3 एहुना 1 - Korwa Bible

सलाम

¹ ईंग मूक होड़, सतायिंग दुलारगेयतना ईंगरीग सउंगता गयूस लगा नाःआ चिठीयिंग ओओजाःतना।

² ईंगरीग सउंगता, आमराः जीव भगवानराः ओंगोल इया नपाय दोहोनता, हना इया आमराः जमा बरानाः जिनिस बगरा जुवाः अरू नाय नपायतेम दोहोन लगा भगवान एचेरेयिंग अरजीतना।

³ आम अगीते ईंग एचेरेकू वेगकिया हँकुःआ बिसवासी होड़कू कता उदुःतेरा, गयूस सताय सरवनराः बिसवासगेयीग होड़े दोहोना अरू हना सताय सरवन इयाय जियाःतना, माःआन। नाःआ बड़रा अयूमकेडखन ईंगराः जीव मुरुक बहालयना।

⁴ आम अरू एटाः बिसवासी होड़कू सताय सरवन इयापे जियाःतना। हनालगा अपे ईंगराः जीव मुरुकपे बहालगोतेडा।

नेत-नेवारकू अरू सेवा देंगवाकू लगा सलाह

⁵ ने ईंगरीग सउंगता, बिसवासी होड़कू आम लगा भुलिया होड़कू दोहोन होले हों संघरा एमेवाकू लगा बिसवासगेयीग होड़मे दोहोनतना। हना दो ननपाय हवे।

⁶ हँकुःआ होड़कू नंडाकुःआ कलसियारिकुःआ होड़कू एचेरे आम करा इया हँकूम दुलारकेरा हना बदीरेकू कता उदुःतेरा। हँकुःआ होड़कू आम एचेरे अरूकू वेग दो हनमेला भगवानरिकुःआ होड़कू सुदा करा इया एएचे इदा हनन इया एचेकेडखन नँकू नपायतेम वारगोडकू।

⁷ नँकुःआ होड़कू ईसूराः सेवा लगा अँकू ओड़ाः अते एटाः एटाः देसकू सेनता अरू बेगर बिसवासी होड़कू अते तोनोंग इयाःआ संघरा ओरोकू गोःतेरा।

⁸ हनालगा अबू बिसवासी होड़कू नँकुःआ होड़कू नेत-नेवारकेडखन जमा इयाःआ संघरा एमेवाकू लगा इदा। नाःआते अबू हों हँकुःआ होड़कू सुदा सतायराः सेवा देंगवा होड़कूबू होयाःता।

⁹ ईंग कलसियारिकुःआ होड़कू लगा तोनोंग तोनोंगिंग ओजाःकेरा। हँकुःआ होड़कू अते दियुतिरुपेस ञावीग होड़ जमाकू अते मरंग बड़ाँः लगाय चहाःतना अरू हाँय ईंगराः कता मेरेय मनाःता।

¹⁰ हाँय एटाः होड़कू एचेरे बेलूर ओंगोलते अले बदीरे बड़राय बहकावगोड ञवनता। हनाते हों हाँय मेरेय राजूगान अरू हाँय बिसवासी होड़कू मेरेय नेत-नेवारकूतना। एटाः होड़कूकू नेत-नेवारता हँकुःआ होड़कूय रोंकावतना अरू हँकुःआ होड़कू कलसियारिकुःआ होड़कू अते एटाःगोडकूतनाय। हनालगा ईंग हंडा सेने दो हाँय एचेकेरा हना जमाकूनिंग उहियार अगूयता।

¹¹ ने ईंग सउंगता, तोनोंगीग होड़राः बेलूर लूर-नेवन इया अलोम जियाः, मनदो नपाय लूर-नेवनतेकुःआ होड़कू इयाम जियाः। तोनोंगीग होड़ नपाय नपाय बुताय एचेयता हाँय भगवानरीग होड़ हवे। मनदो बेलूर बुताय बुताता हाँयग होड़ भगवान कहियो मेरेय ञेलगरिया।

¹² कलसियारिकुःआ जमा होड़कू दिमेतिरियूस बदीरे नपाय नपायकू कतायता। अरू हाँय भगवानराः सताय सरवन इयाय जियाःतना। अले हों हाँय बदीरे नपाय हिदइतले एमेयतना अरू आम सुदीयतना अलेराः हिदइत सताय इदा।

टुटीग कताकून

¹³ आम लगा मुरुक बड़रा ओओजाः लगा इदा। मनदो ईंग चिठीरे ओरोयिंग ओजाःतेरा।

¹⁴ आम सुदा ओहेन जुमाः लगायिंग असरागेतना। हननमेला आम सुदा मुहा-मूहिंग बुतुड़ुता।

¹⁵ भगवान आम सलसतरेय दोहोम। नंडाकुःआ जमा सउंगताकू आमकू सलामतना। हंडाकुःआ जमा होड़कू मेमेड होड़ मेमेड होड़ ईंग अगीतेम सलामगोडकू।