Галадуудта 5 - Библи

Эрхэ сүлөөдэ ажамидарагты

¹ Христоосой үршөөһэн эрхэ сүлөөдэ ажамидарагты, дахин барлагууд бү бологты.

² Хэрбээ бэлгээ отолуулбалтнай, Христоос таанадта ямаршье аша туһа хүргэхэгүй гэжэ би Павел таанадта хэлэнэб.

³ Харин бэлгээ отолуулһан хүн бүхэн Хуулиин бүхы зүйлнүүдые гүйсэдхэхэ ёһотой болоно гэжэ баталан гэршэлнэб.

⁴ Хуули сахин өөһэдыгөө абарха һанаатайшуул Христоосһоо хулжаржа, Бурханай үршөөл хайраһаа арсана гээшэ.

⁵ Харин бидэ Бурханай үршөөл хайрада хүртэжэ, өөһэдынгөө этигэлээр абарагдахабди гэжэ найданабди.

⁶ Иисүүс Христоосой ашаар абарагдаха һанаатай байбал, бэлгээ отолуулаа гүбди, али отолуулаагүй гүбди – ямаршье илгаагүй юм, гансал хайра дура үгэдэг этигэл шухала юм.

⁷ Таанад һайнаар эхилээ бэлэйт, теэд саашадаашье үнэн зүбые баримталхадатнай хэн таанадта һаалта хэбэб?

⁸ Иимэ буруу һанал бодолнуудые урдань таанадые дуудаһан Бурхан таанадта идхуулаа бэшэ.

⁹ Багахан эһээбэри бүхы эдьхүүрые эһээдэг.

¹⁰ Гэхэтэй сасуу таанад зүбөөр бодомжолжо байхат гэһэн найдалга Бурхан намда үгэнэ. Харин таанадые зүб харгыһаа хадууруулһан хүн, хэншье байг, илгаагүй зэмэлэгдэхэ.

¹¹ Аха дүүнэрни, хэрбээ бэлгээ отолуулга аша туһатай гэжэ минии айладабал, намайе хашан мүрдэхэгүй байгаа. Тиигэбэл Иисүүс Христоосой хэрээһэн тухай һургаал би номнохогүй һэм, зонойшье дунда үймөөн болохогүй һэн.

¹² Танай дунда үймөө татадаг зон таанадһаа холодобол һайн байгаа.

¹³ Аха дүүнэрни, Бурхан таанадые эрхэ сүлөөдэ дуудаа. Энэ эрхэ сүлөөтнай хүсэлэнгүүдээ хангахын тулада муу юумэ үйлэдэхэ харгыда таанадые гансал бү түлхиг. Таанад бэе бэедээ дуратай байгты, бэе бэедээ туһалжа байгты.

¹⁴ Юундэб гэхэдэ, Хуулиин бүхы зүйлнүүд: «Дүтынгөө хүндэ өөртөөл адли дуратай бай», – гэһэн энэ захяа заабари соо тобшологдоно.

¹⁵ Харин бэе бэеэ таһара удара таталсажа, эдилсэжэ байһаар таанар өөһэдыгөө сүм хюдажа бү һалгаажархигты.

Арюун Һүлдын үрэ дүн, мүн бэеын хүсэлэнгүүд

¹⁶ Һүлдын һургаһан ёһоор ажамидарагты, тиигэбэл муу муухай ябадал гаргахагүйт гэжэ би хэлэнэб.

¹⁷ Юуб гэхэдэ, бэеымнай һанаашалһан юумэн Һүлдынхиһөө тад ондоо, тиин Һүлдын һанаашалһан юумэн бэеынхиһээ тад илгаатай. Тиимэһээ таанад һанаһан юумэеэ олон ушарта хэдэггүй бшуут.

¹⁸ Хэрбээ таанадые Һүлдэ хүтэлжэ ябабал, Хуули таанадта хэрэггүй.

¹⁹ Бэеын хүсэлэнгүүд иимэ: эрэдээ гү, али эхэнэртээ урбаха, забхай зальхай, һамуу һэбхи ябадал гаргаха,

²⁰ онгонуудта мүргэхэ, эльбэ жадха хэхэ, зэбүүрхэхэ, хэрүүл ама гаргаха, атаархаха, уурлаха, дээрэлхүү зантай байха, арсалдаха ба хэрэлдэхэ, буруу үзэл номнохо,

²¹ жүтөөрхэхэ, архидаха ба аашалха гэхэ мэтын буруу ябадалнууд. Иимэ муу юумэ үйлэдэжэ байгаа хүнүүд Бурханай хаан орондо уг залгамжалан орожо шадахагүй гэжэ урда хэлэһэнээ би дахин дабтанаб.

²² Арюун Һүлдын үрэ дүн болбол иимэ: хайра дуран, баяр, энхэ тайбан, тэсэбэри, һайн һанаан, ниигүүлэсхы сэдьхэл, үнэн сэхэ ябадал,

²³ номгон даруу зан. Иимэ зондо Хуули хэрэггүй.

²⁴ Өөһэдыгөө Христоос Иисүүстэ зорюулһан хүнүүд махабад бэеэ хорхойтолготойнь, хурисал ташаяантайнь хэрээһэндэ хадаа.

²⁵ Хэрбээ бидэ Арюун Һүлдөөр ажамидаржа байбал, Һүлдын һургаһан ёһоор лэ ябаял.

²⁶ Ехээрхүү дээрэлхүү зан гаргангүй, бэе бэедээ өөдэрхэн хэрүүлхэнгүй, атаархангүй ябаял даа.