Михей 7 - Библи

Израилиин урма зоригоо мохолго

¹ Ямар гасалантай гээшэбиб даа! Жэмэс түүжэ, үзэм хуряажа байһанай удаа нэгэшье жэмэс оложо эдиһэйб гэжэ бэдэрһэн, харин юушье олоогүй хүндэл адлиб!

² Бурханда үнэн сэхэ зон энэ газар дээрэ үгы болоо. Зоной дунда зүб шударга хүн байхагүй. Шуһа урасхуулхаяа хүн бүхэн худал хэрэглэнэ, аха дүүнэртээ урьха занга табина.

³ Муу муухай хэрэгүүдые хэхэдээ гарнуудынь һурамхи. Дарга эдилгэ абана, шүүгшэ хахуули абажа шүүбэри хэнэ. Хүндэтэй зон зоргоороо хэхэ юумэеэ хэжэ, хэрэг муудхаана.

⁴ Тэдэнэй эгээл эрхимынь болон зүб шударгань адаалхай һөөг мэтэ хэндэшье хэрэггүй. Лүндэншэдөөр дамжуулан һэргылһэн тэрэ үдэр – Эзэнэй заларан, арад зониие хэһээхэ үдэр болохонь. Тиимэһээ мүнөө тэдэ зон хүл алдан үймэжэ байна.

⁵ Дүтын хүндөө бү этигэгты, нүхэртөө бү найдагты. Һамга, үбгэндөөшье хэлэхэеэ тэбшэгты.

⁶ Хүбүүниинь эсэгэдээ тоомсоргүй хандана. Басаганиинь эхынгээ урдаһаа һөөргэдэнэ. Бэринь хадам эхынгээ урдаһаа бодоно. Нэгэ гэрэй гэшүүд хоорондоо харша дайсад байха.

⁷ Харин би намайе абардаг Эзэн Бурхандаа найдан байхаб. Бурхамни намайе дуулажа, абархал.

⁸ Минии дайсан, намһаа боложо бү баяса! Би хэды унаашье һаа, бодохоб. Харанхыда хэды байгаашье һаам, Эзэн минии гэрэл юм.

Бурханда Израилиин найдалга

⁹ Би Тэрэнэй урдаһаа нүгэл хэһэн тула хэрэгыем Тэрэнэй шиидхэтэр, намайе шүүтэрнь Эзэнэй уур хилэн тэсэн ябахаб. Тэрэ намайе гэрэлдэ гаргаха. Тиигээд би үнэн зүбыень хараха болоноб.

¹⁰ Дайсамни энээниие хараад, эшэн улайха. «Эзэн Бурхантнай хаана гээшэб?» – гэжэ асуужа тэрэ байгаа бэлэйл. Гудамжануудаар гэшхэгдэдэг шабартал адляар тэрэнэй гэшхэгдэн, доромжолуулагдан байгаашые би харахаб.

¹¹ Иерусалимай улад зон, хотын ханануудые заһабарилха үдэр ерэхэнь. Энэ сагта танай хилэнүүд үргэдхэгдэхэ.

¹² Ассириһээ, Египедһээ, Вавилоонһоо улад зон энэ үдэр таанад руу ерэхэл.

¹³ Гэбэшье тэрэ газар дайда хадаа ажаһуугшадайнгаа нүгэл үйлэдэһэнэй түлөө эзэгүйрхэ, хооһорхо.

¹⁴ Өөрынгөө арад түмэниие дахуулан ябыт, Эзэн! Өөрын уг залгамжалгын хуби зониие хони харюулдаг мэтээр очирто баягаараа харюулан байгыт! Тэдэ зон ой модон соо амяараа ажаһууна, теэд эртэ урда сагтал адляар, тэдэ үрэжэлтэ Башаан болон Галаадта ажаһууг лэ!

¹⁵ Египедһээ гараад ябахадамнай харуулһан гайхамшагта үзэгдэлнүүдээ бидэндэ харуулыт, Эзэн!

¹⁶ Энээниие бусад арадууд хаража, ядуухан сэрэгтэй байһандаа эшэжэ, юушье хэлэхэ, дуулахаяа шадахагүй, зог татаха.

¹⁷ Тэдэ шорой тооһондо могой, нүхэ һүбэһөө газарай хорхой мэтэ мүлхин гараха, Эзэн Бурханһаамнай айн шэшэрэлдэхэ.

¹⁸ Тандал адли нэгэшье Бурхан байхагүй. Та Өөрынгөө уг залгамжалгын хубида – Өөрын арадһаа амиды мэндэ үлэһэн маанарта нүгэлыемнай хүлисэнэт. Та хэтэ мүнхэдөө уурлажа байдаггүйт, хайрлаха, энэрэл үзүүлхэ дуратайт.

¹⁹ Та дахин маанадаа хайрлахат, гэм зэмыемнай арюудхахат. Нүгэлыемнай далайн оёор руу хаяхат.

²⁰ Эртэ урда сагта манай элинсэг хулинсагта тангариглан найдуулһанаа бэелүүлжэ, Яковай болон Абраһаамай үри һадаһадта – Өөрын арад зондо Та үнэн сэхэеэ, үршөөл хайраяа бэлэглэхэт.