Тоололго 21 - Библи

Ханаһаан зонтой тулалдаан

¹ Израильшууд Атариимһаа эндэ ерэжэ ябана гэжэ үмэнэ зүгтэ ажаһуудаг ханаһаануудай хаан Араад дуулаад, израильшуудта добтолжо, хэдэн хүнүүдыень мэдэлдээ абаба.

² Тиихэдэнь израильшууд Эзэндэ тангариглан иигэжэ хэлэбэ: – Тэрэ арадые дайгаар абалгые бидэндэ зүбшөөгөө гээшэ һаатнай, тэдэниие болон хотонуудыень Танда бэлэглээд, тэдэ бүхы хотонуудыень һүүлдэнь дууһан һандаргахабди.

³ Эзэн израильшуудай тангариглан гуйхыень шагнаад, ханаһаануудые илахадань тэдээндэ туһалба. Израильшууд тэдэниие болон тэдэнэй хотонуудые дууһан һандаргажа, тэрэ газараа Хормаа гэжэ нэрлэбэ.

Зэд могой

⁴ Эдоомой газар дайдые тойрожо гаталхын тула тэдэнэр Һоор хадаһаа Хулһата далай тээшэ ошобо. Тэдэнэр тойруу харгыгаар тулиха зобоходоо,

⁵ Эзэндэ болон Моисейдэ дураа гутан иигэжэ гэмэрэлдэбэд: – Таанад бидэниие юундэ Египедһээ гаргаабта? Бидэнэр энэ сүл губида үхэхэмнайл! Эндэ хилээмэншье, уһаншье үгыл! Энэ муухай эдеэ хоолһоо ойгоо гутажа эхилээбди!

⁶ Эзэн тэдээн руу хорото могойнуудые эльгээбэ. Могойнуудта хадхуулжа, олон израильшууд үхэбэ.

⁷ Арад зон Моисейдэ ерээд, иигэжэ хэлэбэ: – Бидэнэр Эзэндэ, танда дураа гутан гэмэрэлдэжэ, өөһэдтөөл нүгэл хэбэбди. Эзэнһээ үршөөл хайра бидэндэ гуйгыт даа. Эзэн эдэ могойнуудаа бидэнһээ холодуулаг лэ! Моисей арад зондоо үршөөл хайра гуйжа, Эзэндэ һүгэдэн зальбарба.

⁸ Эзэн Моисейдэ иигэжэ айладаба: – Толотомо могой өөртөө бүтээгээд, тэрэнээ тугайнгаа эшэ дээрэ тодхо. Хэн нэгые могойн хадхабал, хадхуулагша тэрэ хүн һүр тэмдэг харахадаа, хосоронгүй, амиды үлэхэ.

⁹ Моисей зэдээр могой бүтээжэ, тугайнгаа эшэдэ тэрэнээ тодхобо. Могойдо хадхуулһан хүнүүд туг дээрэхи зэд могойе харахадаа, амиды үлэдэг болобо.

Моһааб тээшэ ошодог харгы

¹⁰ Израильшууд тэндэһээ гаража, Обоодто ошожо, майхан хүреэнүүдээ бариба.

¹¹ Тиигээд тэдэнэр Обоодһоо гаража, наранай мандадаг зүг тээшэ шэглэжэ, Моһаабай наанахи Ийээ-Абариимай губида тогтожо, майхан хүреэнүүдээ бариба.

¹² Тэдэнэр тэндэһээ гараад, Зээрэдэй гол газарта майхан хүреэнүүдээ бариба.

¹³ Тэдэнэр тэндэһээ гараад, Эмоорой губи дээгүүр урдан гарадаг, Моһааб Эмоор хоёрой хоорондохи хилэнь болодог Арноон мүрэнэй эрье дээрэ тогтожо, майхан хүреэнүүдээ бариба.

¹⁴ Тиимэһээ Эзэнэй байлдаанай ном соо иигэжэ хэлэгдэнэ: Супаадахи Ваһээб, Арнооной урасхал

¹⁵ болон хүнхэрнүүд, Шэбээт-Аар тээшэ зурын һунадаг хүнхэрнүүдэй дээрэхи хаданууд булта барандаа Моһаабай хилэнүүд.

¹⁶ Израильшууд тэрэ газараа орхижо, «Арад зоноо суглуула, Би шамда уһа үгэхэб» – гэжэ Эзэнэй Моисейдэ найдуулһан Бээр тээшэ ошобо.

¹⁷ Тиихэдэ израильшууд тэрэ худагые магтан, иигэжэ дуулаа һэн: Дүүрыш уһаар, худаг! Дуулагты энээндэ алдар соло!

¹⁸ Агууехэ хүнүүд энэ худаг малтаа! Арадай тайжанар энэ худаг малтаа! Тулгуур болон зузууртай һаднагуудаараа тайжанууд энэ худаг малтаа! Тэдэнэр тэрэ сүл губиһаа Матаннаа ошобо.

¹⁹ Тиигээд тэдэнэр Матаннааһаа гараад, Наһалиһээл, Наһалиһээлһээ Бамоот,

²⁰ Бамоотһоо Моһаабай нюруу хүрэтэр ошоод, үбэр талаараа сүл губи тээшэ хараһан Пиисгаа хадада хүрэбэ.

Сиһоон ба Оог

²¹ Израильшууд эмооршуудай хаан Сиһоондо элшэн сайдаа иигэжэ хэлэхыень эльгээбэ:

²² – Танай газараар бидэнэй гарахые зүбшөөгыт, бидэ хажуу тээшээ хадуурангүй, таряалангаартнай гарахагүйбди, таримал үзэм жэмэсэй сэсэрлигтэтнай орохогүйбди, худагуудһаатнай уһа уухагүйбди, хан түрынтнай гол харгыгаар ябажа, харьяата газарайтнай хилэ гаталхабди.

²³ Теэд хаан Сиһоон газар нютагаарнь гаталуулха зүбшөөл израильшуудта үгэнгүй, бүхы байһан сэрэгшэдээ суглуулаад, сүл губи руу ябуулжа, Яаһац шадар тэдээнтэй дайлалдаба.

²⁴ Израильшууд хаанииень һэлмээрээ сабшажа алаад, Арноон мүрэнһөө Яббоок мүрэн хүрэтэрхи эмооршуудай бүхы газар дайдыень эзэмдээд, һайнаар бүхэлэгдэһэн хотонуудтай аммоонуудай хилэдэ хүрэбэ.

²⁵ Израильшууд эмооршуудай Хэшбоон хотые, тэрэниие тойроод байһан бүхы нютагуудые эзэмдэжэ, тэндэнь ажаһуужа эхилбэ.

²⁶ Тиихэдэ Хэшбоон эмооршуудай Сиһоон хаанай ниислэл хотонь байгаа. Урда тээнь Моһаабай хаантай дайлалдажа, Сиһоон тэрэнэй Арноон хүрэтэрхи бүхы газар дайдыень эзэмдэһэн байба.

²⁷ Тиимэһээ тэрэ сагай үльгэршэд түүрээн, иигэжэ дууладаг байгаа: Хэшбоон хото руу ошогты! Сиһооной хото шэнээр баригдажа, бата бэхи болог лэ!

²⁸ Нэгэтэ Сиһооной сэрэг гал дүлэн мэтээр Хэшбоонһоо гараад, тэдэнэр Моһаабай Аар хотые һандаргаад, Арнооной эхинэй болон адагайнь гүбээнүүдые эзэмдээл.

²⁹ Таанадта, Моһаабай хүнүүдтэ, тодхор болохо! Таанад, Хэмоошто шүтэгшэд, хосорхот! Таанадай бурхан эрэшүүлыетнай зугадалганда, таанадай басагадые эмооршуудай хаанай мэдэлдэ үгөөл.

³⁰ Мэдэбаагай хажуудахи, мүн Хэшбоонһоо Дибоон хүрэтэрхи, насимһаа Ноопаа хүрэтэрхи бүхы зайда ажаһуудаг танай үри һадаһад мүнөө бута сохигдоол.

³¹ Израильшууд эмооршуудай газар дээрэ хотон хүреэнүүдээ бариба.

³² Моисей тагнуул хэхыень хэдэн хүниие Язээр хото эльгээбэ. Израильшууд тэрэ хото, мүн тэрэниие тойроод байһан багахан хотонуудые эзэмдэн абаад, тэндэ байһан эмооршуудые намнан үлдэбэ.

Оогые илаһан тухай

³³ Тиигээд израильшууд һөөргөө хотиржо, Башаан тээшэ дабшаба. Башаанай хаан Оог бүхы сэрэгээ дахуулан, Эдрей хотын шадар тэдэнтэй тулалдахаяа урдаһаань гараба.

³⁴ Эзэн Моисейдэ иигэжэ айладаба: – Тэрээнһээ ши бү ай. Ушар юуб гэхэдэ, Би тэрэниие, сэрэгшэдыень, тэрэнэй бүхы газар дайдые шинии гарта үгэхэб. Хэшбоондо ажаһууһан Эмоорой Сиһоон хааниие яагаад ши диилээ һэмши, тэрээндээл тон адляар тэрэниие диилэхэш.

³⁵ Израильшууд Оогые, хүбүүдыень, тэрэнэй бүхы зониие, нэгэшье хүниие амиды мэндэ үлөөнгүй усадхаа бэлэй. Һүүлдэнь бүхы газар дайдыень эзэмдэн абаба.