Галадуудта 2 - Библи

Павел ба Иерусалимай элшэнэр

¹ Арбан дүрбэн жэлэй үнгэрһэн хойно би Барнааба Тит хоёрые абажа, дахин Иерусалим ерээб.

² Бурханай хүсэһэн хадань би иишээ ерээ һэм. Дэмы юумэ хэжэ байгаагүйгөө тодорхойлхын тула би бусад арадуудта номнодог һургаалаа эгээн хүндэтэ багшанарта баһа хөөрөөб.

³ Юун гэжэ һананат? Замаймни нүхэр Тит гэдэг грек хүбүүе бэлгээ отолуула гэжэ хэншье баалаагүй.

⁴ Гансал худал хуурмаг һүзэгтэн энээн тухай шаардаа. Иисүүс Христоосой бидэндэ үгэһэн эрхэ сүлөө тухай тэдэнэр мэдэжэ, бидэниие дахин дарлаха һанаатайгаар тагнуулшад мэтэ мэхэ гохо гарган, бидэнэй дунда нюусаар шурган ороо бэлэй.

⁵ Харин бидэ һургаалай бодото удхые хэбээрнь таанадта дамжуулхын тула тэдэнэй үгэдэ ойро зуурашье ороогүй һэмди.

^6-9 Харин Яков, Кефа (Пётр), Иоанн гэдэг эгээн хүндэтэ багшанар тухай хэлэбэл, урдань тэдэнэй ямар хүнүүд байһаниинь намда хамаагүй, юуб гэхэдэ, Бурхан хүниие яһаарнь илгадаггүй. Тэдэнэр Һайн Мэдээсэл номнохыемни намайе зүбшөөгөө. Тэдэ нэрэ хүндэтэй зон бидэнтэй нэгэ ажал хэрэг бүтээжэ байһанаа баталан, Барнааба бидэ хоёрой гарые бариба, Бурханһаа үршөөл хайра бидэндэ үгтэһые зүбшөөбэ. Тиигээд бидэ бусад арадуудые, харин тэдэ еврейнүүдые һургахань зүбтэй гэжэ тоолобо. Юундэ тиигээб гэбэл, еврейнүүдтэ номнохо үүргэ Пётрто Бурханһаа үгтэһэндэл адли бусад арадуудые һургаха үүргэ намда үгтөөд байһые тэдэнэр хараа. Яажа Пётр Бурханай хүсөөр элшэн болгогдоод, еврейнүүдтэ номнодог бэ, тон тиигэжэл бишье Бурханай хүсөөр элшэн болгогдоод, бусад арадуудые һургадаг болооб.

¹⁰ Тэдэ элшэнэр Иерусалимай ядуу һүзэглэгшэдэй бүлгэмдэ анхаралаа хандуулхыемнай бидэнһээ гуйгаа. Тиимэһээ би энээндэ һаналаа табижа, тэдэ зондо туһалдаг байгааб.

Павел Пётрые Антиохто шүүмжэлбэ

¹¹ Пётрой Антиох ерэхэдэнь, би тэрэниие шүүмжэлээб, юундэб гэхэдэ, тэрэ өөрыгөө доогуур абажа ябаа.

¹² Яковай хүнүүдэй Антиох ерэхын урда тээ Пётр бусад арадуудай дундаһаа Христоосто һүзэглэһэн зоноор хамта хоол баридаг һэн. Теэд Яковай зоной ерэхэдэ, еврейнүүдһээ айжа, бусад арадуудай дундаһаа һүзэглэһэн зонһоо гэнтэ холодоод, суг эдеэлэлсэхэеэ болибо.

¹³ Тон тиигэжэл бусад еврей һүзэглэгшэд, тэдэнэй тоодо Барнаабашье зүб харгыһаа хадууржа, нюур харадаг болоо.

¹⁴ Пётр үнэн зүб һургаалай ёһоор бэеэ абажа ябанагүй гэжэ мэдэхэдээ, би хүн зоной дунда: «Ши еврей хүн аад, бусад арадуудай дунда еврейнүүдэй ёһо гуримаар бэшэ, харин бусад арадуудай гуримаар бэеэ абажа ябаһан аад, яахадаа тэдэниие еврейнүүдэй ёһо гуримаар ябахыень баалаа хүмши», – гэжэ тэрээндэ сэхэ хэлэбэб.

Хүн Хуули сахиһаараа бэшэ, харин этигэлээрээ абарагдаха

¹⁵ Бидэшье түрэхэһөө еврейнүүд гээшэбди. Нүгэлтэ бусад арад бэшэ ха юмбибди.

¹⁶ Теэд нэгэшье хүн Хуули сахижа өөрыгөө хамгаалхагүй, харин Иисүүс Христоосто этигэжэ абарагдаха гэжэ бидэ мэдэнэбди. Хуули сахижа «нэгэшье хүн абарагдахагүй» байһан дээрэһээ бидэ Хуули сахяад бэшэ, харин Иисүүс Христоосто найдан абарагдахабди гэжэ Иисүүс Христоосто этигээбди.

¹⁷ Хэрбээ бидэ Христоостой нэгэдэн өөһэдыгөө сүлөөлхэ гэжэ байтараа, Хуули сахин нүгэл хэнэбди гэжэ баһа мэдэрбэл, Христоос нүгэл хэлгэдэ хамһалсагша болоно гү? Үгы даа!

¹⁸ Хэрбээ би гараараа һандарган һалгааһан юумэеэ дахин һэргээн бодхообол, үнэхөөрөө нүгэлтэн болохоб.

^19-20 Хуули гээшэ үхэлһөө ондоо юумэ намда үгэжэ шадахагүй хадаа ажамидаралдамни ямаршье удхагүй юм. Тиимэһээ би Бурханай түлөө амидарнаб. Мүнөө би өөрөө амидарна бэшэб, харин Христоос зосоомни амидарна. Намда хайра дуратай байжа, минии түлөө Өөрыгөө үргэһэн Бурханай Хүбүүндэ һүзэглэдэг дээрэһээ би мүнөө амиды ябанаб. Би Христоостой хамта хэрээһэндэ хадуулааб.

²¹ Бурханай үршөөл хайраһаа би арсанагүйб. Хэрбээ гансал Хуули сахижа аршалагдаха аргатай байбал, Христоос дэмы наһа бараһан болоно.