Тоололго 13 - Библи

Тагнуулшадые Ханаһаан руу эльгээбэ

¹ Израильшууд аян замаа үргэлжэлүүлхэеэ Хацэроодһоо гараад, Параанай сүл губида ерээд тогтобо.

² Эзэн Моисейдэ иигэжэ айладаба:

³ – Ханаһаанай газар дайдые тагнан шэнжэлхын тула хэдэн хүниие тиишэнь эльгээ. Би тэрэ газарые израильшуудта үгэнэб. Арбан хоёр обогһоо нэгэ нэгэ ударидагшые тагнан шэнжэлхыень эльгээ.

⁴ Моисей Эзэнэй зарлиг дүүргэжэ, арбан хоёр обогһоо нэгэ нэгэ ударидагшые тагнан шэнжэлхыень Параанай сүл губиһаа эльгээбэ.

^5-16 Тэдэнэй нэрэнүүд иимэ: Обогууд Ударидагшадай нэрэнүүд Рэүбээнэй Заххуурай хүбүүн Шаммууһа, Симеоной Хориин хүбүүн Шапаат, Иудын Епуннээгэй хүбүүн Халээб, Иссахаарай Иосифой хүбүүн Игаал, Эпрааимай Нүүнэй хүбүүн Һошээ, Бэньямиинэй Рапуугай хүбүүн Палтии, Зэбүлүүнэй Содиин хүбүүн Гаддиил, Иосифой болон Мэнашшээгэй Сусиин хүбүүн Гаддий, Даанай Гэмаллиин хүбүүн Аммиһээл, Ашээрэй Михаээлэй хүбүүн Сэтүүр, Напталиигай Бопсиин хүбүүн Нахбий, Гаадай Махиин хүбүүн Гэуһээл.

Обогууд Ударидагшадай нэрэнүүд

¹⁷ Эдэ бүгэдэ Моисейн эльгээһэн газар шэнжэлхэ зон. Моисей Нүүнэй хүбүүн Һошээ гэгшые Иисүүс гэжэ нэрлэбэ.

¹⁸ Моисей тэдэниие Ханаһаанай газар тагнан шэнжэлхыень эльгээхэдээ тэдээндэ иигэжэ хэлээ: – Урда зүгэй орон нютагаар гаража, уула хадын оройдо гарагты.

¹⁹ Харагты тэндэһээ ямар газар бэ гэжэ. Ханаһаанай дайда дээрэ ажаһуудаг арадые хүсэтэй гү, али хүсэгүй гү, хэмгүй олон гү, али үсөөн гү гэжэ хаража тэндэһээ мэдэгты.

²⁰ Тэдэнэй ажаһуудаг газар тунга ногоотой гү, али үгы гү, тэдэнэй ажаһуудаг хотонууд хэрэм ханатай гү, али үгы гү гэжэ хаража тэндэһээ мэдэгты.

²¹ Үрэжэлтэй гү, али үгы гү гэжэ газарайнь хүрьһые, үзэм жэмэстэй гү, али үгы гү гэжэ үндэрһөө хаража мэдэгты. Зоригтой байгты, тэндэхи газарай үзэм жэмэс асарагты. Эгээл энэ үедэ уһан үзэмэй эдеэшэдэг, түрүүшын ургасануудые суглуулдаг саг байба.

²² Тэдэ ошожо, Циин губиһаа эхилээд, Лэбоо-Хамаат руу ябаха харгыда оршодог Рэһооб хүрэтэрхи газар шэнжэлэн тагнаба.

²³ Тэдэнэр Нээгэб үнгэрөөд, Хэброон хото ерэбэ. Анаагай үринэр болохо Ахимаан, Шэшай, Талмай гэжэ нэрэтэй хүбүүд тэндэ ажаһуудаг байгаа. Хэброон хадаа Египедэй Цооһан хотоһоо долоон жэл урид баригдаһан юм.

²⁴ Тэдэнэр Эшхоол нугада ерэжэ, уһан үзэмэй эшын баглаа һалаае отолжо абаад, тэрэ баглаа һалаагаа һургаагта уяад, хоёр хүн тэлэн үргэлөөд ябаба. Тиихэдээ тэдэнэр анар болон инжир модонуудай жэмэсүүдые абабад.

²⁵ Израильшууд уһан үзэмэй модоной эшын баглаа һалаае отолһон газараа «Эшхоол нуга» гэжэ нэрлэбэ.

²⁶ Тэдэ дүшэн үдэр соо тэндэхи орон нютаг шэнжэлэн шалгаад, һөөргөө бусаба.

²⁷ Тэдэ Параанай сүл губидахи Кадээшэй хажууда байһан хотон хүреэнүүдтэ бусажа, Моисейдэ, Аһароондо болон түрэл арадтаа хараһан-үзэһэнөө бултыень хөөрэжэ, тэндэхи газарһаа асарһан үзэм жэмэсээ улад зондоо харуулба.

²⁸ Тиигээд тэдэнэр Моисейдэ иигэжэ хэлэбэ: – Бидэ эльгээһэн газартатнай ошообди. Бүхы эдеэ хоолоор элбэг дэлбэг орон нютаг байна. Тэрэ газарай дээжэнь энэ мүн.

²⁹ Харин тэрэ газар дээрэ ажаһуудаг арад зон хүсэтэй. Хотонуудынь бата бэхи хэрэмтэй, угаа ехэнүүд. Хараабди тэндэ Анаагай үринэрые!

³⁰ Амалээгүүд Нээгэбта ажаһууна. Хадалиг газарта хээдүүд, евүүсүүд, эмооршууд ажаһууна. Ханаһаанууд далай шадар, Иордан мүрэнэй эрьеэр ажаһууна.

³¹ Халээб Моисейе тойроод шууялдажа байһан зониие замхаагаад: – Тэндэ ошоёбди. Тэрэ газар эзэмдэебди. Заабол энээниие хэжэ шадахабди, – гэжэ хэлэбэ.

³² Харин тэрээнтэй суг хамта ошолсоод ерэһэн зон иигэжэ арсабад: – Бидэ тэрэ арадтай тулалдажа шадахагүйбди. Бидэнһээ тэдэнэр һураггүй хүсэтэйл!

³³ Тагнаад ерэгшэ орон нютаг тухай муу һураг израильшуудай дунда тэдэ тараажа эхилбэ: – Манай шэнжэлэн шалгажа ерэһэн тэрэ орон нютаг хадаа тэрээн дээрэ ажаһуухаяа зүрхэлэгшэ хүн бүхэниие залгиха. Тэндэхи зон бултадаа үндэр гэгшын бэетэй гэжэ хараабди.

³⁴ Тэндэ асари томо бэетэйшүүлые үзөөбди. Тэдэнэр Анаагай үри һадаһад байшоол. Таршаанууд мэтэбди гэжэ хажуудань тэрэ дары өөһэдыгөө ойлгообди. Тон зүб даа, тэдэ маанад руу таршаа хаража байһандал хараал!