Тоололго 29 - Библи

Бүреэнүүдэй һайндэр

¹ Долоодохи һарын эхин үдэр таанад сугларжа, һайндэрлэхэ ёһотойт. Энэ үдэр ямаршье ажал бү хэгты. Энэ үдэр бүреэнүүдые үлеэхэ үдэр.

² Эзэндэ аятай һайхан хангал үнэр гарган, түгэс шатаалта үргэлдэ нэгэ буруун буха, бэеэ хүсэһэн нэгэ хуса, долоон эрэ хурьга асаржа үргэгты. Тэдэтнай эрэмдэг бэшэ байха ёһотой.

³ Тэдэнэйнгээ хажууда иимэ үргэлнүүдые асарагты: буруун буха бүхэнэйнгөө үргэлдэ оливын тоһо холиһон эфаагай арбанай гурбан хуби шэниисын гурил, хуса бүхэнэй үргэлдөө эфаагай арбанай хоёр хуби шэниисын гурил,

⁴ эрэ хурьган бүхэнэйнгөө үргэлдэ эфаагай арбанай нэгэ хуби гурил,

⁵ Нүгэл сагааруулгын үргэлдэ нэгэ тэхэ таанад үргэгты.

⁶ Шэнэ һарын эхиндэ ба үдэр бүри үргэдэг түгэс шатаалта, таряа талханай, сэржэмэй үргэлнүүдһээ гадуур эдэ үргэлнүүдые хуулиин ёһоор бүтээгты. Эдэ үргэлнүүдэйтнай аятай һайхан хэншүү үнэр Эзэндэ һайшаагдаха.

Арюудхалгын үдэр

⁷ Долоодохи һарын арбанай үдэр таанад сугларжа, һайндэрлэгты. Энэ үдэр масаг баригты, ямаршье ажал бү хэгты.

⁸ Эзэндэ аятай һайхан хангал үнэр гаргахаяа түгэс шатаалта үргэлдэ гэжэ иимэ үргэлнүүдые асарагты: нэгэ буруун буха, бэеэ хүсэһэн нэгэ хуса, долоон эрэ хурьга. Эдэтнай эрэмдэг бэшэ байха ёһотой.

⁹ Тэдэнэйнгээ хажууда иимэ үргэлнүүдые асарагты: буруун буха бүхэндэ оливын тоһо холинхой эфаагай арбанай гурбан хуби шэниисын гурил, бэеэ хүсэһэн нэгэ хуса бүхэндэ эфаагай арбанай хоёр хуби шэниисын гурил,

¹⁰ эрэ хурьган бүхэндэ эфаагай арбанай нэгэ хуби шэниисын гурил.

¹¹ Саг үргэлжэ тахидаг түгэс шатаалта, талхан, сэржэм үргэлнүүдһээ гадуур Арюудхалгын үдэр нүгэл сагааруулгын үргэлдэ нэгэ тэхэ үргэхэ хэрэгтэй.

Майхангуудай һайндэр

¹² Долоодохи һарын арбан табанай үдэр таанад сугларжа, һайндэрлэхэ ёһотойт. Таанад ямаршье ажал хэнгүй, Эзэнэй һайндэрые долоон үдэрэй туршада тэмдэглэгты.

¹³ Эзэндэ һайшаагдадаг, аятай һайхан үнэр гарадаг түгэс шатаалта иимэ үргэлнүүдые асарагты: арбан гурбан буруун буха, бэеэ хүсэһэн хоёр хуса, арбан дүрбэн эрэ хурьга. Тэдэнэртнай эрэмдэггүй байха ёһотой.

¹⁴ Тэдэнэйнгээ хажууда иимэ үргэлнүүдые асарагты: буруун буха бүхэндэ оливын тоһо холинхой эфаагай арбанай гурбан хуби шэниисын гурил, бэеэ хүсэһэн хуса бүхэндэ эфаагай арбанай хоёр хуби шэниисын гурил,

¹⁵ эрэ хурьган бүхэндэ эфаагай арбанай нэгэ хуби шэниисын гурил.

¹⁶ Нүгэл сагааруулгын үргэлдэ нэгэ тэхэ асарагты. Тэрэтнай ходо үргэдэг түгэс шатаалта, талхан болон сэржэм үргэлнүүдһээ гадуур үргэл болоно.

¹⁷ Хоёрдохи үдэр ямаршье эрэмдэггүй арбан хоёр буруун буха, хоёр хуса, арбан дүрбэн эрэ хурьга асарагты.

¹⁸ Буруун бухануудай, бэеэ хүсэһэн хусануудай болон эрэ хурьгадай тоогоор ба хууляар талхан болон сэржэм үргэлнүүдые үргэгты.

¹⁹ Нүгэл сагааруулгын үргэлдэ нэгэ тэхэ үргэгты. Энэ үргэл болбол хододоо үргэгдэдэг түгэс шатаалта, талхан болон сэржэм үргэлнүүдһээ гадуур үргэл болоно.

²⁰ Гурбадахи үдэр арбан нэгэн буруун буха, бэеэ хүсэһэн хоёр хуса, арбан дүрбэн эрэ хурьга үргэгты. Тэдэтнай эрэмдэггүй байха ёһотой.

²¹ Буруун бухануудай, бэеэ хүсэһэн хусануудай, эрэ хурьгадай хажууда тэдэнэй тоогоор ба хууляар талхан болон сэржэм үргэлнүүдые асарагты.

²² Нүгэл сагааруулгын үргэлдэ нэгэ тэхэ үргэгты. Энэ үргэл – хододоо үргэгдэдэг түгэс шатаалта, талхан, сэржэм үргэлнүүдһээ гадуур үргэл болоно.

²³ Дүрбэдэхи үдэр арбан буруун буха, бэеэ хүсэһэн хоёр хуса, арбан дүрбэн эрэ хурьга үргэгты. Тэдэтнай эрэмдэггүй байха ёһотой.

²⁴ Буруун бухын, бэеэ хүсэһэн хусын болон эрэ хурьганай тоогоор ба хуулиин ёһоор талхан, сэржэм үргэлнүүдые үргэгты.

²⁵ Нүгэл сагааруулгын үргэлдэ нэгэ тэхэ асарагты. Энэ үргэл хадаа хододоо хэгдэдэг түгэс шатаалта, талхан, сэржэм үргэлнүүдһээ гадуур үргэл болоно.

²⁶ Табадахи үдэр юһэн буруун буха, бэеэ хүсэһэн хоёр хуса, арбан дүрбэн эрэ хурьга үргэгты. Тэдэтнай эрэмдэггүй байха ёһотой.

²⁷ Буруун бухын, бэеэ хүсэһэн хусын болон эрэ хурьганай тоогоор ба хуулиин ёһоор талхан, сэржэм үргэлнүүдые үргэгты.

²⁸ Нүгэл сагааруулгын үргэлдэ нэгэ тэхэ үргэгты. Энэ үргэл болбол хододоо хэгдэдэг түгэс шатаалта, талхан, сэржэм үргэлнүүдһээ гадуур үргэл болоно.

²⁹ Зургаадахи үдэр найман буруун буха, бэеэ хүсэһэн хоёр хуса, арбан дүрбэн эрэ хурьга үргэгты. Тэдэтнай эрэмдэггүй байха ёһотой.

³⁰ Буруун бухын, бэеэ хүсэһэн хусын болон эрэ хурьганай тоогоор ба хуулиин ёһоор талхан, сэржэм үргэлнүүдые үргэгты.

³¹ Нүгэл сагааруулгын үргэлдэ нэгэ тэхэ асарагты. Энэ үргэл хадаа хододоо хэгдэдэг түгэс шатаалта, талхан, сэржэм үргэлнүүдһээ гадуур үргэл болоно.

³² Долоодохи үдэр долоон буруун буха, бэеэ хүсэһэн хоёр хуса, арбан дүрбэн эрэ хурьга үргэгты. Тэдэтнай эрэмдэггүй байха ёһотой.

³³ Буруун бухын, бэеэ хүсэһэн хусын болон эрэ хурьганай тоогоор ба хуулиин ёһоор талхан, сэржэм үргэлнүүдые үргэгты.

³⁴ Нүгэл сагааруулгын үргэлдэ нэгэ тэхэ асарагты. Энэ үргэл хадаа хододоо хэгдэдэг түгэс шатаалта, талхан, сэржэм үргэлнүүдһээ гадуур үргэл болоно.

³⁵ Наймадахи үдэр – һайндэр. Энэ үдэр ямаршье ажал бү хэгты.

³⁶ Эзэндэ түгэс шатаалта, аятай һайхан хэншүү үнэр дэгжүүлдэг үргэлдэ эрэмдэггүй нэгэ буруун буха, бэеэ хүсэһэн нэгэ хуса, долоон эрэ хурьга үргэгты.

³⁷ Буруун бухын, бэеэ хүсэһэн хусын болон эрэ хурьганай тоогоор ба хуулиин ёһоор талхан, сэржэм үргэлнүүдые үргэгты.

³⁸ Нүгэл сагааруулгын үргэлдэ нэгэ тэхэ асарагты. Энэ үргэл хадаа хододоо хэгдэдэг түгэс шатаалта, талхан, сэржэм үргэлнүүдһээ гадуур үргэл болоно.

³⁹ Һайндэрнүүдэй үедэ таанад Эзэндэ эдэ үргэлнүүдые үргэхэ ёһотойт. Энэ хадаа таанадай тангариглажа гү, али ехэ оролдолго гаргажа тахиһан түгэс шатаалта, талханай, сэржэмэй, амгалан байдалай үргэлнүүдһээ гадуур үргэгдэхэ юм.