Тоололго 30 - Библи

Эхэнэрэй шахаа тангариг тухай

¹ Моисей израильшуудта Эзэнэй захяа заабаринуудые дамжуулжа хэлэбэ.

² Израилиин обогуудай удамаршадта Моисей иигэжэ хэлэбэ: – Эзэн иигэжэ захираа:

³ «Хэрбэеэ хэн нэгэн Эзэндэ тангариг үргэбэл, үгышье һаа, энэ-тэрэ юумэнһээ зайлан байхаб гэжэ үгэеэ үгэбэл, тэрэ хүн үгэеэ эбдэхэ ёһогүй.

⁴ Хэрбэеэ залуу эхэнэр үшөө эсэгынгээ гэртэ байхадаа Эзэндэ үгэеэ үгэжэ, энэ-тэрэ юумэнһээ зайлан байхаб гэжэ тангариглабал,

⁵ бүхы дашаа тангаригаа тэрэ бэелүүлхэ, найдуулһанаа сахиха ёһотой. Эсэгэнь тангаригыень мэдээд, басагандаа буруушааһан үгэ хэлээгүй һаань, тэрэ залуу эхэнэр найдуулһан юумэеэ бэелүүлэг.

⁶ Тангариг тухайнь эсэгэнь дуулаад, тэрээндэ зүбшөөлөө үгөөгүй һаань, тэрэ эхэнэр тангаригһаа сүлөө боложо, найдуулагшаяа бэелүүлэнгүй байхадань болохо. Ушар юуб гэхэдэ, эсэгэнь хоримжолоо, тиихэдэнь Эзэн тэрэниие хүлисэхэ.

⁷ Тэрэ басаган хадамда гаража, тангариг, найдуулгань тэрээнтэй байжа,

⁸ үбгэниинь тэрэ тангариг тухайнь мэдээд, үгэ дуугүй байбалнь, тангаригаа, үгэһэн үгэеэ тэрэ эхэнэр бэелүүлэг.

⁹ Тангариг тухайнь үбгэниинь мэдээд, тэрээндэ зүбшөөлөө үгөөгүй һаань, тэрэ эхэнэр тангариг үгэһөө сүлөөржэ, найдуулагшаяа бэелүүлэнгүй байхадань болохо. Ушар юуб гэхэдэ, үбгэниинь хоримжолоо. Тиихэдэнь Эзэн тэрэниие хүлисэхэ.

¹⁰ Хэрбэеэ бэлбэһэн гү, али нүхэрһөө һалаһан эхэнэр тангариглабал, бэелүүлэг тэрэ тангаригаа.

¹¹ Хэрбэеэ хадамтай эхэнэр тангариглан, энэ-тэрэ юумэнһээ зайлан байха тухайгаа найдуулбал,

¹² тангариг үгэлгэ тухайнь үбгэниинь мэдээд, юушье хэлээгүй, хорёогүй һаань, тэрэ эхэнэр тангаригаа бэелүүлжэ, найдуулан хэлэгшэеэ бүтээг.

¹³ Хэрбэеэ тангариг үгэлгэ тухайнь үбгэниинь дуулаад, хорижо зүбшөөлөө үгөөгүй һаань, тэрэ эхэнэр тангаригаа бэелүүлжэ шадахагүй. Хэрбэеэ тангаригтань үбгэнэйнь һаалта хээ һаань, Эзэн тэрэ эхэнэрые хүлисэхэ.

¹⁴ Эхэнэрэй масаглажа, али нэгэн тангариг, ямар нэгэн үүргэ, харюусалга өөртөө абахадань, үбгэниинь һамгандаа зүбшөөжэшье, хорижошье болохо.

¹⁵ Тангариг тухайнь үбгэниинь дуулаад, тэрэнээ бэелүүлхэдэнь һаалта хээгүй һаань, тэрэ эхэнэр найдуулагшаяа түгэс дүүрэн бэелүүлэг.

¹⁶ Һамганайнгаа тангаригууд тухай үбгэниинь дуулаад, буруушаабал, һамганайнь гэм зэмэ үбгэндэнь тохогдохо».

¹⁷ Үбгэн ба һамган тухай, эсэгэ ба эсэгынгээ гэртэ байһан залуу басаган тухай Моисейдэ Эзэнэй айладаһан хуули энэ юм.