Тоололго 22 - Библи

Балаһаам ба Моһаабай хаан

¹ Тиигээд израильшууд тэндэһээ гаража, Иорданай хажуудахи Моһаабай тэгшэ газар дээрэ тогтобо. Иорданай нүгөө бэедэнь Ерихоон байгаа.

² Циппоорой хүбүүн Балаак израильшуудай яагаад эмооршуудые үгы хэһыень дууһан хараа.

³ Моһаабай бүхы зон тэдээнһээ угаа ехээр айжа байгаа. Юундэб гэхэдэ, Израилиин сэрэгшэдэй тоо тэдээнһээ һураггүй олон дээрэһээ тэдэ израильшуудһаа айхабтар ехээр һүрдэбэ.

⁴ Моһаабайхид Мидианай аха захатанда иигэжэ хандаба: – Мүнөө энэ үй түмэн зон нугын зүлгэ ногоое үрэбхин эдиһэн үхэр мал мэтээр бидэниие, мүн тойроод байһан хамаг бүхы юумыемнай үгы хэхэнь! Тэрэ үе сагта Циппоорой хүбүүн Балаак Моһаабай хаан бэлэй.

⁵ Тэрэ Евфрат мүрэнэй эрье дээрэхи Пэтоор хотодо ажаһуудаг Бэһоорой хүбүүн Балаһаамда, тэндэхи арадта иимэ захяатайгаар элшэн сайдаа эльгээбэ: – Энэ арад Египедһээ ерэжэ, эндэхи бүхы газар дайдыемни бүрхөөбэ. Энэ арад минии хотон хүреэнүүдэй хажууда хотон хүреэнүүдээ табибад.

⁶ Түргөөр ерэ намда, энэ арадые хараалай муу хараалаар тарнида. Ушар юуб гэхэдэ, энэ арад намһаа хүсэтэй. Хараалай муу хараалаар тарнидабалшни, би тэдэниие үгы хэхэ шадал оложо магад, энэ газарһаа үлдэжэ болохоб. Хэниие ши үреэнэш, тэрээндэ һайн, хэниие ши хараанаш, тэрээндэ муу байдаг гэжэ би мэдэнэб.

⁷ Моһаабай болон Мидианай аха захатан эльбэ жэльбын түлөө түлбэри баряад, Балаһаамда ерэжэ, Балаагай захяа дуулгаба.

⁸ Балаһаам тэдээндэ иигэжэ хэлэбэ: – Таанад эндэ хоногты. Намда Эзэнэй юун гэжэ айладаһые би таанадта хэлэхэб. Моһаабай болон Мидианай аха захатан тэндэ хонохоёо Балаһаамтай үлэбэд.

⁹ Эзэн Балаһаамда үзэгдөөд: – Шамда юун хүнүүд ерээб? – гэжэ асууба.

¹⁰ Балаһаам Бурханда: – Моһаабай хаан, Циппоорой хүбүүн Балаак намда эдэниие эльгээгээд, иигэжэ захяа:

¹¹ «Ямар бэ даа ондоо арад Египедһээ ерэжэ, эндэхи бүхы газар дайдыемни бүрхөөбэ. Ши намда ерээд, эльбэ жадхаараа тэдэниие тарнидажа үгыш, тиигэбэлшни би тэдээнтэй дайлалдаха, тэдэниие эндэһээ намнан үлдэхэ хүсэ шадалтай боложо магадби» гээ, – гэбэ.

¹² Бурхан Балаһаамда: – Ши тэдээнтэй бү яба. Ши тэрэ арадые бү тарнида. Ушар юуб гэхэдэ, тэдэнэр Минии үреэлдэ хүртэнхэй, – гэжэ айладаба.

¹³ Үглөөгүүр Балаһаам бодоод, Балаагай эльгээһэн тайжануудта иигэжэ хэлэбэ: – Өөһэдынгөө газарта бусагты. Таанадтай ошохо зүбшөөл Эзэн намда үгэбэгүй.

¹⁴ Моһаабай тайжанууд нютагаа бусажа, Балаагта ерээд, иигэжэ хэлэбэд: – Балаһаам бидэнтэй ерэхэеэ арсаба.

¹⁵ Балаак тэдээнһээ бүри ехэ нэрэ солотой, бүри олон тайжануудаа Балаһаамда эльгээбэ.

¹⁶ Тэдэнэр Балаһаамда ерээд хэлэбэ: – Циппоорой хүбүүн Балаак иигэжэ захяа: Ши намда ерэхэеэ бү арсыш даа.

¹⁷ Хэрэгыемни шинии бүтээбэл, би шамда элбэг дэлбэг бэлэг барихаб. Ерыш даа, энэ арадые намда хараалай муу хараалаар тарнидажа үгыш.

¹⁸ Балаһаам Балаагай тайжануудта: – Алта мүнгөөр дүүрэн өөрын ордон Балаагай намда үгөөшье һаа, би өөрынгөө дураар багаханшье һайн гү, али багаханшье муу юумэ хэхын тула Эзэнэй, өөрынгөө Бурханай, зарлигта харша буруу юумэ хэжэ шадахагүйб.

¹⁹ Гэбэшье таанад намтай эндэ хоногты. Энэ һүни намда юун гэжэ Эзэн айладанаб, би тэрэнииень таанадта хэлэхэб, – гэжэ харюусаба.

²⁰ Һүни Бурхан Балаһаамда үзэгдөөд, иигэжэ айладаба: – Эдэ хүнүүдэй дахин шамайе гуйжа абаашаха гээ һаань, тэдээнтэй хамта ошолсо. Гэбэшье Минии шамда айладаашаар юумэ хээрэй.

Балаһаамай эмэ элжэгэн

²¹ Үглөөгүүр Балаһаам бодоод, өөрынгөө эмэ элжэгые эмээллэжэ, Моһаабай тайжануудтай суг хамта ошолсобо.

²² Балаһаамай тэдээнтэй ошоходонь, Бурхан сухалдажа, Эльгээмэлээ тэрээндэ эльгээбэ. Тэрэ Эльгээмэл Балаһаамай харгыень хаажа, сэхэ урдань зогсобо. Балаһаам өөрынгөө элжэгэн дээрэ һуунхай, тэрээнтэй суг хамта хоёр зарасань ябалсана.

^23-24 Тэрэнэй элжэгэн хуйһаа һугалжа һэлмэеэ гартаа баряад, сэхэ урдань зогсоһон Эзэнэй Эльгээмэлые хараад, харгыһаа хажуу тээшээ гараба. Балаһаам элжэгэеэ сохижо, харгыда дахин оруулба. Тиигээд Эльгээмэл үзэм жэмэстэ модонуудай хоорондуур үнгэрөөд, хоёр талаһаа эгсэ ханатай, хажуу тээшээ гарахын аргагүй хадын харгын наридхада хүрэжэ ерэбэ.

²⁵ Тэрэнэй элжэгэн Эзэнэй Эльгээмэлэй урдань зогсохые хараад, сээжэ бэеэрээ Балаһаамай хүлые хабсагайда хашан тогтошобо. Балаһаам элжэгэеэ дахин сохижо, харгын тэгэн дунда оруулха гэжэ оролдобо.

²⁶ Эзэнэй Эльгээмэл тэрэнэй элжэгэнэй алхамшье хажуу тээшээ гарахын аргагүй бүри уйтан, бүри нарин газарта ошоод, харгыень хаажа урдань зогсобо.

²⁷ Элжэгэниинь Эзэнэй Эльгээмэлые хараад, харгы дээрэ хэбтэшэбэ. Балаһаам олиггүй ехээр сухалдажа, барижа ябаһан таягаараа элжэгэеэ нэрэ һурагүй сохижо мэдэбэ.

²⁸ Эзэн элжэгэнэйнь амые нээжэ, Балаһаамда хүнэй хэлээр иигэжэ хэлүүлбэ: – Шамда ямар муу юумэ би хээбиб? Ши намайе юундэ гурба дахин сохибош?

²⁹ Балаһаам элжэгэндээ: – Ши эдэнэртэ намайе тэнэглэбэ гэжэ харуулха гэбэ гүш? Намда мүнөө һэлмын байгаа һаа, би шамайе алаха һэм! – гэбэ.

³⁰ Элжэгэн Балаһаамда: – Шинии элжэгэн би бэшэ юм гүб? Ши намайе энэ үдэр болотор унажа ябана бэшэ гүш? Урдань би иигэдэг һэн гүб? – гэбэ. – Үгы, – гэжэ Балаһаам харюусаба.

³¹ Эзэн Балаһаамай нюдыень нээбэ. Харгыень хаагаад, һэлмэеэ хуйһаань һугалжа гартаа баряад байһан Эзэнэй Эльгээмэлые хараад, Балаһаам доро дохижо, һүгэдэн унаба.

³² Эзэнэй Эльгээмэл тэрээндэ: – Ши юунэй түлөө гурба дахин элжэгэеэ сохибош? Шамда һаалта хэхэ гэжэ Би харгы замыешни хаагааб. Юундэб гэхэдэ, шинии хэрэг Намда һайшаагданагүй.

³³ Элжэгэншни Намайе хараад, Намһаа тэрьедэжэ, харгыһаа гурба дахин хадуураал! Хэрбэеэ Намһаа тэрэнэйш тэхэреэгүй һаа, шамайе Би алаха байгааб. Харин элжэгые амиды үлөөхэ байгааб! – гэжэ айладаба.

³⁴ Балаһаам Эзэнэй Эльгээмэлдэ: – Би нүгэл хэбэб. Нарин харгы дээрэм зогсоходотнай, намда һаалта хэнэ гэжэ таниие огто би һанаагүйб. Буруушаагаа һаатнай, нютагаа тэхэрин бусаһуууб, – гэбэ.

³⁵ Эзэнэй Эльгээмэл Балаһаамда: – Ши эдэнэртэй суг хамта ошолдо. Болгоомжолжо ябахые оролдо. Би шамда юун гэжэ айладанабиб, эгээл тэрэниием эдээндэ хэлэхэш, – гэжэ айладаба. Балаһаам Балаагай эльгээһэн тайжануудтай суг хамта харгы замаа үргэлжэлүүлэн, саашаа ошобо.

³⁶ Балаак Балаһаамые ерэжэ ябана гэжэ дуулаад, тэрэниие угтажа, Арноон шадархи хилын хажууда байдаг Моһаабай хото руу ерэбэ.

³⁷ Балаак Балаһаамтай уулзаад: – Шамайе дуудажа ерүүлхын тула шамда хүнүүдые би эльгээгээгүй аалби? Ши яаража намда юундэ ерээгүйбши? Шамда түлбэри түлэжэ шадахагүй гэжэ намайе һанаа гүш?! – гэжэ зэмэлбэ.

³⁸ Балаһаам Балаагта: – Би мүнөө эндэб. Өөрөө би юу хэлэхэбиб даа? Шамда Эзэнэй дамжуула гэгшыень лэ үлөөн дутаангүйгөөр хэлэхэб, – гэжэ харюусаба.

³⁹ Балаһаам Балаагтай суг хамта Кирьяат-Хуцоот ошобо.

⁴⁰ Балаак бухануудые болон хонидые шарууһалаад, үргэлдэ үргэхэ хубияа Балаһаамда болон суг хамта ябаһан тайжануудта үгэбэ.

Балаһаам анха удаа абарагдаба

⁴¹ Үглөө үглөөгүүрынь Балаак Балаһаамые дахуулаад, Бамоот-Бааһалда асарба. Тэндэһээ Балаһаам израильшуудай хотон хүреэнэй багахан хубиие обёорон хараба.