Даниил 5 - Библи

Бэлшаццаар хаанай хэһэн найр

¹ Нэгэтэ Бэлшаццаар хаан мянган түшэмэлнүүдээ урижа, ехэ найр хээд, үзэмэй дараһан архи уужа байба.

² Халамгай болоод, Бэлшаццаар Иерусалимай Һүмэһөө Навуходоносор эсэгынь асарагша алта, мүнгэн хундагануудые өөрөө, түшэмэлнүүдэйнь, һамгадайнь, бага һамгадайнь уухын тула асархыень захирба.

³ Иерусалимдахи Бурханай нангин ордонһоо асарагдаһан алтан домбо, хундагануудые асархадань, хаан, түшэмэлнүүдынь, һамгадынь, бага һамгадынь тэдээн сооһоо үзэмэй дараһан архи уужа эхилбэ.

⁴ Үзэмэй дараһан архи уужа байгаад, тэдэ алтан, мүнгэн, гуулин, түмэр, модон болон шулуун бурхадаа магтан байба.

⁵ Гэнтэ хүнэй гар бии боложо, хаанай ордоной сагаан шохойгоор будаһан хана дээрэ, дэнгэй саана юушьеб бэшэжэ эхилбэ. Хаан бэшэжэ байһан гар хараад,

⁶ нюур шарайнь хубилжа, ехээр айжа, шүрбэһэ шандааһаниинь шэшэржэ, үбдэгүүдынь бэе бэеэ сохижо эхилбэ.

⁷ Үзэлшэдые, мэргэшүүл халдейшүүдые, зурхайшадые дуудаха тухай хаан шангаар хашхаран захиржа, Вавилооной сэсэн мэргэшүүлдэ хандан, иигэжэ хэлэбэ: – Хэн энэ бэшээшые уншажа, намда тайлбарилнаб – тэрэ улаан хубсаһа үмдэдэг болохо, алтан зүүдхэл хүзүүндэнь үмдэгдэхэ, тиигээд тэрэ хан түрэ соо засагай талаар гурбадахи хүн болохо!

⁸ Хаанай сэсэн мэргэшүүл орожо хараба, гэбэшье бэшээшые уншажа, удхыень хаанда ойлгуулха хүн олдобогүй.

⁹ Тиихэдэнь Бэлшаццаар хаан ехэ айжа, нюур шарайнь хубилжа, түшэмэлнүүдыньшье хүлгэжэ эхилбэ.

¹⁰ Хаанай болон түшэмэлнүүдэйнь юун гэжэ хэлсэжэ байһые дуулаад, найрай боложо байгша газарта хатан ерэбэ. Тэрэ: – Хаамни, мүнхэ байхатнай болтогой! Айха, нюур шарайгаа хубилгахатнай дэмы.

¹¹ Бурханай нангин һүлдэтэй нэгэ хүн хаан түрэ соотнай ажаһуудаг. Эсэгынтнай зонхилжо байгаа үе сагта тэрэ һаруул ухаатайгаа, һонор бэрхэеэ, бурхадтал адли сэсэн мэргэнээ гэршэлээ бэлэй. Навуходоносор хаан, танай үбгэ эсэгэ, өөрөө тэрэниие эльбэ жэльбэтэйшүүлэй, үзэлшэдэй, мэргэшүүл халдейшүүдэй, зурхайшадай ахамадаар томилһон юм.

¹² Хаанай Бэлтэшаццаар гэжэ ондоогоор нэрлэһэн тэрэ Даниил угаа шанга һүлдэтэй, эрдэмтэй, зүүдэ тайлбарилха, нюуса зүйл ойлгуулха, хүрмөөтэй юумэ тайлаха ухаатай һэн. Одоол Даниилые дуудагты, тэрэл тайлбарилжа үгэхэ, – гэбэ.

Даниил далда удхатай бэшэгые тайлбарилна

¹³ Иигэжэ Даниилые хаан руу асарба. Хаан тэрээндэ: – Минии эсэгын, хаанай, Иудаһаа асарагша зоной нэгэн Даниил гэгшэ ши мүн гүш?

¹⁴ Шамда Бурханай һүлдэ халин оронхой гээд, һаруул ухаатайеш, һонор бэрхыеш, сэсэн мэргэнииеш би дуулаһан байнаб.

¹⁵ Зай, юун бэ гэхэдэ, энэ бэшээшые уншахын, удхынь тайлбарилхын тула өөр тээшээ сэсэн мэргэшүүлые, үзэлшэдые асаруулаа һэм. Теэд тэдэ энээниие тайлбарилжа шаданагүй.

¹⁶ Харин шамайе иимэ юумэ тайлбарилжа шададаг, хүрмэлдэһэн юумэ тайладаг гээд дуулаһан байнаб. Зай, энэ бэшээшые уншажа, удхыень намда ойлгуулжа шадаа гээшэ һааш, шамда улаан хубсаһа үмдэхүүлхэ, хүзүүндэш алтан зүүдхэл зүүхэ, тиигээд засагай талаар хан түрэ соо гурбадахи хүн болохош, – гэбэ ха.

¹⁷ Даниил хаанда: – Бэлэг-сэлэг шамдаа үлэг, шагнал ондоо зондо үгөөрэй. Бэшээшые би шамда миинтээр уншажа, удхыень тайлбарилжа үгэхэб.

¹⁸ Үндэр түрэлтэ хаан! Навуходоносор эсэгэдэшни Дээдэ Бурхан хан түрэ, һүр жабхалан, нэрэ хүндэ, алдар суу үршөөһэн гээшэ.

¹⁹ Тэрэнэй үгэһэн һүр жабхалангай урда бүхы арадууд, обогууд, бүлээлингүүд шэшэрэн-айн байгаа бэлэй. Хаан һанаһаараа хүниие саазалжа, амиды үлөөжэ, дээшэнь дэбжүүлжэ, доошонь буулгажа байгаа.

²⁰ Теэд тэрэ бардам, дээрэлхүү боложо, хан шэрээһээ унагаагдаа, бүхы алдар суугаа алдаа бэлэйл.

²¹ Тэрэ зоной дунда амидархаяа болижо, ухааниинь балартан, ан арьяатан мэтэ болоод, зэрлиг элжэгэнүүдтэй байдаг, малдал адли үбһэ ногоогоор хооллодог, бэеынь шүүдэр угаадаг – юрэдөө, хүн түрэлтэнэй хан түрэнүүдые Дээдэ Бурхан зонхилдог, Өөрын дураар хэн нэгэниие хан шэрээдэ Тэрэл һуулгадаг гэжэ ойлготороо тэрэ иимэ байдалда байгаа.

²² Харин ши, тэрэнэй хүбүүн Бэлшаццаар, энээниие мэдэһэншье һаа, бардамлажа байнаш.

²³ Огторгойн Эзэнэй урдаһаа һөөргэдэбэш: нангин ордонһоонь асарагдаһан амһартануудые шам руу асарба, түшэмэлнүүдтэеэ, һамгадтаяа, бага һамгадтаяа хамта тэдэ хундагануудһаа үзэмэй дараһан архи уубаш, тиигээд юушье харадаггүй, дууладаггүй, ойлгодоггүй мүнгэн, алтан, гуулин, түмэр, модон болон шулуун бурхадаа магтан-түүрээн байбаш. Харин ами наһа, хуби заяаеш зонхилон байдаг Бурханиие ши алдаршуулнагүйш.

²⁴ Тиимэһээл Тэрээнһээ энэ гар эльгээгдэжэ, эдэ үгэнүүд бэшэгдэбэ.

²⁵ Юун гэжэ бэшээтэйб гэбэл: Мене Мене Текел Парсин.

²⁶ Удхань юун бэ гэбэл: Мене – «Шинии хааншалха сагые Бурхан тооложо, эсэс табяа»;

²⁷ Текел – «Шэгнүүр дээрэ шэгнэгдэжэ, ши хүнгэнши гээд элирбэ»;

²⁸ Перес – «Хаан түрэшни хубаарилагдан, Мидиин болон Персиин зондо үгтэбэ».

Бэлшаццаар Даниилые дээгүүр үргэбэ

²⁹ Бэлшаццаарай захиралтаар Даниилда улаан хубсаһа үмдэхүүлбэ, алтан зүүдхэл хүзүүндэнь зүүбэ, тиигээд хан түрэ соо засагай талаар гурбадахи хүн гэжэ айладхаба.

³⁰ Тэрэл һүни халдейшүүдэй хаан Бэлшаццаар алуулаа бэлэй.

³¹ Мидиин Даарий гэгшэ хаан болоо бэлэй. Тиихэдэ тэрэ жаран хоёр наһатай байгаа.