Марк 3 - Библи

¹ Иисүүсэй дахинаа мүргэлэй гэртэ ошоходонь, тэндэ хатаһан гартай хүн байба.

² Баһа буруу юумэ хэһэнэйнь түлөө Иисүүсые зэмэлхэ һанаатайшуулшье байжа, үбшэн хүниие субботодо аргална аа гү гэжэ Тэрэниие ажаглан хаража байбад.

³ – Бодоод, хүн зоной урда гара! – гээд Иисүүс хатаһан гартай хүндэ хэлэбэ.

⁴ Тиигээд хүн зонһоо: – Субботодо бидэ һайн юумэ бүтээхэ ёһотой гүбди, али харата юумэ үйлэдэхэ гү? Хүнэй ами наһые абарха гү, али һүнөөхэ гү? – гэжэ һураа бэлэй. Тиигэхэдэнь хүн зон абяа аниргүй байгаа һэн.

⁵ Иисүүс тэдэниие сухалтайгаар хараад, зүрхэ сэдьхэлэйнь мохооршоһондо уйдан гашуудажа, үбшэн хүндэ хандан: – Гараа һарбай, – гэбэ. Үбшэн хүнэй гараа һарбайхадань, хатаһан гарынь эдэгэшэһэн байба.

⁶ Фарисейнүүд мүргэлэй гэрһээ гараад, дары Иродэй талынхидаар уулзажа, Иисүүсые яажа алаха тухайгаа зүбшэн хэлсэбэ.

Далайн хажууда олон зон сугларба

⁷ Иисүүсэй шабинартайгаа хамта далайн эрьедэ ошоходонь, Тэрэниие үй түмэн зон дахажа ябаа. Тэдэ зон Галилей, Иудей можонуудһаа,

⁸ Иерусалим хотоһоо, Идумейһээ, Иордан голой саада бэеһээ, Тиир, Сидоон хотонуудай оршон тойронһоо сугларһан байгаа. Тэдэнэр булта Иисүүсэй бүтээһэн хэрэгүүд тухайнь дуулаад, Тэрээндэ ерэбэ.

⁹ Иисүүс эдэ үй түмэн зондо шахуулжа, низа даруулшахагүйн тула онгосо бэлдээд байхыень шабинартаа захиба.

¹⁰ Тэрэнэй ехэ олон хүнүүдые эдэгээһэн хадань үбшэн хүнүүд Тэрээндэ гараараа хүрөөд абаха һанаатайгаар Тэрэнэй зүг руу түлхилсэжэ байгаа.

¹¹ Досоогоо ада шүдхэртэй хүнүүд Иисүүсые харахадаа, урдань һүгэдэн унаад: – Та Бурханай Хүбүүн мүн, – гэжэ хашхаралдадаг байгаа.

¹² Бурханай табисуурта байһыемни нэгэшье хүндэ бү мэдүүлэгты гэжэ Иисүүс ада шүдхэрнүүдтэ хатуугаар захирдаг һэн.

Иисүүс арбан хоёр элшэнэрээ шэлэжэ абаба

¹³ Иисүүс хэдэн шабинартайгаа хада өөдэ гараба.

¹⁴ Тэдэнэйнгээ дундаһаа Иисүүс арбан хоёрыень шэлэжэ абаад, элшэнэрээр томилоо бэлэй. Тэдэнь Иисүүстэй хамта ябалсахаһаа гадна Һайн Мэдээсэл дэлгэрүүлхэ уялгатай,

¹⁵ ада шүдхэрнүүдые үлдэхэ эрхэ засагтай байгаа.

¹⁶ Арбан хоёрой нэгэнь Симон байгаа, Иисүүс тэрэниие Пётр гэжэ нэрлээ.

¹⁷ Баһа Яков ба Иоанн гэдэг Зэбэдэйн хоёр хүбүүд байлсаа. Иисүүс тэдэ хоёрто тэнгэриин дуунай хүбүүд гэһэн удхатай «Боанэргээс» гэһэн нэрэ алдар үгэбэ.

¹⁸ Элшэнэрэй тоодо Андрей, Филипп, Варфоломей, Матвей, Фома, Алфейн Яков хүбүүн, Фаддей, Симон Кананит,

¹⁹ һүүлдэнь Иисүүстэ урбаһан Иуда Искариот байгаа.

Иисүүс ба ада шүдхэрнүүдэй ноён Бээлзэбүүл

²⁰ Иисүүсэй гэртээ ерэхэдэнь, баһал хүн зон олоороо сугларжа, Тэрэ шабинартаяа эдеэлхэшье забгүй болобо.

²¹ Тэрээн тухай Иисүүсэй түрэлхидынь дуулахадаа, ухааниинь муудаа гэжэ бодоод, Тэрэнээ хүсөөр асархаяа ошобо.

²² Иерусалим хотоһоо ерэһэн Хуули заадаг багшанар: – Энэ хүн Бээлзэбүүлэй, ада шүдхэрнүүдэй ноёной мэдэлдэ байна! Бээлзэбүүлэй аша туһаар ада шүдхэрнүүдыешье үлдэнэ! – гэжэ хэлсэбэ.

²³ Тиихэдэнь Иисүүс тэдэ багшанарые дуудаад, һургаалта үгэнүүдые хэлэбэ: – Бодоод үзыт, сатана яажа өөрыгөө үлдэхэ юм?

²⁴ Хубааралдаад, хоорондоо дайлалдажа байһан хаан орон удаан байнгүй бутарха.

²⁵ Хубааралдаад, хоорондоо арсалдажа байһан гэр бүлэ удаан байнгүй һалаха.

²⁶ Хэрбээ шолмосой хаан оронойхин хоорондоо хубааралдаад, хёморолдожо барисалдажа байбал, хаан орониинь удангүй хосорхо юм.

²⁷ Бар хүсэтэй хүнэй гэртэ ороод, түрүүн эзэнииень хүлижэ уяагүй һаа, хэншье эд зөөрииень тоножо шадахагүйл. Эзэнииень хүлиһэн хойноол гэр барааень дээрмэдэхэ бшуу.

²⁸ Хүнэй үйлэдэһэн нүгэл шэбэлнүүдэй, хэлэһэн харата үгэнүүдэй хэдышье ехэ хара нүгэлтэй байбалнь, Бурхан тэдэниие хүлисэхэ юм,

²⁹ харин Арюун Һүлдые муудхаһан хүниие Бурхан хэзээдэшье хүлисэхэгүй, нүгэл шэбэлынь тэрэ хүниие хэтэ заяандаа дахажа ябаха гэжэ таанадта үнэн зүбые хэлэнэб.

³⁰ Досоогоо ада шүдхэртэй байна гэжэ Хуули заадаг багшанарай хэлсэдэг хадань, Иисүүс иимэ юумэ хөөрэһэн ушартай юм.

Иисүүсэй эжы болон дүүнэрынь

³¹ Иисүүстэ Тэрэнэй эжы, дүүнэрынь ерэбэ. Тэдэнэр газаа байгаад, гэр руу хүниие эльгээбэ.

³² Иисүүсые тойроод һууһан олон зон: – Харагты даа, эжытнай, дүүнэртнай ерээд, Таниие хүлеэнэ, – гэлдэбэ.

³³ Тиигэхэдэнь Иисүүс: – Минии эжы хэн бэ? Минии аха дүүнэр хэд бэ? – гэжэ урдаһаань һураба.

³⁴ Тиигээд тойроод һууһан зониие шэртээд: – Эдэ Минии эжы, Минии аха дүүнэр гээшэ.

³⁵ Бурханай эрхэ хүсэлые дүүргэжэ байһан хүн бүхэн лэ Минии аха дүүнэр, эгэшэ дүүнэр, эжымни гээшэ, – гэбэ.