Тоололго 20 - Библи

Мириамай наһа баралга

¹ Нэгэдэхи һарада израильшууд Циин губида ерэжэ, Кадээшдэ тогтобо. Тэндэ Мириам наһа бараба. Тэрэниие тэндэнь хүдөөлүүлбэ.

Моисейн алдуу

² Ууха уһанай байхагүйдэ, улад зон Моисей Аһароон хоёрой урдаһаа үгэсэлдэжэ,

³ иигэжэ Моисейдэ гэмэр гутар болобо: – Бидэнэй аха дүүнэрэй Бурханай урда наһа барагшадал бидэнэр булта үхэхэеэ яагаабибди?!

⁴ Юундэ бидэниие дахуулжа, эзэгүй хооһон губида асараабта? Али бидэниие үхэр малтаймнай хамта алаха гэжэ эндэ асараа гүт?!

⁵ Бидэниие юундэ Египедһээ гаргажа, энэ муу газарта асараабта? Балгаха уһагүй энэ газарта инжир, уһан үзэм, анар модод, таряа талхан огто ургахагүйл!

⁶ Моисей Аһароон хоёр арад зонһоо холодожо, майхан һүмын үүдэндэ ошоод, нюураараа газар дэрлэн унажа, Эзэндэ һүгэдэн зальбарба. Эзэнэй һаруул гэрэл бии болобо.

⁷ Эзэн Моисейдэ иигэжэ айладаба:

⁸ – Дулдыгаа абаарай, тиигээд Аһароон ахатаяа хамта арад зоноо суглуулаад, шулуун байсада дүтэлэ. Арад зоной хараһаар байтар дулдыгаараа шулуун байса тоншо. Шулуун байсаһаа уһанай урдахадань, ши арад зоноо үхэр малтайнь хамта ундалуулхаш.

⁹ Эзэнэй захиралтаар Моисей Тэрэнэй урда табяатай дулды абаба.

¹⁰ Моисей Аһароон хоёр арад зониие шулуун байсын дэргэдэ суглуулба. Моисей тэдээндэ иигэжэ хэлэбэ: – Таанад саг үргэлжэ гэмэр гутар гэлдэнэт. Тиимэһээ анхаран бидэниие шагнагты! Дулдыгаар энэ байса тоншожо, таанадай ууха уһа эндэһээ гаргахамнай бэшэ аал?!

¹¹ Моисей гараа үргэжэ, тэрэ дулдыгаар байсын шулууе хоёр дахин тоншобо. Тэрэ шулуунһаа уһанай ехээр урдахада, тэндэ байһан хүнүүд болон үхэр мал уһа уужа, ундаа харяабад.

¹² Эзэн Моисей Аһароон хоёрто иигэжэ айладаба: – Таанад Намайе хүндэлэнгүй, бүхы израильшуудтаа Минии арюун нангиниие харуулаагүйт, Намда этигэжэ ябадагаа гэршэлээгүйт. Энэ арадта найдуулагша газараа Би үгэхэб. Теэд таанад түрэл арадаа дахуулжа, тэрэ газартамни орохогүйт!

¹³ Тэрэ газар Мэрибаагай уһан гэжэ нэрэтэй болобо. Тэрэ газарта израильшууд уһанай түлөө гэмэрэлдэн, Эзэнтэй арсалдаа үүсхээ. Тиихэдэнь Эзэн Өөрынгөө нангиниие тэдээндэ эндэ харуулаа бшуу.

Эдоомой хаан гараха зам Израильда үгэбэгүй

¹⁴ Моисей Кадээшдэ ерээд, Эдоомой хаанда иигэжэ хэлэхыень хэдэн хүнүүдые эльгээбэ: – Танай аха дүү болохо израильшууд танда хандана. Та бидэнэй зобоһон бүхы зоболонгуудые мэдэнэт.

¹⁵ Үнгэрһэн олон жэлнүүдэй саана үбгэ эсэгэнэрэйнгээ Египедтэ ошоходонь, үни удаан тэндэ бидэнэр ажаһуужа, египет арадта харшалуулаабди.

¹⁶ Бидэ Эзэнһээ туһа эреэбди. Бидэнэй гуйлтые Эзэн дуулаад, бидэндэ туһалхыень Эльгээмэлээ эльгээгээ, бидэниие Тэрэ Египедһээ гаргаа. Бидэнэр эндэ, Кадээштэ, ерээд, танай газарай хилэ дээрэ тогтоод байнабди.

¹⁷ Танай газар дээгүүр бидэнэй ошохые бидэндэ зүбшөөгыт. Танай таряалан дээгүүр, үзэмэй сэсэрлиг соогууртнай ошохогүйбди, танай худагуудһаа уһа уухагүйбди. Танай орон нютаг үнгэртэрөө зүүлжээшье, баруулжаашье хадуурхагүйбди. Танай хан түрын гол харгыгаар ошохобди.

¹⁸ Теэд эдоом зон тэрээндэ: – Харьяата манай газар дээгүүр гарахагүйт. Хэрбэеэ таанадай ошохо гээ һаа, хатуу тулалдаанда һэлмэеэ барин гарахабди, – гэжэ хэлэбэ.

¹⁹ Израильшууд тэдээндэ: – Танай дардам харгыгаар ошохо гэнэбди. Танай худагһаа манай үхэр малай уһалаа, өөһэдөө бидэ уугаа һаа, таанадта бидэ түлбэри түлэхэбди. Танай газарые хүлөөрөө гаталжа гараха һанаатайбди, маанадта бэшэ юуншье хэрэггүйл, – гэжэ хэлээ бэлэй.

²⁰ Эдоомой хаан дахяад тэдээндэ иигэжэ харюусаба: – Орон нютагайнгаа газар дээгүүр гараха зүбшөөл бидэ таанадта үгэнэгүйбди. Эдоом хүсэтэй олон сэрэгшэдээ хүл дээрэнь суглуулжа, тулалдан байлдахыень израильшуудай урдаһаа эльгээбэ.

²¹ Тиигэжэ Эдоомой хаан орон нютагайнгаа газар дээгүүр израильшуудай гарахыень буруушааба. Тиихэдэнь израильшууд тэдэнэй газарые тойроод ошохо баатай болобо.

Аһарооной наһа баралга

²² Израильшууд Кадээшһээ гараад, Һоор хадада хүрэбэ.

²³ Эдоомой хилын хажуудахи Һоор хадада Эзэн Моисей Аһароон хоёрто иигэжэ айладаба:

²⁴ – Аһароон элинсэг хулинсагтаа ниилэг. Израильшуудта Минии найдуулһан тэрэ газарта Аһароон орохогүй. Мэрибаагай уһанай дэргэдэ айладагша Минии зарлигые та хоюулан дүүргэбэгүйт.

²⁵ Моисей, ши Аһароониие, тэрэнэй хүбүүн Эльазаарые абаад, Һоор хада дээрэ гарга.

²⁶ Аһарооной санаарта хубсаһа тайлаад, тэрэнэй хүбүүн Эльазаарта тэрэ хубсаһые үмдэхүүлэ. Тэндэ Аһароон наһа бараха.

²⁷ Моисей Эзэнэй зарлигые дүүргэжэ, бүхы израильшуудай хараһаар байтар Аһароон ба Эльазаартай хамта Һоор хадын оройдо гараба.

²⁸ Моисей Аһароонһоо санаартынь хубсаһа тайлаад, тэрэнэй хүбүүн Эльазаарта үмдэхүүлбэ. Тэндэ, хадын оройдо Аһароон наһа бараба. Моисей Эльазаар хоёр тэрэ хадаһаа буубад.

²⁹ Аһароон наһа бараа гэжэ израильшууд мэдэбэд. Тиигээд тэдэнэр Аһароониие шаналжа, гушан үдэр соо уйлалдан гашуудабад.