Тоололго 33 - Библи

Египедһээ Моһааб хүрэтэр израильшуудай аяншалга

¹ Моисей Аһароон хоёр израильшуудые ударидажа, бүлэг бүлэгүүд болгон жагсаажа, Египедһээ гаргаһан юм. Тэдэнэр иимэ орон нютагуудые гаталбад.

² Моисей Эзэнэй зарлигаар тэдэнэй гаталһан аян замыень бэшээ юм. Тиихэдээ тэдэнэй хэдыдэ, хэзээ ямар газар дайдада тогтон байрлаһан, хэдыдэ, хэзээ ямар газар дайда тээшэ ошоһон тухай тобшо богонихоноор иигэжэ бэшэһэн байна:

³ Нэгэдэхи һарын арбан табанай үдэр тэдэ Раамсээсһээ аян замда гараа. Паасхын һүүлээрхи тэрэ үглөөгүүр египет зоной хараһаар байхадань, израильшууд юунһээшье айнгүй, Египедэй газар дайдаһаа гараба.

⁴ Тэрэ үе сагта египет зон бүхы ууган хүбүүдээ хүдөөлүүлжэ байба. Ушар юуб гэхэдэ, Эзэн тэдэнэй бурхадта уурлажа, тэдээндэ үхэл тахал эльгээжэ, ууган хүбүүдыень алаһан юм.

⁵ Израильшууд Раамсээсһээ гаража, Суккоодто тогтон байрлаба.

⁶ Тэдэнэр Суккоодһоо гараад, Этаам хүрэжэ, тэндэхи сүл губида тогтожо, майхан хүреэнүүдээ барибад.

⁷ Тэдэнэр Этаамһаа гараад, Бааһал-Цэпооной хажуудахи Пи-Һахироот тээшэ шэглэн ошожо, Мигдоолой хажууда тогтожо, майхан хүреэнүүдээ татан бариба.

⁸ Израильшууд Пи-Һахироодһоо гараад, далай гаталжа, сүл губи руу ошобо. Тиигээд тэдэнэр гурбан үдэр ябажа Этаамай сүл губиие гаталаад, Мараагай хажууда тогтон байрлаба.

⁹ Марааһаа гараад, тэдэнэр Элиим ошожо, арбан хоёр булагтай, далан далба модотой энэ газарта тогтон байрлаба.

¹⁰ Тэдэнэр Элиимһээ гаража, Хулһата далайн хажууда тогтон байрлажа, майхан хүреэнүүдээ татаба.

¹¹ Хулһата далайн хажууһаа гаража, Сиин губида ошоод, тэдэнэр тэндэ тогтон байрлахаяа майхан хүреэнүүдээ татаба.

¹² Сиин губиһаа гараад, тэдэнэр Допкаагай хажууда тогтон байрлахаяа майхан хүреэнүүдээ татаба.

¹³ Допкааһаа гараад, тэдэнэр Алуушда тогтон байрлажа, майхан хүреэнүүдээ татаба.

¹⁴ Алуушһаа гараад, тэдэнэр Рэпидиимдэ тогтон байрлаба. Теэд тэндэ хүн зонойнь ууха уһан үгы байба.

¹⁵ Рэпидиимһээ гараад, тэдэнэр Синайн сүл губида тогтожо, майхан хүреэнүүдээ татаба.

¹⁶ Синайн сүл губиһаа гараад, тэдэнэр Киброот-Һа-Таһаваада тогтон байрлажа, майхан хүреэнүүдээ татаба.

¹⁷ Киброот-Һа-Таһавааһаа гараад, тэдэнэр Хацэроодто тогтон байрлажа, майхан хүреэнүүдээ татаба.

¹⁸ Хацэроодһоо гараад, тэдэнэр Ритмаада тогтон байрлажа, майхан хүреэнүүдээ татаба.

¹⁹ Ритмааһаа гараад, тэдэнэр Римноон-Пээрэцтэ тогтон байрлахаяа майхан хүреэнүүдээ татаба.

²⁰ Римноон-Пээрэцһээ гараад, тэдэнэр Либнаада тогтон байрлажа, майхан хүреэнүүдээ татаба.

²¹ Либнааһаа гараад, тэдэнэр Риссаада тогтон байрлажа, майхан хүреэнүүдээ татаба.

²² Риссааһаа гараад, тэдэнэр Кэһэлаатаада тогтон байрлажа, майхан хүреэнүүдээ татаба.

²³ Кэһэлаатааһаа гараад, тэдэнэр Шээпэр хадын хажууда тогтон байрлажа, майхан хүреэнүүдээ татаба.

²⁴ Шээпэрһээ гараад, тэдэнэр Харадаада тогтон байрлажа, майхан хүреэнүүдээ татаба.

²⁵ Харадааһаа гараад, тэдэнэр Макхэлоодто тогтон байрлажа, майхан хүреэнүүдээ татаба.

²⁶ Макхэлоодһоо гараад, тэдэнэр Таахадта тогтон байрлажа, майхан хүреэнүүдээ татаба.

²⁷ Таахадһаа гараад, тэдэнэр Тээрахтэ тогтон байрлажа, майхан хүреэнүүдээ татаба.

²⁸ Тээрахһээ гараад, тэдэнэр Миткаада тогтон байрлажа, майхан хүреэнүүдээ татаба.

²⁹ Миткааһаа гараад, тэдэнэр Хашмонаада тогтон байрлажа, майхан хүреэнүүдээ татаба.

³⁰ Хашмонааһаа гараад, тэдэнэр Мосэроодто тогтон байрлажа, майхан хүреэнүүдээ татаба.

³¹ Мосэроодһоо гараад, тэдэнэр Бэнээ-Яакаанда тогтон байрлажа, майхан хүреэнүүдээ татаба.

³² Бэнээ-Яакаанһаа гараад, тэдэнэр Хор-Хаггидгаадта тогтон байрлажа, майхан хүреэнүүдээ татаба.

³³ Хор-Хаггидгаадһаа гараад, тэдэнэр Ётбаатада тогтон байрлажа, майхан хүреэнүүдээ татаба.

³⁴ Ётбаатаһаа гараад, тэдэнэр Абронаада тогтон байрлажа, майхан хүреэнүүдээ татаба.

³⁵ Абронааһаа гараад, тэдэнэр Эциһоон-Гээбэртэ тогтон байрлажа, майхан хүреэнүүдээ татаба.

³⁶ Эциһоон-Гээбэрһээ гараад, тэдэнэр Циин сүл губидахи Кадээшэй хажууда тогтон байрлажа, майхан хүреэнүүдээ татаба.

³⁷ Кадээшһээ гараад, тэдэнэр Эдоом орон нютагай хилэ дээрэхи Һоор хадын хормойдо тогтожо, майхан хүреэнүүдээ татажа байрлабад.

³⁸ Санаарта Аһароон Эзэнэй зарлиг дүүргэжэ, тэрэ Һоор хада дээрэ гараад, израильшуудай Египедһээ гараһанһаа хойшо дүшэн жэлэй табадахи һарын нэгэнэй үдэр эндэ наһа бараба.

³⁹ Санаарта Аһароон Һоор хадын оройдо гаража наһа барахадаа, зуун хорин гурбатай байгаа.

⁴⁰ Ханаһаанай орон нютагта Нээгэб хотодо ажаһуужа байһан ханаһаануудай хаан Араад израильшууд ерэжэ ябана гэжэ дуулаба.

⁴¹ Израильшууд Һоор хадаһаа буугаад, Цалмоондо ошожо тогтоод, майхан хүреэнүүдээ татан байрлаба.

⁴² Тэдэнэр Цалмоонһоо гаража, Пуноондо ошожо тогтоод, майхан хүреэнүүдээ татан байрлаба.

⁴³ Тэдэнэр Пуноонһоо гаража, Обоодто ошожо тогтоод, майхан хүреэнүүдээ татан байрлаба.

⁴⁴ Тэдэнэр Обоодһоо гаража, Моһаабай орон нютагай хилэ дээрэхи Ийээ-Абариимай хажууда ошожо тогтоод, майхан хүреэнүүдээ татан байрлаба.

⁴⁵ Тэдэнэр Иимһээ гаража, Дибоон-Гаадта ошожо тогтоод, майхан хүреэнүүдээ татан байрлаба.

⁴⁶ Тэдэнэр Дибоон-Гаадһаа гаража, Алмоон-Диблатааһимда ошожо тогтоод, майхан хүреэнүүдээ татан байрлаба.

⁴⁷ Тэдэнэр Алмоон-Диблатааһимһаа гаража Нэбооһоо холо бэшэ байдаг Абариимай хадануудай бооридо ошожо тогтоод, майхан хүреэнүүдээ татан байрлаба.

⁴⁸ Тэдэнэр Абариимай хадануудһаа холодожо, Ерихоон тушаа сэхэ урдань байдаг Иордан мүрэнэй хажуудахи Моһаабай нюруу газарта ошоод, тогтон байрлахаяа майхануудаа татаба.

⁴⁹ Тэдэнэр майхан хүреэнүүдээ Иордан мүрэнэй зүүн эрьеын Моһаабай нюруу газар дээгүүр тодхон татаба. Тиихэдэнь тэдэнэй хотон хүреэнэй майхангууд Бэт-Ешимоодһоо эхилээд Акациин талмай хүрэтэрхи газар дайдые бүрхөөбэ.

Иордан мүрэн гаталха тухай

⁵⁰ Ерихоон тушаа Иордан мүрэнэй хажуудахи Моһаабай талада Эзэн Моисейдэ иигэжэ айладаба:

⁵¹ – Израильшуудта иигэжэ хэлэ: Иордан мүрэн гаталаад, Ханаһаанай газар дээрэ гарахадаа,

⁵² тэдэнэй газар дайдые буляажа абагты. Тэдэнэй бүхы һүлдэ хүрэгүүдыень, бүхы онгонуудыень дууһан үгы хэгты, обоо дээрэхи нангин газарнуудыень һандаргаагты.

⁵³ Таанад энэ газар абагты, эндэ ажаһуугты. Танай угай баялиг болгожо таанадта энэ газар үгэнэб!

⁵⁴ Танай ураг бүхэн хубита газараа абаха. Тэрэ ороной газарайнь ямар хуби танай ямар урагта хүртэхэб гэжэ мэдэхэеэ таанад жээрэб хаяхат. Олон хүнтэй ураг ехэ газар абаха.

⁵⁵ Үгэгшэ тэрэ газар дээрэһээмни бусад арадуудые үлдэгты. Үлөөбэлтнай, тэдэнэр үһөө нэхэжэ, шэртэһэн мэтээр хюмһанайтнай забһарта шаагдажа, амгалан таанадые байлгахагүй. Агууехэ тодхор таанадта асарха!

⁵⁶ Хэрбэеэ тэрэ арадые хубаариингаа хубита газар дээрэ үлөөбэлтнай, Би тэдээндэ хэхэ гэжэ шиидэһэн юумэеэ таанадта хэхэб!