Mapisarema 82 - Bhaibheri Dzvene MuChiShona Chanhasi

Pisarema 82

Pisarema raAsafi.

¹ Mwari anogara paungano huru; anotonga pakati pa“vamwari” achiti,

² “Muchasvika riniko muchirwira vasakarurama uye muchisanangura vanhu vakaipa? Sera

³ Tongai mhaka dzavasina simba nenherera; chengetedzai kodzero dzavarombo navakadzvinyirirwa.

⁴ Nunurai vasina simba navanoshayiwa; varwirei paruoko rwowakaipa.

⁵ “Havana chavanoziva, havana chavanonzwisisa. Vanongofamba-famba murima; nheyo dzose dzenyika dzinozungunuswa.

⁶ “Ndakati, ‘Muri vamwari; imi mose muri vanakomana veWokumusoro-soro.’

⁷ Asi muchafa savanhuwo zvavo; muchawa savatongi vose.”

⁸ Simukai, imi Mwari, mutonge nyika, nokuti ndudzi dzose inhaka yenyu.