Галадуудта 3 - Библи

Этигэл һүзэгтэй байха гү, али Хуули сахиха гү?

¹ Ай, мунхаг тэнэг галаадууд! Хэн таниие эльбэдэбэ гээшэб? Минии номноходо хэрээһэндэ саазалагдаһан Христоосые таанад нюдөөрөө хаража байһандал байгаа бэшэ һэн гүт?

² Таанад Хуули сахижа байһан дээрэһээ гү, али Христоосто этигэһэн дээрэһээ Арюун Һүлдэдэ хүртэбэ гүт гэжэ би таанадһаа һураха һанаатайб.

³ Арюун Һүлдөөр дахуулжа ябаһан аад, мүнөө махабад бэедээ татуулаа гүт? Тиихэдээ таанад иимэ балар мунхаг хүнүүд гээшэ гүт?

⁴ Али таанадтай ушарһан бүхы юумэн дэмы үнгэрөө гү? Дэмы үнгэрөөгүйл байгаа даа!

⁵ Хуули сахиһандатнай бэшэ, харин Христоосто этигэһэндэтнай Бурхан таанадта Арюун Һүлдые хайрлажа, гайхамшагта үйлэ хэрэгүүдые бүтээгээ юм.

⁶ Энээндэл адляар Абраһаамай Бурханда этигэхэдэ, Бурхан тэрэниие үнэн сэдьхэлтэн гэжэ тоолобо.

⁷ Абраһаамдал адли Бурханда һүзэглэдэг зон Абраһаамай үри һадаһад гэжэ таанар мэдэжэ байгты.

⁸ Арадуудые этигэлээрнь Бурхан аршалан сүлөөлхэ гэжэ Нангин Бэшэг соо үни гэһээр тунхаглагдаа. Тэндэ Абраһаамда: «Бурхан шамаар дамжуулан, бүхы арадуудые абарха», – гэжэ хэлэгдээ.

⁹ Тиимэһээ Бурханда һүзэглэһэн зон Абраһаамтай хамта үршөөгдэхэ.

¹⁰ Харин Хуули сахижа аршалагдахаб гэжэ һанаһан хүн бүхэн хэһээгдэхэ. Юундэб гэхэдэ, «Хуулиин зүйл бүхэниие үргэлжэ гүйсэдхэжэ байгаагүй хүн бүхэн хэһээгдэхэ», – гэжэ Нангин Бэшэг соо хэлээтэй байдаг.

¹¹ Хуули сахижа байһанаараа хэншье Бурханай абарал үршөөлдэ хүртэхэгүй, юундэб гэхэдэ, Нангин Бэшэгтэ: «Үнэн сэдьхэлтэн этигэл һүзэгэйнгөөл ашаар амидарха», – гэжэ бэшэгдэнхэй.

¹² Хуули гээшэмнай һүгэдэлгэ бэшэ, тиимэһээ тэндэ: «Хуулиин зүйл бүхэнииел сахижа ябаһан хүн амиды ябаха», – гэжэ хэлэгдэнэ.

¹³ Дээрэмнай бууха ёһотой байһан Хуулиин хэһээлтэһээ бидэниие Христоос аршалжа, тэрэ хэһээлтые Өөр дээрээ даажа абаа. Тиимэһээ Хуули соо баһа иигэжэ бэшэгдээтэй: «Модондо үлгөөтэй хүн хараалда хүртөө».

¹⁴ Иисүүс Христоосоор дамжан найдуулагдаһан Арюун Һүлдые этигэлээрээ тогтоожо абахынь тула Абраһаамай үршөөл хайра мүнөө бүхы арадуудта үгтөө.

Бурханай найдуулга ба Хуули

¹⁵ Аха дүүнэрни! Юрэ хэлэбэл, хүнэйшье бэшээд орхиһон һүүлшын захяае хэншье хубилгажа шадахагүй юм.

¹⁶ Харин Абраһаамда, тэрэнэй үридэ Бурхан найдуулга үгөө. Үри хүүгэдтэш гэжэ хэлэгдээгүй, харин үридэшни гэжэ нэгэл хүн тухай хэлэгдээ, тиин тэрэ нэгэнь – Христоос гээшэ.

¹⁷ Христоос тухай хэлсээе Бурханай баталһан сагһаа дүрбэн зуун гушан жэл үнгэрһэн хойно бии болоһон Хуули энэ хэлсээе болюулха аргагүй, тиимэһээ Бурханай найдуулгань хүсэндөө үлэбэ гэжэ би хэлэнэб.

¹⁸ Юундэб гэхэдэ, хэрбээ уг залгамжалга Хуулиин ёһоор үгтэдэг һаа, найдалга хэрэггүй байгаа. Гэбэшье Бурхан Абраһаамые найдуулһан ёһоороо шагналдаа хүртөөгөө юм.

¹⁹ Юундэ Хуули үгтэһэн байгааб? Абраһаамай үри һадаһан ерэхэ гэжэ Бурханай найдуулһан саг хүрэтэр гэмтэ ябадал юун бэ гэжэ ойлгожо байхын тула энэ Хуули үгтөө. Энэ Хуули хүнүүдтэ Эльгээмэлээр болон зууршалагшаар дамжуулан үгтөө.

²⁰ Теэд Бурхан ори ганса! Тэрэ зууршалагшые хэрэглэдэггүй.

²¹ Иихэдээ Хуули Бурханай найдуулга буруушаана гү? Үгы даа! Хэрбээ Хуули хүниие абарха аргатай байбал, Хуули гүйсэд сахидаг хүн бүхэн үнэн сэдьхэлтэн болохо һэн.

²² Гэбэшье хүн бүхэн нүгэл шэбэлдэ унаад байна гэжэ Нангин Бэшэг соо хэлэгдэнэ. Энэ бэшэгдэһэн бүхэнэй ушарынь гэхэдэ, Иисүүс Христоосто һүзэглэһэн бүхы зон этигэлээрээ Бурханай найдуулһые хүлеэжэ абаха.

²³ Этигэлэй сагай ерээдүйдэ, этигэл һүзэгэй бидэндэ нээгдэтэр бидэ Хуулиин эрхэ мэдэлдэ байгаабди.

²⁴ Иихэдээ Хуули гээшэмнай этигэл һүзэгөөрнай абардаг Христоосто этигэхыемнай бидэниие бэлдэһэн шэрүүн һургагша байгаа.

²⁵ Тиимэһээ этигэлэй сагай ерэхэдэ, бидэ энэ шэрүүн һургагшын мэдэлһээ мултаран гараабди.

²⁶ Мүнөө таанад булта Иисүүс Христоосто һүзэглэһэн этигэлээрээ Бурханай үхибүүд гээшэт.

²⁷ Иисүүс Христоосой нэрэ алдараар уһаар арюудхуулһан зон, таанад булта Иисүүс Христоостой нэгэдэбэт.

²⁸ Тиимэһээ мүнөө еврейнүүд, бусад арадуудшье илгаагүй, барлагууд, сүлөөтэйшүүлшье илгаагүй, эрэшүүл, эхэнэрнүүдшье илгаагүй. Таанад булта мүнөө нэгэн адли боложо, Иисүүс Христоостой нэгэдэбэт.

²⁹ Хэрбээ Христоостой нэгэдэбэл, таанад Абраһаамай үри һадаһад гээшэт, тиигээд Абраһаамда найдуулһан бүхэниие залгамжалан абахат.