Mapisarema 87 - Bhaibheri Dzvene MuChiShona Chanhasi

Pisarema 87

Zvavanakomana vaKora. Pisarema. Rwiyo.

¹ Akateya nheyo dzake pagomo dzvene;

² Jehovha anoda masuo eZioni kupfuura pose panogara Jakobho.

³ Zvinhu zvakaisvonaka zvinotaurwa pamusoro pako, iwe guta raMwari: Sera

⁴ “Ndichanyora nezvaRahabhi neBhabhironi pakati pavanondiziva, neFiristiawo neTire, pamwe chete neEtiopia, uye vachati, ‘Uyu akaberekerwa muZioni.’ ”

⁵ Zvirokwazvo, pamusoro peZioni vachati, “Uyu nowoyo vakaberekerwamo, uye Wokumusoro-soro pachake acharisimbisa.”

⁶ Jehovha achanyora panonyorwa mazita amarudzi, kuti, “Uyu akaberekerwa muZioni.” Sera

⁷ Pavanoimba, vachaimba vachiti, “Matsime angu ose ari mamuri.”