Тоололго 10 - Библи

Мүнгэн бүреэнүүд

¹ Эзэн Моисейдэ иигэжэ айладаба:

² – Ши өөртөө хоёр мүнгэн бүреэ хэбтэ шудхан хүүлэ. Тэдэш улад зоноо ерүүлхэдэшни, хотон хүреэнүүдээ хуряажа, аянда гарахадашни туһалха.

³ Хоёр бүреэгээрээ утаар татан үлеэхэдэшни, майхан һүмын үүдэндэ ниитэ бүхы уладшни сугларха.

⁴ Нэгэ бүреэгээ утаар үлеэхэдэшни, Израилиин арбан хоёр обогой ударидагшад, мянгатын дарганар шамда ерэхэ.

⁵ Бүреэгээ таһалдуулан байжа түргэ түргөөр хэдэ дахин үлеэхэдээ аян замда гарая гэжэ зүүн зүгтэ оршоһон сэрэгтээ дохёо үгэнэш.

⁶ Бүреэнүүдээрээ таһалдуулан байжа, хоёрдохиёо түргэ түргөөр үлеэхэдээ, майхан һүмын үүдэнэй урда талада тогтон байрлаһан обог омогой хотон хүреэнүүд майхануудаа задалжа, холын харгыда гарагты гэһэн дохёо үгэнэш.

⁷ Хэрбэеэ арад зоноо суглуулха гэбэл, түргэ түргөөр бэшэ, харин утаар татажа бүреэнүүдээ үлеэ.

⁸ Санаарта Аһарооной уг удам бүреэ үлеэхэ ёһотой. Энэ хуули хэтын хэтэдэ таанадта болон таанадай уг гарбалнуудта үгтэнэ.

⁹ Өөрынгөө газар дээрэ дайсадтай тулалдахын урда тээ шангаар аад, түргэ түргөөр бүреэнүүдээ үлеэ. Тиихэдэшни Эзэн, шинии Бурхан, дохёоешни дуулаад, таанадые дайсадһаа абарха.

¹⁰ Суглаа зарлахадаа, мүн шэнэ һарын эхин үдэрнүүдтэ, һайндэрнүүдэй болоходонь, бүреэнүүдээ үлеэгты. Израильшуудай түгэс шатаалта ба амгалан байдалай үргэлнүүдые асархадань, бүреэнүүдээ үлеэгты. Энэ ёһолол Эзэндэ, шинии Бурханда, шам тухай һануулга болоно. Би шамда эдэниие бэелүүлхыешни захирнаб. Би Эзэн, шинии Бурхан гээшэб!

Израильшууд аян замда гараба

¹¹ Хоёрдохи жэлэй, хоёрдохи һарын хоридохи үдэр майхан һүмэһөө үүлэн дэгдэбэ.

¹² Тиихэдэнь израильшууд аян замаа үргэлжэлүүлхэеэ Синайн сүл губиһаа гараба. Үүлэн тамаран саашалжа, Параанай сүл губи дээрэ тогтобо.

¹³ Тиигэжэ тэдэнэр Эзэнэй Моисейдэ захирһые эхин түрүүшынхиеэ дүүргэжэ, аян замда гараа бэлэй.

¹⁴ Иудын хотон хүреэнэй туг үргэгдэжэ, тэдэнэй сэрэг тогтон байрлаһан газарһаа эгээн түрүүн хүдэлбэд. Иудын обогой хэдэн бүлэг сэрэгые Амминадаабай хүбүүн Нахшоон ударидажа, бүхы сэрэгэйнгээ урда ябаа.

¹⁵ Тэрэнэй хойноһоо Иссахаарай обогой хэдэн бүлэг сэрэгые Цуһаарай хүбүүн Нэтанээл ударидажа, бүхы сэрэгшэдэйнгээ урдань ябаа.

¹⁶ Тэрэнэй хойноһоо Хэлооной хүбүүн Элиаабай ударидалга доро Зэбүлүүнэй обогой хэдэн бүлэг сэрэгшэд ошобо.

¹⁷ Майхан һүмэ задалан хуряагдажа, Гэршооной болон Мэрариин үенүүдэй эрэшүүл тэрэнээ үргэлөөд, аян замда гарабад.

¹⁸ Тэдэнэй һүүлдэ Рэүбээнэй хотон хүреэнэй туг хиидхэн үргэгдэжэ, тэдэнэй хэдэн бүлэг сэрэг тогтон байрлаһан газарһаа гарабад. Тэдэниие Шэдэһүүрэй хүбүүн Элицүүр захиран ябаа.

¹⁹ Цуришаддайн хүбүүн Шэлүмиһээл Симеоной обогой сэрэгые ударидан, тэдэнэй хойноһоо ошобо.

²⁰ Дэүһээлэй хүбүүн Элиасаап Гаадай хэдэн бүлэг сэрэгые ударидан, тэдэнэй хойноһоо ябаба.

²¹ Тэдэнэй хойноһоо нангин шүтөөнөө үргэлһэн Кэһаадай обогойхид ошобо. Тэдэнэй ерэтэр нангин һүмэ баригдажа үрдихэ ёһотой байгаа.

²² Тэдэнэй һүүлээр Эпрааимай хотон хүреэнэй туг хиидхэн үргэгдэжэ, сэрэгынь тогтон байрлаһан газарһаа хүдэлбэ. Аммиһүүдэй хүбүүн Элишамаа тэдэ сэрэгые ударидан толгойлоо.

²³ Пэдэцүүрэй хүбүүн Гамалиһээл Мэнашшээгэй обогой бүлэг сэрэгые толгойлон ударидаба.

²⁴ Гидеоной хүбүүн Абидаан Бэньямиинэй бүлэг сэрэгые толгойлжо гараба.

²⁵ Бултанай һүүлдэ Даанай хотон хүреэнэй туг хиидхэн үргэгдэбэ. Аммишаддайн хүбүүн Ахиээзэр тэдэ бүлэг сэрэгые толгойлон ударидажа гараа.

²⁶ Тэдэнэй һүүлдэ Охраанай хүбүүн Пагиил Ашээрэй бүлэг сэрэгые толгойлбо.

²⁷ Энаанай хүбүүн Ахираа Напталиигай бүлэг сэрэгые толгойлжо, тэдэнэй хойноһоо ошобо.

²⁸ Тогтоһон газарһаа хүдэлэн гарахадаа, иимэ жагсаалаар израильшууд аян замда гараха ёһотой байгаа юм.

Моисей ба Хобааб

²⁹ Моисей мидиан үндэһэ яһанай болохо хадам эсэгэ Рэүһээлэй хүбүүн Хобаабта иигэжэ айладаба: – Бидэндэ үгэхэб гэжэ үбгэ эсэгэнэртэмнай үгэеэ үгэһэн Эзэнэй газар тээшэ бидэнэр ошожо ябанабди. Ши бидэнтэй ябалса, ушар юуб гэхэдэ, Эзэн израильшуудта олон һайн юумэ найдуулаа, шамдашье һайн юумэн хүртэхэ.

³⁰ Теэд Хобааб тэрээндэ иигэжэ хэлэбэ: – Би таанадтай ошохогүйб. Би өөрынгөө эхэ орондо, өөрынгөө арадта бусахамни.

³¹ Моисей тэрээндэ иигэжэ хэлэбэ: – Шамайе гуйнаб. Сүл губида тогтохо газар ши бидэнһээ һайнаар мэдэнэш. Ши бидэнэй харгышан болыш даа.

³² Хэрбэеэ бидэнтэй ошолсоо һааш, Эзэнэй бидэндэ үршөөн хүртөөһэн бүхы һайн юумэнүүдһээ шамда хубаалдахабди.

³³ Тэдэнэр аян замаа Эзэнэй хадаһаа эхилжэ, гурбан хоногой зайе гаталбад. Хотон хүреэнээ табин зохёохо газар оложо үгэхэ зорилготойгоор Эзэнтэй хэлсээ баталһан ханза урдань тээгдэн ябажа байгаа.

³⁴ Үдэртөө Эзэнэй үүлэн дээгүүрнь дэгдэжэ, тэдэ аян замда гарадаг байгаа.

³⁵ Тогтон байрлаһан газарһаа арад зонойнгоо аян замда гарахаяа түхеэржэ, ханза үргэхэдэнь, Моисей ходол иигэжэ хэлэдэг байгаа: – Бодыт, Эзэн! Дайсадтнай тараха болтогой! Таниие үзэн ядагшад Танһаа тэрьедэн арилха болтогой!

³⁶ Нангин ханзаяа тогтон байрлаһан газартаа тодхон табихадань, Моисей иигэжэ хэлэдэг байба: – Бусыт даа, Эзэн, түмэн сая израильшуудтаа!