Амоос 3 - Библи

Израилиие шэлэн абаа, мүн хэһээхэ

¹ Израилиин улад зон, таанар тухай, Египедһээ гаргаһан бүхы обогууд тухай, Эзэнэй айладхал дуулагты!

² Дэлхэйн обогуудһаа гансал таанадые мэдэржэ байгааб. Тиимэһээ бүхы гэмэйтнай түлөө таанадыел шиидхэн асуухаб.

Лүндэншэн Эзэнэй тэрээндэ нээһэн юумые айладхадаг

³ Хоёр хүн уулзахаяа болзолдоогүй байжа хамта алхална юм аал?!

⁴ Ямаршье олзогүй байһан аад, арсалан ой соо архирдаг юм гү?! Ямаршье юумэ баряагүй аад, залуу арсалан нүхэн сооһоо архирха аал?!

⁵ Урьха соо ямаршье хоолой байхагүйдэ шубуун газарта байгаа урьха руу унан орохо юм аал?! Юунэйшье тэндэ ороогүй байтар урьха газарһаа үргэгдэхэ юм аал?!

⁶ Хото соо бүреэ үлеэхэдэ, зон шэшэрэлдэхэгүй юм гү?! Хото соо гай тодхор тохёолдобол, тэрэниие Эзэн хэһэн бэшэ юм гү?!

⁷ Үнэн дээрээ Эзэн Бурхан зарасанартаа, лүндэншэдтээ, нюусаяа нээгээгүйдээ юушье хэдэггүй.

⁸ Арсаланай архирхада хэн айхагүйб?! Эзэн Бурханай айладхахада хэн лүндэн табингүй байхаб?!

Эзэн шүүбэрилэн хэһээнэ

⁹ Ашдоодой болон Египедэй хэрэмүүд соо тунхаглыта! «Самариин хаданууд дээрэ сугларагты! Тэрээн соо боложо байгаа угаа ехэ худхаляа үймөө, дарлалтые харыт!» – гэжэ хэлыта!

¹⁰ Үнэн зүбөөр яажа ажаһуухые тэдэ мэдэдэггүй, хэрэмүүд соогоо гансал хүсэрхэл, дээрмэшэлгээр баялиг суглуулаа! – гэжэ Эзэн айладхана.

¹¹ Тиимэһээ Эзэн Бурхан иигэжэ айладхана: «Дайсан бүхы орон нютагые бүһэлхэ, хүсэ шадалыетнай бууруулха, хэрэм хотонуудтнай дээрмэшэлэгдэхэ!»

¹² Эзэн иигэжэ айладана: Хонишон арсалангай аманһаа хоёр хүл ба шэхэнэй таһархайе буляан абадаг мэтэ Самарида оршогшо израильшуудһаа гансал ороной булан ба диванай торгон үлэхэл!

¹³ Түмэн Сэрэгтэ Эзэн Бурхан иигэжэ тунхаглажа байна: Шагнагты, Яковай гэрые һэргылэгты!

¹⁴ Юуб гэбэл, Израилиие гэм зэмынь түлөө шиидхэхэ үдэртөө Би мүн лэ Бэт-Ээлэй үргэлэй шэрээнүүдыешье шиидхэхэб, үргэлэй шэрээгэй эбэрнүүд таһа татагдажа, газарта унахал!

¹⁵ Үбэлэй, зунайшье ордонгуудые сохин һандаахаб, заанай яһаар баригдаһан ордонгуудые, мантан томо ордонгуудые үгы хэхэб! Энэ болбол Би, Эзэн, айладхана мүн!