Тоололго 27 - Библи

Басагад тухай хуули

¹ Иосифой хүбүүн Мэнашшээ, Мэнашшээгэй хүбүүн Махиир, Махиирай хүбүүн Галаад, Галаадай хүбүүн Хээпэр, Хээпэрэй хүбүүн Цэлопэһаад байгаа юм. Тэрэ Маһлаа, Ноһаа, Хоглаа, Милкаа, Тирцаа гэжэ нэрэтэй табан басагатай байгаа.

² Тэдэ эхэнэрнүүд майхан һүмэдэ ерэжэ, Моисейн, санаарта Эльазаарай, ударидагшадай болон бүхы израильшуудай урда гараад, иигэжэ хэлэбэд:

³ – Бидэнэй эсэгэ сүл губида наһа бараа. Тэрэ өөрынгөө нүгэлэй түлөө нүгшөө юм. Тэрэ Коорахтай үгэеэ үгэлсэгшэдтэй ниилээгүй. Хүбүүдые үлөөгөөгүй.

⁴ Бидэнэй дунда эсэгынгээ нэрые нэрлүүлхэ хүбүүн үгы. Хүбүүгүй байһан тула манай эсэгэ хамтын тоодо ороогүй. Манай эсэгын аха дүүнэрэй газарһаа бидэндэ хубита газар хубаалдыт.

⁵ Иихэдэнь яахаб гэжэ Моисей Эзэнһээ асууба.

⁶ Эзэн Моисейдэ иигэжэ харюусаба:

⁷ – Цэлопэһаадай басагад зүб хэлэнэ. Эсэгынь абаха байһан хубита газарые тэдээндэ хубаалдаг.

⁸ Израильшуудта иимэ гурим тунхаглан хэлээрэй: хэрбэеэ хүбүүгүй хүнэй наһа барабал, хубита газарынь басагадтань үгтэхэ.

⁹ Хэрбэеэ басагагүй байбалнь, хубита газарыень аха дүүнэртэнь үгэгты.

¹⁰ Хэрбэеэ тэрэ аха дүүнэргүй байбал, хубита газарыень эсэгынь аха дүүнэртэ үгэгты.

¹¹ Хэрбэеэ эсэгэнь аха дүүнэргүй байбал, хубита газарыень нүгшэһэн хүнэй дүтын түрэлдэ үгэгты. Энэ зарлиг израильшуудай дунда Эзэнэй заяаһан хуули болон үлэг.

Нүүнэй хүбүүн Иисүүс

¹² Эзэн Моисейдэ: – Энэ Абариим хада өөдэ гара. Эдэ израильшуудта үгэхэб гэһэн газарыем эндэһээ ши хара.

¹³ Үндэрһөө тэрэ газар хараад, Аһароон ахадаа адляар наһа барахаш тэндэ.

¹⁴ Ши һанана гүш, Циин губида уһанай түлөө арад зоной буһалгаа хэһыень. Минии арюун нангин байһые зондо харуулжа гэршэлээгүйт, – гэжэ айладаба. (Энэнь Сиин губида оршодог Мэрибаа-Кадээш булаг мүн.)

¹⁵ Моисей Эзэндэ:

¹⁶ – Та ямаршье амитанай амидаралай ба нүгшэлгын Эзэн Бурхан мүн. Энэ арадые ударидаха хүниие томилыт гэжэ би Таниие гуйнаб.

¹⁷ Эзэгүй үлэһэн хонидтол адли энэ арадые элдин шэнэ газарта абаашахын тула элдээрээ дайсадтай тулалдаха эрэлхэг зоригтой ударидагшые энэ арадта томилыт гэжэ би Таниие гуйнаб, – гэжэ хандаба.

¹⁸ Эзэн Моисейдэ: – Нүүнэй хүбүүн Иисүүс шэнэ ударидагша болог. Сэсэн ухаатай тэрэниие шэнэ ударидагша болго.

¹⁹ Санаарта Эльазаарай урда, арад зоной урда зогсо гэжэ тэрээндэ хэлэ. Тиигээд тэрэниие шэнэ ударидагша болобо гэжэ соносхо.

²⁰ Тэрэниие шэнэ ударидагша болгожо байһанаа арад зондоо харуула. Тиихэдэш бүхы израильшууд үгыень дуулаха.

²¹ Хэрбэеэ Иисүүс ямар нэгэ шиидхэбэри абаха гээ һаа, санаарта Эльазаарта ошог. Эльазаар урим абахадаа, Эзэнһээ харюу мэдэхэ. Тиихэдэнь Иисүүс болон израильшууд Бурханай захирһан юумынь бүтээг. Хэрбэеэ Тэрэнэй «Дайлалдахаяа гарагты» гэжэ захираа һаань, тэдэнэр дайлалдахаяа гараг. Хэрбэеэ Тэрэнэй «гэртээ бусагты» гээ һаань, тэдэнэр гэртээ ошог, – гэжэ айладаба.

²² Моисей Эзэнэй захиралтые дүүргэжэ, Иисүүсые санаарта Эльазаарай, израильшуудай урда абаашаад,

²³ Иисүүс израильшуудай шэнэ ударидагша болобо гэһэн тэмдэг үгэжэ, тэрэнэй толгой дээрэнь альгаа табиба. Тиигээд Моисей Эзэнэй заабаряар тэрэниие ударидагша болгохо ёһолол бүтээбэ.