Михей 5 - Библи

Һайн мэдээсэл

¹ Сэрэгэй бүлэгүүдэй хото! Сэрэгээ суглуулан, дайлалдахада зохистойгоор таби! Дайсад бидэниие бүһэлөөл! Тэдэ Израилиин удамаршые хасар руунь һабаа модоор сохихо.

² «Эпраата гэдэг Бэтлэһээм, Иудын мянгаад һууринуудай эгээл бага һууринь ши гээшэш», – гэжэ Эзэн айладхана. Гэбэшье шинии улад зонһоо Эзэн нэгые шэлэжэ, бүхы Израилиин удамаршаар табиха. Тэрэ хүнэй угынь урдын урда сагһаа эшэ үндэһэтэй.

³ Зай, тэрэ удамаршын түрэтэр Эзэн Израилиие орхёод байха. Харин түрэхэдэнь, сүлэлгэдэ байгааша аха дүүнэрынь Израилиин улад зондоо бусаха.

⁴ Удамарша заларжа, Эзэнһээ абаһан хүсөөрөө болон Эзэн Бурханайнгаа нэрын һүр жабхалангаар арад түмэниие зонхилон байха. Тэрэнэй арад аюулгүй байдалда ажамидаран байха, юуб гэбэл, дэлхэйн бүхы арадууд агууехыень мэдэрэнхэй байха юм.

⁵ Амгалан тайбан байдал тогтохо. Ассириин сэрэгэй манай газар уһанда ерэжэ, манай хамгаалалтые гэшхэн гарахадань, бидэ урдаһаань тулахаар хэдэн шанга удамаршые эльгээхэбди.

⁶ Нимроодой газар Ассириие тэдэ һэлмын хүсөөр даран абаха. Ассириин сэрэгэй манай газар дайдада добтолон ороходо тэдэл маанадые абарха болоно.

⁷ Амиды мэндэ үлөөшэ Яковай үри һадаһад олон арадуудай дунда Эзэнһээ үршөөгдэһэн шүүдэр мэтэ байха. Ургамал ногоон дээрэ орохо бороо мэтэ тэдэ байхал. Тэдэ хүнһөө дулдыдахагүй, Бурханһаал дулдыдаха юм.

⁸ Арадуудай, үндэһэ яһатанай дунда байгааша Яковай үри һадаһад ой тайгын, талын ан амитадай дунда байгааша арсалан мэтэ, дэбһэжэ, уража байха, хэншье тэрээнһээ абаржа шадахагүй.

⁹ Израиль дайсадаа бүримүһэн усадхаха.

¹⁰ Эзэн иигэжэ айладана: «Тэрэ үдэр Би моридыеш, дайшалхы тэргэнүүдыеш усадхахаб.

¹¹ Газар дайдыншни хото һууринуудые үгы хэхэб, бүхы бүхэлэлтэнүүдыеш унагаан һандаргаахаб.

¹² Эльбэ жэльбэтэйшүүлые, үзэлшэ зурхайшадые шинии хажууһаа үгы хэхэб.

¹³ Хүрэг онгонуудыеш, мүргэдэг баханануудыеш хажууһаашни усадхахаб, тиихэдэм өөрынгөө хэһэн бүтээлнүүдтэ һүгэдэн мүргэхэеэ болихош.

¹⁴ Ашэраа бурханда мүргэдэг модон баханануудыеш үгы хэжэ, хотонуудыеш усадхахаб.

¹⁵ Минии үгэ дууладаггүй арадуудта уур хилэгнэн, үһөөгөө абахаб!»