Иоов 3 - Библи

Иоовой гашуудалта үгэлэл

¹ Удаань Иоов үгэ амалхадаа, түрэһэн үдэрөө харааба.

² Тэрэ иигэжэ хэлэбэ:

³ – Минии түрэһэн үдэр, «хүбүүн бүрилдөө» гэгдэһэн һүни һүнэжэ һалаһай!

⁴ Тэрэ үдэр харанхы байг, дээрэ байһан Бурхан тэрэниие хаража бү үзэг, тэрэ үдэрые бү гэрэлтүүлэг.

⁵ Харанхы болон хара манан тэрэниие бусаажа абаг. Үүлэн тэрэниие бүрхөөгүүжэг. Тэрэ үдэрые харанхы айлгаг, арааха залгиг.

⁶ Тэрэ һүни шэб харанхыда эзэлэгдэг. Жэлэй үдэрнүүдэй дунда тэрэ үдэр бү тоологдог, һарын тоололгодо бү орог.

⁷ Тэрэ һүни үрэгүй байг, тэрэ һүни баярай хуугай бү зэдэлэг.

⁸ Левиатаные һэргээхээр забдаһан үдэрые хараагшад тэрэниие харааг.

⁹ Тэрэнэй үдэшын бүрэнхын мүшэд бүхэг, гэгээн гэрэл хүлеэн абангүй үүрэй сайхые бү үзэг.

¹⁰ Юундэб гэхэдэ, эхын хэбэл нээгдэхые зогсоогоогүй, намайе зоболонһоо зайлуулаагүй.

¹¹ Юундэ би умай соогоо бүтөөгүй, гарамсаараа үхөөгүй хүмбиб?!

¹² Юундэ үбдэг дээрэ бөөмэйлэн эхын хүхэнүүд эдеэлүүлхэ гэжэ хүлеэн абааб?!

¹³ Би мүнөө аниргүй хэбтээд, нойрсожо амарха байгаа ха юмбиб.

¹⁴ Дэлхэйн хаашуул болон туһалагшадтайнь, губида һандарһан барилгануудтайнь,

¹⁵ гэрээ мүнгөөр дүүргэжэ, алта суглуулжа байһан ноёдтой хамта хэбтэхэ һэмби.

¹⁶ Наранай гэрэл үзөөгүй нялхада адли намай хаяха байгаал.

¹⁷ Тэндэ хара һанаатайшуулшье сүйд хэхэеэ болижо, ядаран тулигшад амардаг.

¹⁸ Шорондо хаягдаһан амитан тайбан һуудаг. Тэндэ харуулшанай хашхараан дуулдахагүй.

¹⁹ Тэндэ ехэ багагүй бултадаа адли эрхэтэй, богоол эзэнһээ сүлөө байдаг.

²⁰ Юундэ зобогшодо гэрэл, гашуудагшада амин үгтэдэг юм?

²¹ Тэдэ үхэлые хүлеэгөөшье һаань, ерэдэггүй, нюуһан эрдэниһээ үлүүгээр тэдэ үхэлые бэдэрдэг.

²² Үхэлэй нүхэндэ дүтэлхэдөө хүхилдэн баярладаг.

²³ Замынь хаагдаһан хүндэ гэрэл хэрэгтэй бэшэ, Бурхан тэрээндэ бэрхэшээл олошоруулна.

²⁴ Эдеэ хоолой орондо намда ёолоон ерээ, нулимсамни уһан шэнги адхараа.

²⁵ Минии жэхын түбэгшөөдэг юумэ намтай ушаржа, минии айдаг юумэн намда ерээ.

²⁶ Намда ажана тайбан гэжэ байхагүй, тэнюун байдал намһаа зайлаа, гай гашуудал ерээ.