Михей 1 - Библи

¹ Ётаам, Ахааз болон Хэзэкияа гэгшэдэй Иудын хаашуул байха үе сагта Морээшэт хотын Михейдэ Эзэн айладхал буулгажа, Самари болон Иерусалим хотонууд тушаа үзэгдэл харуулһан байна.

Эзэн Израиль болон Иудые шүүн хэһээнэ

² Бүхы арадууд, шагныта! Дэлхэй дээрэ байгаашад, бултадаа анхарыт! Таанадай урдаһаа Эзэн гэршэ болохонь! Тэрэ огторгойдохи Өөрын нангин ордонһоо таанадые гэмнэхэнь!

³ Зай, иигэжэ Тэрэ һууриһаа хүдэлжэ, уруудан, дэлхэйн үндэр орьёлнуудта гэшхэхэнь.

⁴ Галһаа зулын тоһоной хайладагтал, хаданууд Тэрээн доро хайлахал. Эгсэ газарһаа унадаг уһандал, нюруу хүндынүүд үгы болохол.

⁵ Энэ бүгэдэ Яковай үринэрэй үгэ дууладаггүй, Израилиин зоной нүгэлтэй байһанһаа болохонь. Яковай үринэрэй үгэ дууладаггүйнь хэнһээ гараа болоно бэ? Самариһаал юм бэшэ гү?! Иудын газар дайдада обоонуудаар тахил үргэдэгынь хэнһээ үүсхэлэн гарааб? Иерусалимһаал ха юм!

⁶ Эзэн иигэжэ айладхаа: «Энээнэйнь түлөө Би Самариие задагай хээрэ газарта обоолоотой һандархай шулуун, уһан үзэм һуулгаха газар болгохоб. Нюруу газар руу шулууень адхахаб, һуурииень эли гаргахаб.

⁷ Бүхы шүтээнүүдынь тэһэ биса сохигдохо, янхан ябадалай ордоной түлбэри бэлэгүүд галда шатаагдаха. Бүхы хүрэгүүдынь Би хаясаанай болгохоб. Юу гэбэл, эдэ бүгэдые Самари янхан забхайралгын түлбэриһөө түлэн суглуулжа байгаа, дайсадынь янхан хэрэгтэ тэдэниие шэглүүлэг лэ».

Лүндэншын гомдол

⁸ Энээнһээ боложо, би гашуудахаб, сурхирса уйлахаб, хүл нюсэгэн, шараа нюсэгэн ябахаб, айһандаа сүүбэн шоно мэтэ улижа, айран тэмээн хяруул мэтэ хашхаран байхаб.

⁹ Самариин шархань эдэгэшэгүй, Иудадашье энэнь хүрөө, арад зоноймни ажаһуудаг Иерусалимай хаалганууд хүрэтэршье ерээ.

¹⁰ Гаадай улад зоной энээн тушаа мэдэхэгүйн тула шангаар бү хашхаралдагты! Бэт-Лэапраагай улад зон, угаа ехэ гай тодхорто дарагдан, шорой соо хүльбэрыт.

¹¹ Шапиирайхид, шараа нюсэгэн, эшхэбтэр юумэд ябаха замаараа ябыта! Цаһанаанайхид гаран ошожо шадахагүй. Бэт-Ээцэлынхидэй сурхирса уйлажа байха абяан дуулдажа, тэндэ хорохо арга байхагүй гээд таанад ойлгохот.

¹² Мароодой улад зон хэзээ һайн байдал тогтохоб гэжэ хүлеэжэ, тэсэжэ ядан бэеэ зангидана, юуб гэбэл, Эзэнһээ Иерусалимай хаалганууд руу гай тодхор буужа ерээл.

¹³ Лахиишдэ ажаһуугшад, дайшалхы тэргэнүүдтэ моридоо хүллэгты! Таанад Израилиин хэрэгүүдые даган, Иерусалимые нүгэлдэ оруулаат.

¹⁴ Мүнөө таанад Морээшэт-Гаат руу хахасалгын бэлэгүүдые эльгээхэт. Ахзиибэй хото һууринууд Израилиин хаашуулые мэхэлжэ, туһалхагүй.

¹⁵ Марэшаагай ажаһуугшад, Эзэн таанад руу эзэмдэгшэ нэгэниие асарха. Израилиин алдарта хаан Адуллаамай агы нүхэн руу ошожо, хоргодохо баатай болохол.

¹⁶ Иудын улад зон, баяр баясхалантнай болохо хүбүүд тухайгаа гашуудан үһөө тайрагты, хөөбэрлэжэ байгаа бүргэд мэтэ халзан өөһэдыгөө болгогты, юуб гэбэл, хүүгэдтнай таанадһаа таһаран, сүлэлгэ руу туугдаха.