Даниил 9 - Библи

Даниил Израиль тушаа зальбарна

¹ Мидиин Ахашвероошой хүбүүн Даарий гэгшэ Вавилооной хан түрэ тиихэдэ түрүүшын жэлдэ зонхилжо байгаа.

² Түрүүшын жэлээ хааншалжа байхадань би, Даниил, Бурханай ном уншажа, Эзэнэй Ерэмияа лүндэншэндэ айладхаһан үгэнүүдһээ Иерусалим далан жэлэй туршада һандархай зандаа байха гэжэ ойлгобоб.

^3-4 Тиигээд масаг барин, таар үмдэжэ, үнэһэ шорой дээрээ адхан, Эзэн Бурханда үнэнхэ зүрхэнһөө зальбаран мүргэжэ, өөрынгөө нүгэл мэдэрэн, иигэжэ гуйгааб: – Агууехэ, һүрөөтэ Эзэн! Танда дуратай, ёһо гуримуудыетнай сахидаг зонтой хэлсээгээ хододоо сахин байнат.

⁵ Харин бидэ нүгэлтэйбди, гэм хээбди, буруугаар юумэ үйлэдөөбди, үсэрэлдөөбди, ёһо гуримуудыетнай, хуули ёһонуудыетнай хазагайруулаабди.

⁶ Танай нэрэһээ хаашуулдамнай, түшэмэл ноёдтомнай, бүхы арад түмэндэмнай айладхал буулгажа байһан үнэн зарасанарайтнай – лүндэншэдэй үгэ дуулаагүйбди.

⁷ Эзэн, Та зүбта, харин бидэ мүнөө эшхэбтэр байдалда оронхой, нэрээ хухаранхай байнабди – Иудын, Иерусалимай болон Израилиин хан түрын бүхы улад зон: Танһаа буруу харахадамнай холо, ойрошье орон нютагуудаар Танай сасааша хүнүүд.

⁸ Эзэмнай! Нүгэл Танай урда хэһэндээ бидэ бултадаа, хаашуулнайшье, түшэмэл ноёднай, үбгэ эсэгэнэрнайшье, нэрээ хухараабди.

⁹ Эзэн Бурхамнай маанадые энэрэл хайраараа орхингүй, хүлисэг лэ. Бидэ урдаһаань эсэргүүсээбди,

¹⁰ Эзэн Бурханайнгаа үгэ дуулаагүйбди, Өөрын богоол – лүндэншэдөөр дамжуулһан хуули ёһонуудыень хазагайруулаабди.

¹¹ Израилиин хүн бүхэн Танай хуули ёһо дэбһэжэ, үгыетнай дуулангүй буруу хараа, тиимэһээл Бурханай үнэн зараса Моисейн хуули ёһо соо бэшээтэй тэрэ хараал шэрээл, муухай ёро манай толгой дээрэ буугаал. Бурханай урда иимэ ехэ нүгэлтэй гээшэлди.

¹² Огторгой доро үзэгдөө-харагдаагүй, харин мүнөө Иерусалимтай тохёолдогшо тэрэ ехэ гай тодхор маанад дээрэ буулгажа, маанад болон удамаршад тушаамнай айладхалаа тэрэ бэелүүлээл.

¹³ Моисейн хуули ёһо соо бэшээтэй тэрэ гай тодхор бидэнтэй тохёолдоошье һаань, бидэ гуйжа Эзэн Бурхандаа хандабагүйбди, нүгэл хэхэеэ болибогүйбди, үнэн зүбыень мэдэрбэгүйбди.

¹⁴ Гай тодхор бидэндэ эльгэхэеэ, буулгахаяа Эзэн удаарбагүй. Эзэн Бурханай хэһэн бүхы үйлэ хэрэгүүдынь зүб, харин бидэл үгыень дуулаагүйбди.

¹⁵ Эзэн Бурхамнай, агууехэ хүсөөрөө Өөрын арад түмэниие Египедэй орон нютагһаа гаргаат, мүнөөшье хүрэтэрөө алдар солотнай гэрэл мэтэ толорно. Харин бидэ нүгэлтэйбди, буруу юумэ хээбди.

¹⁶ Эзэмнай! Та зүбта, гэбэшье уур сухалаа, хилэнгээ Иерусалим хотоһоо, нангин хада уулаһаа зайлуулыт. Манай болон үбгэ эсэгэнэрэймнай гэм зэмэй түлөө Иерусалим ба Танай арад түмэн тойроод байгааша арадуудта баһуулна.

¹⁷ Бурхамнай! Мүнөө богоолойнгоо зальбаралые, гуйлтые анхарыт! Өөрын нэрэ хүндые хаража, һандаргагдаһан нангин үргөө руугаа хайраяа шэглүүлыт, Эзэмнай!

¹⁸ Бурхамнай, шагныт, Танай нэрээр нэрлэгдэһэн хотын хэр хооһороод байһые харыт! Бидэ Танда гуйжа хандахадаа өөрын үнэн зүб байһанда түшэглэнэ бэшэбди, харин Танай агууехэ энэрэл хайрада найданабди!

¹⁹ Эзэмнай, маанадые шагныт! Эзэмнай, хүлисыт! Эзэмнай, анхарыт! Энэ болбол Танай нэрэ зүүгшэ хото, мүн Танай арад түмэн, тиимэһээ Өөрын нэрэ хүндые хаража, гуйлтыемнай дүүргыт, бү удаарыт!

Дала дахин үргэлжэлхэ долоон жэлнүүд тухай нюуса

²⁰ Иигэжэ би дуугаржа, мүргэн зальбаржа, өөрын болон арад түмэн Израилиингаа нүгэл наманшалжа, Бурханайнгаа нангин хада уула тушаа гуйлта Эзэн Бурхандаа үргэжэ байбаб.

²¹ Иигэжэ мүргэжэ байхадамни урид үзэгдэлдөө минии харагша Габриһээл ниидэн ерэжэ, урдамни бии болобо. Энэ болбол үдэшын үргэлэй үедэ бэлэй.

²² Тэрэ намда ухаа заажа, иигэжэ хэлэбэ: – Даниил! Би шамда ойлгодог эрдэм дамжуулхаяа ерээб.

²³ Шинии мүргэн зальбаржа эхилхэдэ, зарлиг гараа һэн. Тиигээд шэлэжэ абтаһан шамда тэрэниие дуулгахаяа ерээб. Тэрэ зарлигые ойлго, үзэгдэлые таажа аба.

²⁴ Эсэргүүсэһэн ябадал мартагдахын, нүгэл арюудхагдахын, гэм зэм амасагдахын тула, үнэн зүб ябадалай хэтэ мүнхэдөө мандахын, үзэгдэл болон лүндэн дээрэ тамга табигдахын тула, Нангинай нангин газарай арюудхагдан тоһологдохын тула дала дахин долоон хоног үнгэрхэ ёһотой. Иимэ сагай хугасаа соо арад зонтнай, нангин хототнай нүгэлөө амасаха гээд Бурхан тодорхойлоо.

²⁵ Иерусалим хотые дахин бариха тухай зарлигай гараһаар оливын тоһоор арюудхан шэлэгдэһэн удамаршын тодортор долоо дахин долоон хоног, удаань үшөө жаран хоёр долоон хоног үнгэрхэ гээд мэдэжэ, ойлгожо бай. Тиигээд хотын талмай, хотые тойроод малтадаг бүһэлүүр нүхэн дахин һэргээгдэхэ, гэбэшье эдэ бүгэдэ гай гасалантай жэлдэ хэгдэхэ.

²⁶ Жаран хоёр долоон хоногой үнгэрхэдэ, шэлэгдэһэн удамарша алуулагдаха, хэншье тэрээнтэй үлэхэгүй. Удаань хариин удамарша сэрэгээрээ үер мэтэ ерэжэ, хото болон нангин үргөөе һандарган һүйдхэхэ, дайн дажарай дүүрэтэр гай һандарал үргэлжэлхэ.

²⁷ Тэрэ олонтой нэгэ долоон хоногой туршада хэлсээ баталха. Удаань хахад долоон хоногой һүүлээр мяхан болон талхан үргэл болюулха. Һандаргаашын эсэс болотор жэгшүүритэ муухай һандарал, хооһорол үргэлжэлхэ. Тэрэнэй эсэсынь урид тодорхойлогдоһон бэлэй.