Михей 4 - Библи

Израилиин амгалан тайбан ерээдүй

¹ Һүүлшын үдэрнүүдтэ иимэ юумэн болохо: Эзэнэй Һүмын оршодог хада бусад хадануудһаа эгээл үндэр болохо, толгойнуудһаа эгээл үндэрынь болон тодорхо. Арад түмэн тэрээн руу урдан хүүехэл.

² Тиигээд олон арадууд ошожо, иигэжэ хэлэхэ: «Эзэнэй хада руу, Яковай Бурханай Һүмэ тээшээ үгсэн ошоё. Юу хэхыемнай Бурхан һургаха, зааһан замаарнь ябахабди». Юуб гэбэл, Һургаал Сионһоо гараха, Эзэнэй үгэ – Иерусалимһаа.

³ Олон арадуудай хоорондохи арсалдаае Тэрэ болюулха, холын холо байдаг, хүсэ шадалтай үндэһэтэдые шүүбэрилхэ. Тэдэ һэлмэнүүдээ анзаһанай шүдэн болгон, жадануудаа хадуур болгон дабтаха. Үндэһэтэн нүгөө үндэһэтэнэй урдаһаа һэлмэ бэшэ далайхагүй, дайнай эрдэм шудалхаяа болихо.

⁴ Хүн бүхэн үзэмэй модоной гү, али инжирэй өөрын модон доро энхэ тайбан ажаһуужа, хэншье тэдэниие хүлгөөжэ байхагүй. Юуб гэбэл, Түмэн Сэрэгтэ Эзэн энээниие айладхаа мүн.

⁵ Арад бүхэн өөрын бурхадта мүргэдэг, харин бидэ өөрын Эзэн Бурхандаа хэтэ мүнхэдөө мүргэн, шүтэн ябахабди.

⁶ Эзэн иигэжэ айладхана: «Тэрэ үдэрэй болоходо, хэһээлтэ амасуулһан зониие – сүлэлгэдэ байгаашадые, эрэмдэг дохолон болоошодые – хамта суглуулхаб.

⁷ Тэрэ дохолон һалга, холуур тараагдаһан зониие хүсэтэй шанга арадай эхи табигшад болгохоб. Энэ сагһаа эхилэн, хэтэ мүнхэдөө Сион хада уулаһаа Би тэдэниие хааншалан зонхилон байхаб».

⁸ Хонишондол Эзэнэй арад зоноо адаглан харадаг газар – Иерусалимдахи Сион хада уула, ши дахин зонхилон-захиран байдаг болохош.

⁹ Иерусалим, юундэ иимэ шангаар хашхарнаш? Хаан шамда үгы юм аал? Зүблэгшэшни хайшаа үгы болооб? Түрэжэ байгаа эхэнэртэл, юундэ ши иигэжэ зобожо байнабши?

¹⁰ Иерусалимай арад зон, үхибүү түрэжэ байгаа эхэнэртэл үбдэжэ, зобожо байгты! Юуб гэхэдэ, мүнөө таанар хотоһоо гаргагдан, Вавилоон руу сүлэлгэдэ туугдахат. Теэд тэндэ абарагдахат, дайсадһаатнай Эзэн таанадые абарха.

¹¹ Харин мүнөө таанад руу добтолхоор олон арадууд сугларжа, «Иерусалимай бузарлагдаад байхыень харахамнай болтогой!» – гэжэ хэлэжэ байна.

¹² Теэд тэдэ Эзэнэй һанаа бодол мэдэнэгүй, таряанай тоог дээрэ боолтологдоһон таряа мэтээр Эзэнэй тэдэниие суглуулжа, юу түсэблэһыень ойлгоногүй.

¹³ Эзэн иигэжэ айладхана: «Иерусалимай арад зон, бодожо, дайсадаа бута сохигты! Би таанадые түмэр эбэртэй, гуулин туруутай буха мэтэ болгохоб! Эдэ арадуудые бута сохижо, үнэн зүб бэшээр олзолһон баялигуудыень Намда, бүхэдэлхэйн Эзэндэ, зорюулан үргэхэт».