1 एहुना 1 - Korwa Bible

जीव एमेता हना सरवन

¹ ने अजी बोपोहकूतिंग, जीव एमेता हना सरवन जूग परियाते दोहोना अरू ननाः बदीरे अपे लगाले ओजाःगेतना। अले हनानाः सरवन अँननलेराः मेडतेले ञेलतेरा अरूले अयूमतेरा, अले अँननलेराः तिःईतेले टोँवावतेरा।

² अरू हनानाः जीव अनँयग आँयगते एचे ञेलयान अरूले ञेलतेरा अरू हिदइतदारकूले बड़ाँवयना। नननलगा अपात भगवान सुदा दोहोना, अरू नुँहू अबू लगा एचे ञेलकेरा ओरो टुटीगनेना हना जीव बदीरे अपे एचेरेले कतायतना।

³ अले ञेलकेरा अरूले अयूमकेरा, हनानाः अपे एचेरे होंले कतायतना, जेमहा अपे अले सुदापे मिनी जुवाः। अरू अले हों अबूरीग अपांग भगवान अरू आँयगरीग बेटात ईसू मसी सुदा मिनी इदानलेःआ।

⁴ नाःआ कताते अबू जमालेःआते बहालगुः लगाले ओओजाःतना।

भगवान मरसल इदानिया

⁵ भगवान मरसल इदानिया अरू हाँय एचेरे अंदरा इया तोनोंगाः कोनोवानेःआ। नानाः सरवन अले हाँय अतेले अयूमकेरा अरू अपे एचेरेले कता उदुःगेतना।

⁶ अबू अंदरारे दोहोन इया बेलूर बुताबू एचे ञवनता अरूबू कतायता, अले भगवान सुदा मिनी इदानलेःआ माःआन दो, अबू लबरातना अरू अबू सताय कता इया मेरबू सलाःतना।

⁷ मनदो भगवान मरसल इदानिया अरू अबू मरसल इया नपायबू जियाःता दो, अबू अँननबू अबू मिनी इदानबुःआ अरू भगवानरीग बेटात ईसूराः बलंगीते अबूराः जीव अते जमा कसूरकूने बुहाल अमिंगगोडता।

⁸ अबू अँननबूराः बदीरेबू कतायता, ईंग मेरिंग कसूरगरा, माःआन दो अबू अँननबू अडिग जोमता अरू अबूराः जीवरे सताय कता कोवानेःआ।

⁹ भगवान सताय अरू बिसवासगेयीग इदानिया। नानाः लगा अबू भगवान एचेरे सेनेकियानखनबू बकाःता, ईंग कसूरकिरिंग, माःआन, दो हाँय अबूराः कसूरे बराव एंडागोडता अरू जमा बरानाः गारबार अबूराः जीव अतेय अमिंगगोडता।

¹⁰ अबू कतायता, अले तोनोंगाः कसूर मेरले एचेगरा माःआन दो, अबू भगवान लबरा होड़ इदानिया माःआनबू कतावायता अरू हाँयराः कता मेरबू मनेवाता।