Mapisarema 92 - Bhaibheri Dzvene MuChiShona Chanhasi

Pisarema 92

Pisarema. Rwiyo rweSabata.

¹ Zvakanaka kurumbidza Jehovha nokuimbira zita renyu nziyo, imi Wokumusoro-soro,

² kuparidza rudo rwenyu mangwanani nokutendeka kwenyu usiku,

³ nechiridzwa chine hungiso gumi namaririro akanaka embira.

⁴ Nokuti munondifadza namabasa enyu, imi Jehovha; ndinoimba nomufaro nokuda kwamabasa amaoko enyu.

⁵ Haiwa Jehovha, mabasa enyu makuru seiko, ndangariro dzenyu dzakadzika sei!

⁶ Munhu asina njere haazivi, mapenzi haanzwisisi,

⁷ kuti kunyange vakaipa vachimera souswa, uye vaiti vezvakaipa vose vachikura, vachaparadzwa nokusingaperi.

⁸ Asi imi, iyemi Jehovha, munosimudzirwa nokusingaperi.

⁹ Nokuti zvirokwazvo vavengi venyu, imi Jehovha, zvirokwazvo vavengi venyu vachaparadzwa; vaiti vezvakaipa vose vachaparadzirwa.

¹⁰ Makasimudzira runyanga rwangu sorwenyati; mafuta akaisvonaka akadururirwa pamusoro pangu.

¹¹ Meso angu akaona kukundwa kwavadzivisi vangu; nzeve dzangu dzakanzwa kuparadzwa kwavavengi vangu vakaipa.

¹² Vakarurama vachakura kwazvo somuchindwe, vachakura somusidhari weRebhanoni;

¹³ wakadyarwa muimba yaJehovha, vachakura kwazvo muvanze dzaMwari wedu.

¹⁴ Vacharamba vachibereka zvibereko pakukwegura kwavo, vachagara vari vanyoro uye vari vatsva.

¹⁵ Vachaparidza kuti, “Jehovha akarurama; ndiye Dombo rangu, uye maari hamuna chakaipa.”