа үгэхыень Эзэн эдэ зониие шэлээ бэлэй.