Галадуудта 6 - Библи

Бэе бэеынгээ ашаа бэрхэшээл хубаалсажа, бэе бэедээ туһалжа байгты

¹ Аха дүүнэрни, хэрбээ хэн нэгэнэй нүгэл хээ һаа, Һүлдын һургаһан ёһоор ажамидардаг таанад иимэ хүниие даруу зангаараа заһажа байгты. Тиихэдэ нүгэл шэбэл хэжэрхихэгүйн тулада өөһэдыгөө анхарагты.

² Христоосой үгэһэн «хуули» иимэ: бэе бэеынгээ ашаа бэрхэшээлые хубаалсажа, бэе бэедээ туһалжа байгты.

³ Хэрбээ хэн нэгэн оройдоо хэншье бэшэ аад, бэеэ дээгүүр абабал, тэрэ хүн өөрыгөө дэмы мэхэлнэ.

⁴ Тиимэһээ хүн бүхэн бүтээһэн хэрэгүүдэйнгээ зэргээр өөрыгөө үнэлжэ байг. Тиигэбэл тэрэ хүн бэеэ бэшэнтэй сасуулангүй, ажал амжалтануудаараа омогорхожо байха.

⁵ Юуб гэхэдэ, хүн бүхэн өөрынгөө ашаа бэрхэшээлые өөр дээрээ абажа ябаха.

⁶ Бурханай һургаал заалгаһан хүн һурган хүмүүжүүлэгшэтэйгөө бүхы эд зөөреэрөө хубаалсаг.

⁷ Бурханиие мэхэлхэ аргагүй юм. Тиимэһээ бү эндүүрэгты. Хүн тариһанаал хададаг.

⁸ Бэеынгээ хүсэлэнгүүдые хангажа байдаг хүн үхэл олохо, харин Арюун Һүлдын тулада оролдодог хүндэ Арюун Һүлдэ мүнхын амидарал олгохо.

⁹ Тиимэһээ эсэхэ сусахые мэдэнгүйгөөр һайн юумэ хэжэ ябагты. Гэдэргээ сухаряагүй һаа, бидэ саг болзортонь ургасаа хуряахабди.

¹⁰ Арга боломжотой байхадаа бүхы хүнүүдтэ, илангаяа өөрынгөө бүлгэмэй һүзэглэгшэдтэ үлүү ехээр һайниие хэжэ ябагты.

Түгэсхэлэй һэргылэлгэ ба амаршалга

¹¹ Энэ хандалгаяа таанадта ямар томо үзэгүүдээр бэшэһыемни харагтыл даа.

¹² Хүнүүдтэ һайшаагдаха дуратай зон бэлгээ отолуулхыетнай баадхана, тиихэдээ тэдэнэр Христоосой хэрээһэнэй түлөө хашуулха мүрдүүлхэ дурагүй байна.

¹³ Тэдэ өөһэдөө отолуулһан мүртөө Хуули сахидаггүй, харин өөһэдыгөө магтуулхын тула таанадые отолуулха һанаатай байна.

¹⁴ Харин би юугээршье һайрхахаяа һананагүйб, гансал манай Эзэн Иисүүс Христоосой хэрээһээр һайрханаб. Минии урда энэ хэрээһэн дээрэ бүхы дэлхэйн омогорхол хадагдаа, тиихэдэ би өөрөөшье энэ дэлхэйн омогорхолой урда хэрээһэн дээрэ хадагдаад байнаб.

¹⁵ Отолуулһан гү, али отолуулаагүй гү – тэрэнь ямаршье хамаагүй. Шэнэ хүн бии боложо мүндэлһэниинь лэ шухала юм.

¹⁶ Энэ гурим сахидаг хүн бүхэн, Израилиин Бурханай хүнүүд энхэ тайбанда, үршөөл хайрада оршохонь болтогой!

¹⁷ Саашадаа хэншье намда зоболон бү асараг, юуб гэхэдэ, би Иисүүсэй шархануудые бэе дээрээ абажа ябанаб.

¹⁸ Аха дүүнэрни, манай Эзэн Иисүүс Христоосой үршөөл хайрань таанадтай оршожо байг лэ! Болтогой!