Mapisarema 85 - Bhaibheri Dzvene MuChiShona Chanhasi

Pisarema 85

Kumutungamiri wokuimba waVanakomana vaKora. Pisarema.

¹ Makanzwira nyasha nyika yenyu, imi Jehovha; makadzosera Jakobho nhaka yake.

² Makakanganwira kutadza kwavanhu venyu, uye mukafukidza zvivi zvavo zvose. Sera

³ Makaisa parutivi hasha dzenyu dzose, mukadzoka pakutsamwa kwenyu kunotyisa.

⁴ Tidzoreizve, imi Mwari Muponesi wedu, mugoisa kure nemi kusafara kwenyu pamusoro pedu.

⁵ Mucharamba makatitsamwira nokusingaperi here? Mucharega kutsamwa kwenyu kuripo kusvikira kuzvizvarwa zvose here?

⁶ Ko, hamungatimutsiridzizve here, kuti vanhu venyu vagofara mamuri?

⁷ Tiratidzei ngoni dzenyu, imi Jehovha, mugotipawo ruponeso rwenyu.

⁸ Ndichateerera zvichataurwa naJehovha Mwari; anovimbisa rugare kuvanhu vake, vatsvene vake, asi ngavasadzokerazve kuupenzi.

⁹ Chokwadi, ruponeso rwake rwuri pedyo navanomutya, kuti kubwinya kwake kugogara munyika yedu.

¹⁰ Rudo nokutendeka zvinosangana pamwe chete; kururama norugare zvinosvetana.

¹¹ Kutendeka kunomera panyika, kururama kunotarira pasi kuri kudenga.

¹² Chokwadi, Jehovha achapa zvinhu zvakanaka, uye nyika yedu ichabereka mukoho wayo.

¹³ Kururama kuchamutungamirira, uye kuchamugadzirira nzira yetsoka dzake.