Tobite 6 - MUKANDA WA MYIDI MUKULU

Dikuata dia mushipa munene

¹ Nsongalume kumata mu njila, pamue ne mutumibue wa Mvidi Mukulu, mbua uvua kumbelu kubatua mu nyima. Kuyabu bonsu babidi. Butuku bua kumpala kulalabu mu mitanda ya ku muelelu wa musulu wa Tigre.

² Nsongalume kupueka ku musulu bua kuowa mayi ku makasa. Mushipa munene kupatuka, utupika mu mayi, musue kumumina dikasa. Tobiyase kuela lubila lukole.

³ Mutumibue wa Mvidi Mukulu kumuambila ne: — Kuata mushipa awu, uulame bimpe. Tobiyase kukuata mushipa awu, kuukokela ku muelelu wa mayi.

⁴ Mutumibue kuambila Tobiyase ne: — Panda mushipa awu munda, upatule kanyonga, muoyi ne mutshima, ubiteke ku luseke, pashishe wimanshe bia munda. Kanyonga ne muoyi kabidi ne mutshima bidi buanga budi buambuluisha menemene.

⁵ Tobiyase kupanda mushipa, kupatula kanyonga, kupatula muoyi ne mutshima, pashishe kukangaye pa kapia mabulu a munyinyi, kudiaye. Bivua bishale kuelaye mu luepu bua kubilama.

⁶ Bobu kutungunuka ne luendu too ne pepi ne mikalu ya ditunga dia Madayi.

⁷ Pavuabu baya, Tobiyase kuebeja mutumibue wa Mvidi Mukulu ne: — Muanetu Azarya, mu mutshima, muoyi ne mu kanyonga bia mushipa ewu, mudi buanga bua mushindu kaayi?

⁸ Mutumibue kuandamuna ne: — Padi Satane nansha mukishi mubi utatshisha muntu mulume nansha muntu mukaji, bantu badi boshila muoyi ne mutshima bia mushipa ewu ku mesu kua mulume nansha kua mukaji bobu batangila. Muinshi udi ubanda awu, udi wipata mukishi mubi. Badi banyenga muntu awu mu bianza biende kashidi.

⁹ Kadi bua kanyonga, kadi kambuluisha muntu udi ne nsonga mu mesu. Badi bakalaba mu mesu, bela mupuya pa nsonga ayi, pashishe nsonga ya muntu awu idi ijika!

Rafayele udi ubela Tobiyase bua kuselaye Sara

¹⁰ Kufikabu mu Madayi, padibu basemena pabuipi ne Ekbatane,

¹¹ Rafayele kuambila Tobiyase ne: — Unteleje bimpe, muanetu Tobiyase. Yeye kumukonka ne: — Ntshinyi? Mutumibue wa Mvidi Mukulu kuamba kabidi ne: — Butuku ebu tudi ne bua kulala kua Raguwele, bualu ntatuebe mukuabu. Udi ne muana wa bakaji diende Sara.

¹² Udi amu ne Sara nkayende, kena ne munga muana wa balume nansha wa bakaji. Kadi wewe udi muanabu ne Sara menemene. Amu wewe ke udi mua kusela Sara nansha kupiana bintu bia tatuende. Sara nnsongakaji wa lungenyi, wa muoyi mukole ne mpala muimpe. Kabidi tatuende mmuntu wa malu makane.

¹³ Bidi biakane bua wewe kumusela. Unteleje bimpe, mulunda wanyi musuibue, bituadija ku dilolu edi, bua nsongakaji ewu, nenyukile ne tatuende, bua patudi mpingana ku Raguyese, menze tshibilu tshia dibaka. Ndi mujadike ne: Raguwele kena mua kubenga mua wewe kusela muanende to. Kabidi kena mua kumuselesha kudi munga mulume nansha. Bualu bilondeshile mikenji ya Moshe, badi mua kumufundila tshibawu tshia lufu. Yeye kabidi mmumanye ne: mbafunde ne muanende wa bakaji udi ne bua kuikala kuudi bangabanga kayi muanji kuya kudi balume bakuabu. Nanku, unteleje bimpe mulunda wanyi musuibue, bituadija dilolu edi, Raguwele ne meme netuyukidilangane bua nsongakaji ewu. Netumukonke bua umusele. Patuikala bapingane ku Raguyese, netuye nende, netumufile kuebe.

¹⁴ Tobiyase kuandamuna ne: — Azarya musuibue, mvua mumvue bantu bamba ne: Sara uvua mutua ku mabaka muanda mutekete. Babayende bonsu abu bavua bafuila amu mu tshibambalu tshiyuabu ne bua kuangatangana. Butuku bujima, pa-vuabu basue kumuangata, bavua bafua. Kabidi bavua bangambila ne: Satane ke uvua ubashipa awu.

¹⁵ Ke pandi ne bowa. Satane kena utatshisha nsongakaji to. Kadi udi amu ushipa mulume yonsu udi ukeba kubuelela nsongakaji awu mu nzubu. Meme ndi mulela nkaya. Meme mufue, nembungamije baledi banyi, nembafikishe ne ku lufu. Bobu kabena nansha ne muana mukuabu wa balume udi mua kubajika.

¹⁶ Rafayele kuamba kabidi ne: — Kuena muvuluke muvua tatuebe mukuambile ne: udi mua kusela amu muana wa tatuebe mukuabu anyi? Nanku, unteleje mulunda wanyi, kuena mua kupampakana bua Satane awu, usele amu Sara. Ndi mushindike ne: nebakupesheye dilolu edi.

¹⁷ Nenku diba dinuabuela mu nzubu bua kulala, wangata kapese ka mutshima ne ka muoyi bia mushipa, ubiele mu mbabula wa tshioshedi tshia manananshi. Mupuya wabi neumuangalake mu nzubu. Padi mukishi umvua mupuya awu, neunyeme lubilu, kawena upingana kabidi bua kunutatshisha to.

¹⁸ Padi diba dia nuenu kuangatangana dikumbana, bangabanga nujuke bonsu babidi, nutendelele Maweja-Nangila Muena Kulu, bua anufuile luse kabidi anulame. Kutshinyi to. Amu wewe ke uvua mufundila nsongakaji ewu, kabidi wewe ke udi ne bua kumupandisha. Neakulamate, ndi nkujadikila ne: neakulelele bana bawangata ne mushinga mupite. Kupampakanyi to.

¹⁹ Nenku Tobiyase mumane kumvua bionsu biamuambidi Rafayele ne: nsongakaji ewu mmuena tshisamba tshienu, kabidi mmuana wa tatuebe mukuabu, kutuadijaye diakamue kumunanga bikole, muoyi wende uvua amu kudiye.