Михей 3 - Библи

Зохихогүй удамаршад, лүндэншэд, санаартад

¹ Би иигэжэ хэлэбэб: Яковай гэр бүлын толгойлогшод, Израилиин удамаршад, шагныта! Зүб, бурууе таанар мэдэнэбди гэжэ һананат.

² Теэд таанар һайн юумэ үзэн ядадагта, муу муухайда дуратайт. Минии арад зоной арһа хуулажа, яһанһаань мяхыень һалгаанат.

³ Арадайм мяха эдижэ, арһыень хуулажа, яһыень эбдэн, бутаргаад, мяхыень хэршэн тогоон руу хэнэт.

⁴ Таанад Эзэнһээ туһа эрин хашхаралдахат, теэд Эзэн таанадые дуулахагүй, муу муухайе үйлэдэн байгаа сагтатнай Тэрэ таанарһаа буруу харан байха.

⁵ Эдилгэ үгэдэг зондо амгалан тайбаниие худал найдуулжа, эдилгэ үгэдэггүй зондо дайн дажар болохо гэжэ һүрдөөжэ байгааша худалша лүндэншэд арад зониием мэхэлнэ. Эзэн эдэ лүндэншэдтэ иигэжэ айладхана:

⁶ – Таанадта һүниин харанхы бууха, лүндэн табижа шадахагүйт, Таанадые шэб харанхы тойрохо, абарал буулгажа шадахагүйт. Лүндэншэд дээрэхи наран хорон орохо, тэдэнэй оршожо байһан үдэр бүрхэхэ.

⁷ Үзэлшэд эшэжэ эхилхэ, мэргэшэд аягүй байдалда орохо. Бурханһаа харюу абахагүй тэдэ бултадаа амаа хаажа эхилхэ.

⁸ Харин намда Эзэн хүсэ шадал болон һүр һүлдэ дүүрэн үршөөгөө. Тиимэһээ шударга ёһо, эрэ зоригтой би Яковай удамда гэм зэмэ үйлэдэһэн тухайнь, Израилиин улад зондо нүгэл тухайнь сэхэ хэлэхэб!

⁹ Израилиин удамаршад, Яковай гэр бүлын толгойлогшод, энээниие шагныта! Таанад шударга ёһые үзэн ядадаг, сэхэ юумэ гажаадагта.

¹⁰ Бурханай хото Иерусалимай үндэһэ һуури алалга-хюдалга дээрэ болон үнэн шударга бэшэ зүйл дээрэ табижа байнат.

¹¹ Бэлэг абажа, удамаршадынь сүүд үйлэдэнэ, түлбэри абажа, санаартадынь һургаал заана, мүнгэ абажа, лүндэншэдынь лүндэн табина. Тэдэ бүгэдэ «Эзэн бидэнтэй хамта! Гай тодхор бидэнтэй болохогүй!» гэлдэн, Эзэндэ түшэглэнэ.

¹² Тиимэһээ таанадһаа боложо, Сион таряалангай талмай мэтэ хахалагдаха, Иерусалим обоолоотой һандархай шулуун болохо, Һүмын мүнөө байгааша газар ой модоной ургадаг гүбээ болохо!