Михей 2 - Библи

Баяд ноёдые шүүмжэлгэ

¹ Орондоо хэбтээд, муу муухай юумэ түсэблэн байгаашад ямар жэгшүүритэйб! Үүрэй сайхада түсэблөөшэ юумэеэ тэдэ хэжэ эхилнэ, юуб гэбэл, энээниие хэхээр тэдэ хүсэтэй.

² Тэдэ таряаланда һанаашархабал, хүсэ хэрэглэн, буляажа абана, гэр байрада обтобол, саб байса абана, хүниие, гэр хогшолыень, уг залгамжалан дамжуулдаг зөөри зөөшыень хуряажа абана юм.

³ Тиимэһээ Эзэн иигэжэ айладхана: Анхарагты, Би таанадта нэгэ гай тодхор тохёолдуулха гэжэ байнаб. Тэрэ таанадай хүзүүн дээрэ тудаад, һалахаар бэшэ байха. Энэ муу сагта таанад бардам сэхээр ябажа шадахаяа болихот.

⁴ Тэрэ сагай ерэхэдэ, таанадтай тохёолдоһон ушарые гай тодхорой жэшээ болгон зон хөөрэлдэжэ, иимэ гашуудалтай дуу дуулахал: «Бидэ дууһан усадхагдаабди! Манай газар дайда урбагшадта үгтэбэл! Маанадта һөөргөө бусахаа болёол!»

⁵ Эзэнэй зарлаһан суглаанда байлсаха, газар дайда хубаарилгын жээрэб таталгын болоходо, татаха хүн танай талаһаа нэгэшье байхагүй.

⁶ Зон намда иигэжэ хэлэбэ: «Огтолон бү хөөрэ! Бидэ эшхэбтэр байдалда орохо дурагүйбди, тиимэһээ бү хөөрэ!»

⁷ Яковай үринэр! Таанарта хэлэгдээгүй юм һэн гү? Эзэн тэсэбэригүй гэжэ гү? Эдэ болбол Тэрэнэй үйлэ хэрэгүүд гү? Зүб шударгаар хэрэг эрхилэгшэдэ Тэрэ «Һайн» гэжэ айладанагүй юм гү?

⁸ Эзэн иигэжэ айладхана: Урдань Минии байгааша арад түмэн таанад дайсан мэтээр урдаһаам һөөргэдэн бодобот. Аажам тайбан үнгэржэ байгааша зоной, дайн дажарһаа бусажа байгшадай гадар, доторшье хубсаһыень буляажа абажа байнат.

⁹ Зохидхон гэрнүүдтэнь һанаашархан, арадайм эхэнэрнүүдые тэрэ гэрнүүдһээ үлдэжэ гарганат, Минии үреэлые үхи хүүгэдһээнь хэмэ мүнхэдөө буляан абанат.

¹⁰ Бодожо, эндэһээ ябагты. Энэ газарта амгалан тайбан таһалдаа. Таанадай хэһэн нүгэл энэ газарые аймшагтай һандаралда хүргөө.

¹¹ Һалхин мэтэ хүн, таанадай һанаае худалаар тэгшэлжэ, «үзэмэй дараһан архи тухай болон үшөө дахин үзэмэй дараһан архи тухай!» гэжэ хэлэжэ байгааша хүн һанаандатнай таараха байгаа.

¹² Би, Эзэн, Яковай уг удамые бултыень, амиды мэндэ үлөөшэ Израилиин улад зониие хамталан суглуулхаб гэжэ үгэеэ үгэнэб. Хонишон хонидоо хашаа руу оруулжа, суг болгодог. Тэрээндэл адли, Би арадаа хамтаруулхаб. Тиихэдэм тэдэ угаа олон болон шууяхал.

¹³ Би тэдэниие дахуулан, хана хэрэмүүдые хамха сохин гарахаб. Тэдэ бута сохин, хаалгануудаар гараад үнгэрхэ. Би, тэдэнэй хаан, урдань ябажа, дахуулан абаашахаб!