Тоололго 32 - Библи

Иордан мүрэнһээ зүүлжээ газар хубаарилга

¹ Рэүбээнэй болон Гаадай обогуудай үхэр мал үй түмэн боложо, үхэр мал үдхэн барихада Язээрэй болон Галаадай газар дайданууд һайн гэжэ тэдэнэр хараба.

² Тиигээд Рэүбээнэй болон Гаадай обогуудай хүнүүд Моисейдэ, санаарта Эльазаарта болон ниитэ зонойнгоо ударидагшадта ерээд:

^3-4 – Бидэндэ, таанадай зарасанарта, түмэн үхэр мал бии. Бидэнэй дайгаар добтолон орожо булимтаран абаһан эдэ газарнуудта үхэр малаа харууһалан адуулхада Атороодой, Дибооной, Язээрэй, Нимраагай, Хэшбооной, Элэалээгэй, Сэбаамай, Нэбоогой болон Бэһооной нуга таланууд һайн бэлшээритэй байна.

⁵ Бидэндэ үршөөл хайра хүртөөжэ, бидэниие Иордан мүрэнэй саана эльгээнгүй, маанадта тэдэ газарнуудые үгыт, – гэжэ хэлэбэд.

⁶ Моисей Рэүбээнэй болон Гаадай обогуудай хүнүүдтэ: – Таанадай аха дүүнэр дайнда ошохо, тиихэдэнь таанад эндээ үлэхэ гэбэ гүт?

⁷ Таанад юундэ израильшуудай толгойень эрьюулхэ гэбэт? Таанадые тэдэнэр һажаалдажа, таанадта Эзэнэй үгэһэн тэрэ газарта ошохо дурагүй болохол!

⁸ Ханаһаан шадархи газар тагнан шэнжэлжэ ерэхыень таанадай эсэгэнэрые Кадээш-Барнээһээ эльгээхэдэм, тэдэ намда таанад шэнгеэр аашалалдаа һэн!

⁹ Тэдэ Эшхоолой гол газарта хүрөөд, тэндэхи газар харамсаараа, израильшуудай толгойень эрьюулээ һэн.

¹⁰ Тиихэдэнь Эзэн уур сухалаа хүдэлжэ, тэдээндэ иигэжэ тангариглан айладаа бэлэй:

¹¹ «Египедһээ эндэ ерэһэн таанадай хоринһоо дээшэ наһатайшуулай хэншье тэрэ газарыемни харахагүй. Энэ арадта газар үгэхэб гэжэ Би Абраһаамда, Исаагта, Яковта тангариглаа һэм. Теэд тэдэнэр Минии үгэ дуулаагүй.

¹² Тиихэдэнь гансал кэнэззэйн үндэһэ яһанай Епуннээгэй хүбүүн Халээб Нүүнэй хүбүүн Иисүүс хоёр лэ Минии, Эзэнэй, үгэ үнэхөөрөөл дуулаа!»

¹³ Эзэн израильшуудта сухалаа хүрөөд, эбсэшэгүй нүгэл хэһэнэйнь түлөө дүшэн жэлдэ тулижа, тэнэжэ хосорхынь түлөө тэдэниие элһэн губида орхёо!

¹⁴ Эгээл таанад мүнөө эсэгэнэртээл адляар аашалалданат. Ай даа, нүгэлтэйл байна даа энэ арад! Эзэнэй үшөө ехээр энэ арадта сухалдахынь түлөө эмхи журамаа алдаха гэбэ гүт таанад?

¹⁵ Эзэнэй үгэ таанадай дуулаагүй һаа, Тэрэ израильшуудые сүл губида орхихо. Тиихэдэнь таанад энэ арадаа хосороохот! – гэбэ.

^16-17 Тэдэнэр Моисейдэ дүтэлэн ошоод: – Бусад арадуудһаа аюулгүй байлгахын тула үхибүүдтээ хотонуудые, үхэр малнуудтаа хашаа хорёонуудые бидэ эндэ барихаяа һананабди. Өөрын арадта туһалхаяа өөһэдөө бидэнэр ошохобди. Өөһэдөө бидэ тэдэниие өөһэдынь хубита газарта асархабди.

¹⁸ Бүхы израильшуудай хубита газараа абатар бидэнэр гэртээ бусахагүйбди.

¹⁹ Манай хубита газар Иорданай зүүн тээ үлэхэ. Бидэнэр Иордан мүрэнэй баруун талада өөһэдтөө газар эрихэгүйбди, – гэжэ хэлэбэ.

²⁰ Тиихэдэнь Моисей тэдээндэ: – Эзэнэй урдань ябажа, эрэшүүлтнай дайнда ошог.

²¹ Таанадай сэрэгшэд Иордан мүрэн гаталаг. Тэндэ дайсадаа илатартнай таанадтай хамта Эзэн ябалсаг.

²² Эзэнэй урда эзэмдэлгэндэ тэрэ газар абтаха. Эзэнэй урда, израильшуудай урда таанад зэмэтэй болохогүйт. Эзэмдэһэн тэрэ газарайнгаа эзэдынь болохот. Тиигээд һүүлдэнь таанадай тэхэрижэ гэртээ бусахада болохо.

²³ Эдэ бүгэдые бэелүүлээгүй һаа, Эзэндэ нүгэл хээд, хэһэн нүгэлэйнгөө түлөө хэһээлтэдэ таанад орохот.

²⁴ Үри хүүгэдтээ хотонуудые баригты. Үхэр малнуудтаа хашаа хорёо баригты. Гэбэшье амалһанаа бэелүүлэгты, – гэжэ хэлэбэ.

²⁵ Гаадай болон Рэүбээнэй обогуудай зон Моисейдэ: – Бидэ танай зарасануудбди. Та бидэнэй эзэн мүн. Танай хэлэһэн захиралтые бидэ дүүргэхэбди.

²⁶ Манай үхибүүд болон һамгад, манай бүхы үхэр мал эндэхи Галаадай хотонуудта үлэхэ.

²⁷ Бидэ, танай зарасанууд, Иордан мүрэн гаталхабди. Эзэн танайнгаа захиралтаар Эзэнэй урда бидэнэр элдэеэ баряад, дайнда ошохобди, – гэжэ хэлэбэ.

²⁸ Моисей санаарта Эльазаарта, Нүүнэй хүбүүн Иисүүстэ болон Израилиин обогуудай бүхы ударидагшадта тэдэнэй хэлэһэн энэ найдуулгыень дамжуулжа,

²⁹ иигэжэ хэлэбэ: – Хэрбэеэ Гаадай болон Рэүбээнэй обогууд, таанадтай хамта Иордан мүрэн гаталжа, Эзэнэй урдань ябажа дайлалдабал, тэрэ газар эзэмдэхэдээ, таанад Галаадай тэрэ газарые эдээндэ үгөөрэйгты.

³⁰ Таанадтай хамта дайлалдахаяа ошоошьегүй һаа, тэдэ Ханаһаанай газар дээрэ хубита газар абахадань болохо.

³¹ – Эзэнэй захиралтые энэ дары бүтээхэбди, – гэжэ Гаадай, Рэүбээнэй обогойхид бата найдамтайгаар хэлэбэ, –

³² бидэ мүрэн гаталхабди. Бидэнэр Эзэнэй урда ябажа, Ханаһаанай газар дээрэ гарахабди. Харин бидэндэ хүртэхэ хубитамнай Иордан мүрэнэй зүүн тээхи газар болог.

³³ Моисей тэрэ газар Гаадай болон Рэүбээнэй обогуудта, мүн Иосифой хүбүүн Мэнашшээгэй обогой хахадтань үгэбэ. Тэрэ газарай хотонууд болон һуурин тосхонууд Эмоорой хаан Сиһооной хан түрын, Башаанай хаан Оогой хан түрын мэдэлэй байгаа. Эдэ бүхы орон нютагууд тэдээндэ үгтэбэ.

³⁴ Гаадай обогойхид Дибоон, Атороот, Ароһээр,

³⁵ Атроот-Шотаан, Язээр, Ёгбэһаа,

³⁶ Бэт-Нимраа болон Бэт-Һараан гэжэ хотонуудые шэнээр барибад. Тэдэнэр тэдэ хотонуудые барихадаа, дайсадһаа өөһэдыгөө аршалха бүхэ ханатай хэрэмүүдые, үхэр малнуудаа хааха хашаа хорёонуудые бариба.

³⁷ Рэүбээнэй обогойхид Хэшбоон, Элэалээ, Кириатааим,

³⁸ Нэбоо, Бааһал-Мэһоон гэжэ хотонуудые шэнээр дахин бариба. Мүн Сибмаа һэргээн бодхообо. Шэнээр бариһан эдэ хотонуудтаа тэдэ шэнэ нэрэнүүдые үгэбэ.

³⁹ Мэнашшээгэй үри һадаһан болохо Махиирай хүбүүд Галаад ошожо, тэндэ ажаһуудаг эмооршуудые үлдөөд, тэдэнэй газар дайдые эзэмдэн абаба.

⁴⁰ Моисей Галаад хотые Мэнашшээгэй удам Махиирай үри һадаһадта үгэбэ. Тэдэ тиишээ зөөжэ һуурижаба.

⁴¹ Мэнашшээгэй ондоо удам Яһиир тэндэхи тойрогой тосхонуудые дайгаар эзэмдэн абаад, тэдэниие «Яһиирай тосхонууд» гэжэ нэрлэбэ.

⁴² Нообаа Кэнаат хотые, тэрэнэй мэдэлдэ байһан тосхонуудые эзэмдээд, Кэнаат хотодо өөрынгөө «Нообаа» гэжэ нэрэ үгэбэ.