Михей 6 - Библи

Израильда Эзэнэй гомдол

¹ Арад түмэндөө Эзэнэй айладхаһые дуулыта! «Бодожо, хада уулануудай урда хэрэгээ мэдүүлыт! Толгойнууд дуу хоолойетнай шагнаг лэ!» – гэжэ Тэрэ тунхаглана.

² Хада ууланууд, дэлхэйн хатуу үндэһэ һуури, Эзэнэй зарга шүүбэри хэхые шагныта! Эзэн арад түмэнөө шүүбэрилнэ, Израильтай Тэрэ тэмсэжэ байна.

³ Эзэн иигэжэ айладхана: «Арад түмэмни! Би таанарта юу хээбиб, яажа зобоогообиб? Харюуса Намда!

⁴ Египедэй газар дайдаһаа, богоол байдалһаа шамайе абаран гаргаа һэм. Шамайе дахуулан ябахыень Моисей, Аһароон болон Мириамые эльгээгээ һэм.

⁵ Минии арад түмэн! Моһаабай хаан Балаагай юу хэхэеэ түсэблэжэ байһые, Бэһоорой хүбүүн Балаһаамай тэрээндэ юун гэжэ харюусаһые, Шиттиимһээ Гилгаал хүрэтэр юун боложо байһые һаныш даа. Минии зүб хэрэгүүдые ойлгохын тула эдэ бүгэдые һана!»

⁶ Огторгойн Эзэн Бурхандаа мүргэхэеэ ошоходоо, Би юу абаад ошохобиб? Түгэс шатаалта үргэл хэхэеэ нэгэ наһатай тугал абаад урдань ошохо гүб?

⁷ Теэд Эзэндэ хэдэн мянган хуса, гол мэтэ дууһашагүй оливын тоһо абаад ошоошье һаам, Тэрээндэ энэ һайшаагдаха гү? Нүгэлөө наманшалхаяа ууган хүбүүгээ үргэхэ гүб?

⁸ Үгы. Һайн хэрэг гээшэ юун бэ гэжэ Эзэн бидэндэ, зондо, иигэжэ айладхана: «Үнэн шударга байха, саг үргэлжэ дура хайраяа элирхэйлжэ байха, Бурханайнгаа үгэ дуулажал ябаха».

⁹ Эзэнһээ айха гээшэ сэсэн ухаан юм. Эзэн Иерусалимда иигэжэ хандана: «Хотын улад зон болон Иерусалимай хүтэлбэрилэгшэд, Намайе соносогты!

¹⁰ Хорон муу зоной гэрнүүдтэ буруу мүрөөр олоһон баялигынь байна. Минии үзэн ядадаг юумэ – худал хэмжүүрнүүдые тэдэ хэрэглэнэ.

¹¹ Худал хэмжүүртэй, мэхэшэ зониие яагаад Би хүлисэхэбиб?!

¹² Ушар юуб гэхэдэ, хотын баяшуул хүсэрхэл хаа-хаанагүй хэрэглэнэ, ажаһуугшадынь худал хэлэнэ.

¹³ Тиимэһээ Би һандарал, үгырэл асаран, шамайе, хото, нүгэлэйшни түлөө хэһээхэб.

¹⁴ Ши эдибэшье, садахагүйш, досоошни хооһон байха. Юумэ хадагалха гэжэ оролдобошье, хадагалжа шадахагүйш. Хадагалһан юумыеш һэлмээр сабшан үгы хэхэб!

¹⁵ Таряа тарибашье, хадахагүйш. Оливын тоһо даран гаргабашье, хэрэглэжэ шадахагүйш. Үзэмэй шүүһэ дарабашье, үзэмэй дараһан архи уухагүйш.

¹⁶ Омрии хаанай болон Ахаабай бүлынхидэй үйлэ жэшээ даган, зүблэлөөрнь ябанаш, тиимэһээ Би шамда гай һандарал ушаруулжа, ажаһуугшадыеш шоодбори болгохоб. Арад түмэнэйм жэгшүүритэй эшхэбтэр байдал таанад дээрэл бууха».