Тоололго 23 - Библи

Балаһаамай үреэл

¹ Балаһаам Балаагта иигэжэ хэлэбэ: – Ши намда энэ үндэртэ долоон үргэлэй шэрээ баряад, долоон эрэ тугал, долоон эрэ хурьга үргэлдэ бэлдэ.

² Балаак Балаһаамай хэлэгшээр долоон үргэлэй шэрээ барюулаад, үргэлэй шэрээ бүхэндэ нэгэ эрэ тугал, нэгэ эрэ хурьга үргэбэ.

³ – Би уула дээрэ гараһууб, ши түгэс шатаалта үргэлнүүдэйнгөө хажууда үлэ. Минии урдаһаа Эзэн ерэжэ магадгүй. Намда Тэрэнэй айладаһан юумые би шамда дамжуулхаб, – гэжэ Балаһаам Балаагта хэлээд, Эзэнһээ асуудал һурахаяа хадын оройдо гараба.

⁴ Эзэн Балаһаамтай уулзаба. Балаһаам Тэрээндэ: – Би долоон үргэлэй шэрээ барюулаад, үргэлэй шэрээ бүхэндэ нэгэл эрэ тугал, нэгэ эрэ хурьга үргүүлбэб, – гэбэ.

⁵ Тиихэдэнь Эзэн айладаха гэһэн үгэеэ Балаһаамай аман соо хээд, айладаба: – Балаагта бусаад, иигэжэ хэлээрэй.

⁶ Балаһаамай Балаагта бусахадань, Моһаабай тайжанууд өөһэдынгөө түгэс шатаалта үргэлнүүдэй хажууда зогсобод.

⁷ Балаһаам Балаагта иимэ өөрын һургаал үгүүлэлые дуугаран хэлэбэ: – Моһаабай хаан Балаак, алас дурнын хадануудһаа, Араамһаа намайе эндэ асараад, аргагүй ехээр иигэжэ бааланал: Ерээд эндэ Яковые тарнидажа үгэ, ерээд эндэ Израильда муу юумэ айлада!

⁸ Би яажа тарнидахабиб, Бурхан тарниданагүйл. Би яажа тэрээндэ муу юумэ айладахабиб, Эзэн тэрээндэ муу юумэ айладанагүйл.

⁹ Би байсын оройһоо тэрэниие шэртэнэб, би гүбээгэй оройһоо тэрэниие харанаб. Бусад арадуудтай тэдэ ниилэнгүй, бултадаа тэдэнэр аминдаа ажаһуунал.

¹⁰ Элһэн мэтэ тоо томшогүй Яковай үринэрые хэн тооложо шадахаб? Израилиин дүрбэнэй нэгэшье хубиие хэн тоолохоб? Хэншье шадахагүйл! Үнэн сэдьхэлтэнүүдэй үхэл намайе абаашаха болтогой! Тэдэнэй эсэстэл адли минии эсэс байг лэ!

¹¹ Балаак Балаһаамда: – Иихэдээ ши намда юу хэнэш?! Дайсадыемни тарнидахыеш шамайе би эндэ асараа бэшэ гүб? Эльбэдэн жадхадахынгаа орондо дайсадыемни ши юундэ үреэнэбши?! – гэбэ.

¹² Балаһаам Балаагта: – Эзэнэй айладаһан үгэдэ этигэнэгүй гүш ши минии хэлэхэдэ?! – гэжэ харюусаа һэн.

Балаһаам хоёрдохиёо абарагдана

¹³ Балаак Балаһаамые иигэжэ гуйба: – Ошолсо намтай ондоо газарта, ши тэдэниие бултыень харахагүйш, зоной хубииень лэ тэндэһээ харахаш. Тиигээшье һаа, намда тэдэниие тарнидажа үгэ.

¹⁴ Балаак тэрэниие дахуулаад, Пиисгаа хадын оройдохи харуулай газарта абаашаад, тахилай долоон шэрээ барюулба. Үргэлэй шэрээ бүхэндэ нэгэ эрэ тугал, нэгэ эрэ хони асаруулба.

¹⁵ Балаһаам Балаагта иигэжэ хэлэбэ: – Өөһэдынгөө түгэс шатаалта үргэлнүүдэй хажууда үлэгты, харин би Эзэнтэй уулзахаяа тиишээ ошохом.

¹⁶ Эзэн Балаһаамтай уулзажа, айладаха гэһэн үгэеэ тэрэнэй хэлэн дээрэ тогтоогоод, иигэжэ айладаба: – Балаагта бусаад иигэжэ хэлээрэй.

¹⁷ Моһаабай бүхы тайжануудтай хамта түгэс шатаалта үргэлнүүдэйнгөө хажууда зогсоһон Балаагта Балаһаам бусажа ерэбэ. Балаак тэрээнһээ иигэжэ асууба: – Эзэн юун гэжэ айладабаб?

¹⁸ Балаһаам өөрынгөө һургаал үгүүлэлые дуугаран иигэжэ хэлэбэ: – Хүл дээрээ зогсо, Балаак, ханамжатайгаар шагна, Циппоорой хүбүүн,

¹⁹ худал зүйл хэлэжэ байха хүн бэшэл Бурхан. Ушар болоод лэ һанаһанаа хубилгаха, уладай хүбүүн бэшэл Тэрэ. Айладаһан зарлигаа хубилгаха юм аал Тэрэ? Найдуулһанаа хубилгахагүйл Тэрэ. Айладаанаал Тэрэ айладаха, айладажа найдуулагшаяа Тэрэ бүтээхэл.

²⁰ Тэрэ арадые үреэ гэжэ Эзэн намда захираа. Эзэн тэдэниие үреэжэ эхилээ. Тэрэнэй үреэлыень би хубилгажа шадахагүйб.

²¹ Яковта тэрьедэлгэ харагданагүйл! Израильда гай тодхор болохогүйл! Тэдээнтэй хамтал Эзэн Бурхан! Тэдээнтэй хамтал Хаан гээд зар тунхагтай!

²² Тэдэниие Египедһээ гаргаһан Эзэн галзуу дошхон бухадал дайсадтайнь тулалдана.

²³ Ямаршье эди шэдитэ хүсэн Яковые илахагүйл. Ямаршье эльбэ жадха Израилиие тогтоохогүйл. Яков болон Израиль тухай иигэжэ зон хэлэхэл: «Эзэн эдээнэй түлөө бүхы юумэ хэнэл!

²⁴ Эмэ арсалан мэтэ энэ арад хүл дээрээ бододог. Эрэ арсалан мэтэ энэ арад үндыдэг. Бариһан олзоёо дууһан эдеэгүйдөө, бүхы шуһыень һорожо садаагүйдөө байһан газартаа хэбтэдэггүй».

²⁵ Балаак Балаһаамда: – Энэ арадые хараагаагүй хадаа ядахын сагта үреэнгүй байхаяа яанабши! – гэжэ хэлэбэ.

²⁶ Балаһаам Балаагта: – Эзэнэй намда айладаһан лэ юумые хэхэб гэжэ би шамда хэлээ бэшэ һэн гүб? – гэжэ харюусаба.

Балаһаамай гурбадахи айладалга

²⁷ Балаак Балаһаамда: – Ошоё, би шамайе дахуулаад, ондоо газарта абаашаһууб. Тэдэниие тарнидан харааха зүбшөөл тэндэ Эзэн үгэжэ магадгүй, – гэбэ.

²⁸ Балаак Балаһаамые дахуулаад, үбэр талаараа сүл губи тээшэ хараһан, Пэһоорой оройдо абаашаба.

²⁹ Балаһаам Балаагта иигэжэ хэлэбэ: – Долоон үргэлэй шэрээ намда эндэ баряад, долоон эрэ тугал, долоон эрэ хурьга эндэ асаруула.

³⁰ Балаһаамай хэлээшээр Балаак үргэлэй долоон шэрээ барюулаад, тэдээн бүхэндөө нэгэ эрэ тугал, нэгэ эрэ хурьга үргэбэ.