Тоололго 15 - Библи

Үргэл тухай хуулинууд

¹ Эзэн Моисейдэ иигэжэ айладаба: –

² Израильшуудта соносхон, тэдээндэ иигэжэ хэлэ: Таанадта Би газар үгэнэб. Тэрэ газар таанадай орон нютаг болохо. Тэрэ газарта хүрэжэ ошомсоороо,

³ Эзэндэ нангин үргэлнүүдые үргэхэт. Тэдэнэйтнай аятай һайхан хэншүү Эзэндэ һайшаагдаха. Түгэс шатаалта, Тангариг үргэлгын, Амгалан байдалай, Нангин һайндэрнүүдэй үргэлнүүдтэ таанад өөһэдынгөө буха, хуса, тэхэнүүдые асарагты.

⁴ Эзэндэ үргэл үргэхэдөө, тэрэ үргэлдөө нэмэлтэ болгожо, дүрбэнэй нэгэ хуби гиинэ оливын тоһотой холиһон эфаагай арбанай нэгэ хуби шэниисын гурил асарагты.

⁵ Түгэс шатаалта үргэлэй хурьган хуса бүхэнэй тоогоор дүрбэнэй нэгэ хуби гиинэ үзэмэй дараһан архи үргэлдэ гэжэ асарагты.

⁶ Хэрбэеэ хуса үргэл үргэхэ гээ һаа, эфаагай арбанай хоёр хуби шэниисын гурил гурбанай нэгэ хуби гиинэ оливын тоһонтой холёод асаралсагты.

⁷ Эзэндэ баһал һайшаагдадаг, аятай һайхан хэншүү үнэр гарадаг үзэмэй дараһан архи асарагты.

⁸ Хэрбэеэ түгэс шатаалта үргэлдэ гү, амгалан байдал тогтоолгондо гү, Эзэндэ тангариглалганда гү эмнигдээгүй залуу тугал үргэхэ гэбэл,

⁹ тэрэ тугал үргэлтэеэ суг хамта талханай зүйлһөө иимэ юумэ: хахад гиинэ оливын тоһонтой холиһон эфаагай арбанай гурбан хуби шэниисын гурил,

¹⁰ хахад гиинэ үзэмэй дараһан архи асаралса. Энэ хадаа гал дүгжээжэ Эзэндэ зорюулһан һайхан хэншүү үргэл болоно.

¹¹ Эзэндэ үргэл үргэхэ бүхэндөө эмнигдээгүй тугал, хони хурьга, эшэгэ асардаг байгты.

¹² Үргэлдэ иимэ мал асарха бүхэндөө үргэлсэхэ иимэ нэмэлтэ юумэнүүдые асардаг байгты.

¹³ Эзэндэ үргэл үргэхэдөө, тэрээндэ таатай хэншүү ууюулхадаа, орон нютагай үндэһэн арадай хүн бүхэн энээниие сахиха ёһотой.

¹⁴ Таанадай дунда ажаһуудаг хари зон ба ерээдүй сагта уг удамайтнай дунда ажаһуулсаха ерүүл зон таанадтал адляар Эзэндэ һайхан хэншүү уталгата үргэл үргэхэ ёһотой.

¹⁵ Энэ хуули, гурим сахилга Эзэнэй арадшье, ерүүл зоншье хэтын хэтэдэ сахиха ёһотой. Эзэндэ шүтэдэг таанадта, эндэхи ерүүл зондошье Энэ хуули үеһөө үедэ мүнхэ байг!

¹⁶ Таанадта, израильшуудта, танай дунда ажаһуудаг ерүүл зондо адли хуули, адли гурим байха мүн.

¹⁷ Эзэн Моисейдэ үшөө иигэжэ айладаба:

¹⁸ – Израильшуудта иигэжэ хэлэ: Минии абаашажа ябаһан тэрэ орон нютагта ерэхэдээ,

¹⁹ тэрэ газарта ургуулһан ургаса таряанһаа түрүүшын хилээмэ барижа болгоходоо, тэрээнһээ Эзэндэ үргэл үргэгты.

²⁰ Таряагаа суглуулан хуряажа, тэрэнээ тээрмэдэжэ гурил болгоод, хилээмэ баряад, шэнэ ургасын дээжые Эзэндэ үргэгты. Энэтнай таряалангайтнай дээжэһээ үргэл болоно.

²¹ Эзэндэ ургасынгаа дээжэ үргэдэг энэ ёһо заншалые уг удамтнай саашадаашье сахин байгуужан.

Зорюута бэшэ эндүүрэн үйлэдэһэн нүгэлнүүдэй түлөө үргэлнүүд тухай

²² Эзэнэй Моисейгээр дамжуулһан эдэ бүхы зарлиг заабаринуудые эндүүржэ гү, али мартажа сахяагүй һаа, таанад юу хэхэ, яаха байнат?

²³ Эзэнэй Моисейгээр дамжуулһан, энэ үдэрһөө эхилжэ, үеын үедэ сахигты гэһэн эдэ зарлиг заабаринуудые дүүргэнгүй,

²⁴ гэнэ боложо ниитэ бүлгэмэй гэнтэ алдуу эндүү гаргабал, ниитэ бүлгэм бүхыдөө нэгэ буруун бухые түгэс шатаалта үргэл болгон, Эзэндэ һайшаагдадаг хэншүү гаргаха, эһээбэригүй хилээмэн үргэлтэйгөөр, үзэмэй дараһан архитайгаар, нүгэл сагааруулгын үргэлдэ жэлтэй нэгэ тэхэтэйгээр асараг.

²⁵ Арад зоноо арюудхахын тула албата ажалаа санаарта хэг. Хүнүүд мэдэнгүй нүгэл хээд, хэһэн тэрэ нүгэлөө мэдэржэ, нүгэл сагааруулгын үргэлдэ, түгэс шатаалта үргэлдэ Эзэндэ үргэл-бэлэг асараг.

²⁶ Тиихэдэнь бүхы израильшууд, тэдээнтэй суг хамта ажаһуудаг ерүүл зон мэдэнгүй хэһэн нүгэлһөө мэнэ арюудхан сэбэрлэгдэхэ.

²⁷ Алдууржа хэн нэгэн нүгэл хэбэл, жэлтэй эмэ эшэгэ нүгэл сагааруулгын үргэлдэ асараг.

²⁸ Тэрэнэй нүгэл арюудхахын тула санаарта Эзэнэй урда тахил мүргэл хэг. Тиихэдэнь тэрэ хүн эндүү алдуугаа мэдэржэ, нүгэлһөө арюудхан сэбэрлэгдэхэ.

²⁹ Энэ хадаа израильшуудай үндэһэн зондо, хамта тэдэнтэй ажаһуудаг ерүүл хүнүүдтэ эндүүржэ хэһэн нүгэлһөөнь арюудхалгын нэгэн адли хуули мүн.

³⁰ Хэрбэеэ нютагай зоной нэгэн гү, али хариһаа нүүжэ ерүүл зоной нэгэн зорюута Хуулида харша ябадал хээ һаа, хооһон сүл губи руу сүлэгдэхэ гү, али хюдан усадхагдаха ёһотой.

³¹ Эзэнэй үгэ дууладаггүй, захяа заабаринуудыень эбдэдэг али нэгэ хүн арадайнгаа дундаһаа сүлүүлхэ ёһотой. Зэмэтэ ябадалайнгаа түлөө тэрэ өөрөөл харюусаха.

Амаралтын үдэр ажаллаһан хүн тухай

³² Израильшууд сүл губида байхадаа, субботын үдэр нэгэ хүнэй галаа түлихэ түлеэ суглуулжа ябахые хараад,

³³ тэрэниие Моисей Аһароон хоёрто болон арад зоной урда асарбад.

³⁴ Тиигээд тэдэнэр гэмтэ ябадал хэһэнэйнь түлөө яажа тэрэниие хэһээхэеэ ойлгожо ядаад, хаалтада хааба.

³⁵ Тиихэдэнь Эзэн Моисейдэ иигэжэ айладаба: – Энэ хүн үхэхэ ёһотой. Энэ хүниие хотон хүреэнэй газаа гаргаад, шулуугаар шэдэжэ алагты!

³⁶ Арад зон тэрэниие хотон хүреэнэй газаа гаргаад, Моисейдэ айладаһан Эзэнэй зарлигаар тэрэ хүниие шулуудажа алаба.

Эзэн арад зоной хуули һаналганда туһалба

³⁷ Эзэн Моисейдэ иигэжэ айладаба:

³⁸ – Хэлэжэ соносхо израильшуудта: Хэдэн һабагша томожо, хамтадхан тэдэнээ гүрэгты. Хамтадхан гүрэһэн тэдэ сасагуудтаа хүхэ нооһон утаһа нэмэжэ, хубсаһанайнгаа хормой доро шэдэжэ, үеһөө үедэ тэдэнээ зүүжэ ябагты.

³⁹ Тэдэ сасагуудаа хараха бүхэндөө таанадта Эзэнэй захиһан һургаал заабаринууд һанагдажа, тэдэнииень ходол сахижа, зальхайралгаһаа холуур ябагты.

⁴⁰ Бүхы һургаал заабаринуудыемни һанажа, сахижа ябаа һаа, Бурханайнгаа урда арюун байхат.

⁴¹ Би Эзэмби! Би таанадай Бурхамби! Таанадай Бурхан болохын тула Би таанарые Египедһээ гаргааб! Би бол Эзэн! Би таанадай Бурхамби!