Даниил 11 - Библи

¹ Мидиин хүн Даарий гэгшын зонхилжо эхилһэн түрүүшын жэлһээ хойшо би тэрэниие зоригжуулжа, хамгаалжа байгааб.

Хойто зүгэй ба Урда зүгэй хаашуул

² Мүнөө би шамда үнэниие айладхахам. Персидэ үшөө гурбан хаашуул тодоржо, удаань тэдээнһээ үлүү ехэ баялигтай дүрбэдэхи хаан тодорон гараха. Тэрэ бүри баян бардам болоходоо Грециин хан түрэтэй хүсэ шадалаа туршалсахаа һэдэхэ.

³ Тиихэдэ хүсэ шадалтай нэгэ хаан тодоржо, үргэн ехэ газар эзэмдэхэ, дураараа юумэ үйлэдэхэ.

⁴ Харин гэнтэ хан түрэнь һандаржа, дүрбэн хуби болон таһарха, уг удамданьшье хүртэхэгүй, урдынхидаал адли шанга засаг тэндэнь байхагүй. Хан түрэнь иигэжэ бутаржа, хариин зондо үгтэхэ.

⁵ Урда зүгэй хаан ехэ хүсэ шадалтай болохо. Тиигээд тэрэнэй нэгэ жанжин тэрээнһээ үлүү хүсэтэй боложо, тэрээнһээ үшөө ехэ газар дайдатай болохо.

⁶ Хэдэн жэл үнгэрхэ. Эб тушаа хэлсээ баталхын тула урда зүгэй хаанай басаган хойто зүгэй хаанда хадамлуулагдаха. Харин тэрэ засаг зонхилолтоёо гээхэ, иигэжэ тэрэ өөрөө, нүхэрынь, үхи хүүгэдынь, тэдэнэй тала баригшад бултадаа алуулха.

⁷ Тииһээр тэрэ алуулагша хатанай түрэлэй нэгэ хүн урда хан түрын удамарша болохо. Тэрэ хойто зүгэй хаанай сэрэгтэ добтолжо, хана хэрэмүүдынь эзэмдэн абажа, илаха.

⁸ Шүтөөнүүдынь, шудхамал хүрэгүүдынь, алта, мүнгэн амһартануудынь тэрэ эзэмдэжэ, Египет руу абаашаха. Тиигээд хэдэн жэл соо хойто хаанда тэрэ хамаархахагүй.

⁹ Удаань хойто зүгэй хаан урда хан түрэдэ добтолхо, гэбэшье һөөргэлхэ баатай болохо.

¹⁰ Хойто зүгэй хаанай хүбүүд дайнда бэлдэжэ, асари ехэ сэрэг суглуулан бүридхэхэ. Тэрэ сэрэг үер мэтэ урдажа, урда зүгэй хан түрын хэрэм ханануудта добтолхо.

¹¹ Урда зүгэй хаан ехэ уурлажа, хойто зүгэй хаантай дайлалдаха. Хойто зүгэй хаан ехэ сэрэг суглуулаашье һаа, диилдэхэ.

¹² Хэдэн мянгаад сэрэгые хюдаһандаа урда зүгэй хаан ехэ бардамлан байха. Гэбэшье бэшэ тэрэ илалта туйлахагүй.

¹³ Юуб гэхэдэ, хойто зүгэй хаан урдынхиһаа үшөө ехэ сэрэг суглуулжа, хэдэн жэлэй үнгэрһэнэй удаа олон, һайн гэгшын зэбсэгтэй сэрэгтэй добтолон орохо.

¹⁴ Тэрэ үе сагта олохон зон урда зүгэй хаанай урдаһаа буһалгаалан бодохо. Шинии арад түмэнэй буһалгаата зон үзэгдэл бэелүүлхэ гэжэ мүн лэ эсэргүүсэн бодохо, гэбэшье биража шадангүй унаха.

¹⁵ Хойто зүгэй хаанай сэрэг ерэжэ, бүһэлэлтын обоо бодхожо, бүхэлэгдэһэн хотые эзэмдэн абаха. Урда зүгэй хан түрын сэрэг, эгээл эрхим сэрэгыньшье, тэдээндэ эсэргүүсэжэ шадахагүй.

¹⁶ Ерэгшэ хойто зүгэй хаан зоргоороо хэрэг үйлэдэхэ, хэншье тэрээндэ эсэргүүсэжэ шадахагүй. Нангин газар дээрэ тэрэ үргөөгөө табижа, дууһан эзэмдэн байха.

¹⁷ Тэрэ бүхы хан түрын эзэн болохоёо эрмэлзэжэ, дайсантай хэлсээ баталан, басагаяа тэрээндэ хадамлуулха. Гэбэшье түсэбынь бүтэхэгүй, ямаршье үрэ гарахагүй.

¹⁸ Удаань хойто зүгэй хаан далайн эрьеэр ажаһуудаг олон арадуудые диилэн, газарынь эзэмдэн абаха. Харин нэгэ сэрэгэй ноён тэрэниие бута сохижо, бардамлаха сагынь болюулха.

¹⁹ Тэрэ һөөргөө өөрын орон нютаг, хана хэрэмүүд руугаа шэглэхэ, гэбэшье аян замдань тэрээндэ дайсан добтолжо, һамна сохихо, иигэжэ тэрэ һэегүй үгы болохо.

²⁰ Хан шэрээдэнь ондоо хүн заларжа, хан түрэ соогуураа ясаг татабари суглуулха зорилготойгоор хүниие эльгээхэ. Хэдэн үдэр үнгэрхэдэ тэрэшье хаан дайн дажарта бэшэ, буһалгаанай үедэ бэшэ, нюуса аргаар үгы хэгдэхэ.

Хойто зүгэй худалша хуурмаг хаан

²¹ Хаан болохо ямаршье эрхэгүй, жэгшүүрилтэ муу хүн тэрэнэй орондо заларан гараха. Тэрэ гэнтэ бии боложо, мэхэ гохын аргаар хаан болохо.

²² Тэрэнэй урдаһаа эсэргүүсэһэн лэ хүн, хэдэн байлдаануудта илалта туйлаһан сэрэгшэдшье, Хэлсээнэй удамаршаншье өөрөө байг, адли хосорхо юм.

²³ Хэлсээ баталаашье һаа, тэрэ бусад арадуудые мэхэлхэ, багахан арадтай байгаашье хадаа тэрэ хүсэ шадалтай байха.

²⁴ Эгээл баян орон нютагууд руу тэрэ гэнтэ орожо, үбгэ эсэгэнэрэйнь хэнэйшье хээгүй юумэ тэндэ эрхилхэ. Дээрмэдэн абаһан эд зөөри, олзо, баялигые тэрэ өөрын хүнүүдэй дунда тараажа, хэрэмүүдтэ добтолхо тушаа түсэблэн байха, теэд тэрэнэй саг удахагүй дууһаха.

²⁵ Бүхы хүсэеэ, зоригоо шангадан, ехэ сэрэг бүридхөөд, тэрэ урда зүгэй хаанай урдаһаа добтолхо. Урда зүгэй хаан агууехэ, угаа хүсэтэй сэрэгээрээ урдаһаань тулаха, гэбэшье мэхэ гоходо орожо, диилдэхэ.

²⁶ Хамта эдеэ хоол барижа байгаашадынь тэрэниие һалгааха. Сэрэгынь ехэ үертэ абтаһандал үгы болохо, олон зониинь алуулха.

²⁷ Хоёр хаашуул нэгэ шэрээгэй саана һуужа, хөөрэлдэбэшье, сэдьхэлдээ хүн бүхэниинь нүгөөдын урдаһаа хара һанаа һанажа, худал хэлэжэ байхадаа, һанаһанаа хэнииньшье абахагүй. Иимэ саг үшөөл ерээдүй байна бшуу.

²⁸ Хойто зүгэй хаан баян гэгшын олзотой гэртээ хариха замдаа нангин хэлсээнэй шажан мүргэл үгы хэхэ гэжэ һанаад, хэрэг үйлэдэхэ, удаань гэртээ бусаха.

²⁹ Түсэблэһэн сагта тэрэ дахин урда зүгтэ добтолхо, гэбэшье урданайхидал адли юумэн бэшэ үзэгдэхэгүй.

³⁰ Тиишээ Киттиимэй онгосонууд ерэхэ, тиихэдэнь тэрэ айжа, һөөргэлхэ. Тэрэ нангин хэлсээнэй шажан мүргэлдэ уурлажа, үгы хэхэ талаар хэрэг ябуулха. Энэ шажанһаа буруу харагшадай зүбшэл заабари даган,

³¹ нангин үргөө руу сэрэг ябуулха. Тиихэдэнь тэрэ сэрэг нангин үргөөе бузарлаха, үдэр бүриин үргэл болюулха, хооһон болгохо.

³² Нангин хэлсээндэ урбагшадые тэрэ билдагууша үгөөр өөртөө татана, харин Бурханаа шүтэгшэд шанга боложо, урдаһаань һөөргэдэхэ.

³³ Арадай сэсэн мэргэшүүл олохон зондо зүб юумэ зааха. Энээнэйнгээ түлөө тэдэ нэгэ хэды сагай туршада хэһээлтэ амасан байха: заримань алуулха, шатаагдаха, баряанда туугдаха, дээрмэдүүлхэ.

³⁴ Зобожо байха үедөө тэдэ багахан туһаламжада хүртэхэ, олохон зон тэдээнтэй хамтарха, гэбэшье үнэнхэ зүрхэнһөө тиихэ бэшэ.

³⁵ Сэсэн мэргэшүүлэй заримань зоболон амасаха, иимэ аргаар тэдэ арюудхагдаха, сагааруулагдаха, Бурханай тогтооһон саг болотор энэ үргэлжэлхэ.

³⁶ Харин хаан зоргоороо юумэ үйлэдэхэ. Тэрэ бардамлажа, ехэрхэжэ, бүхы бурхадһаа дээрэб гэжэ өөрыгөө тоолодог болохо, бурхадай ехэ Бурхан тушаа дуулдаагүй муу юумэ хэлэдэг болохо. Тэрэ иигэжэ амжажа байтараа хилэнсэгтэ үдэртэ энэнь дүүрэхэ: болохо юумэн болохоороол болохо.

³⁷ Тэрэ үбгэ эсэгэнэрэйнгээ, эхэнэрнүүдэй бурхадые, юрэдөө, ямаршье бурхадые тоохогүй, гансал өөрыгөө тэдээнһээшье дээрэб гээд тоолодог байха.

³⁸ Хэрэм ханануудай бурхандал тэрэ мүргэдэг байха. Үбгэ эсэгэнэрэйнгээ мэдэхэгүй энэ бурханиие алта, мүнгөөр, үнэтэ шулуунуудаар, элдэб баян бэлэгүүдээр тэрэ хүндэлдэг байха.

³⁹ Хариин энэ бурханда шүтэдэг зоной хүсөөр тэрэ хана хэрэмүүдээ аршалха. Өөрынь засаг түлөөлгэ мэдэрэгшэдтэ тэрэ агууехэ хүндэ үзүүлхэ, олон зон дээрэ засаглаха эрхэ, шагнал болгон газар үгэхэ.

⁴⁰ Бурханай тодорхойлһон сагай эсэс болоходо урда зүгэй хаан тэрээндэ добтолхо. Теэд хойто зүгэй хаан дайшалхы тэргэнүүдээрээ, морин сэрэгээрээ, олон онгосоороо шуурган мэтэ тэрээнэй урдаһаа шуумайха. Тэрэ үер мэтэ олон орон нютагуудаар гаража,

⁴¹ нангин газар руу орожо, олон зон алуулагдаха. Гансал Эдоом, Моһааб, Аммооной олохон зон амиды мэндэ үлэхэ.

⁴² Хойто зүгэй хаан олохон орон нютагууд руу, тэрэ тоодо Египет руу, добтолон орохо.

⁴³ Нөөсэлэгдэһэн алта, мүнгэ, Египедэй бүхы баялиг гартаа абаха, Ливиин болон Эфиопиин зон хүл доронь мүлхин байха.

⁴⁴ Харин зүүн болон хойто зүгүүдһээ мэдээнүүд тэрэнэй һанаа зобоожо, угаа ехээр хилгэнтэн, олон түмэниие хюдаха, усадхаха зорилготойгоор тэрэ тиишээ шэглэхэ.

⁴⁵ Тэрэ далайн болон нангин үргөөгэй оршодог хада уулын хоорондо хаанта майхангуудаа татаха. Теэд эсэсынь ерэжэ, хэншье тэрээндэ туһалхагүй.