Jemisi 2 - BAṈARA KO VAIRU AMA LEVELEVEO

Ijatinia paṉaekinio

¹ A lolo poso mela, meta mevai oquani mela vo animevo Lekasa Jisu Karisito, vo ṉaṉaidara kala Baṉara, so sole meta pui tama paṉao kake pala ni mai masapo kake seko kupekupe ama melo ko pitasimo kale.

² Esa kala batiro ala maba vo o kiakani ko qolo riṉi ni ileile ama suma poso ta o kilou meko lotu padoilo kale, ni kala ozaoza kala maba ruajaruaja sabosabo sala ta mata o kilou.

³ Nio meta meda va matu paṉaovou voa maba vo o uria saboivani ni kala me azo ta eri kiovou vokasi, “Papi komia uri ama papupapu topi,” melai vota eri kiovou vo ozaoza kala maba kasi, “Loje sai, ma papi koi sapesape topi aṉako kiti kasi,” kiovou.

⁴ Sokale meta kuirikuiria mela meko tama paṉao kale kake pala meko ruqe ama kerukeru ko pitoto kale.

⁵ Lolo poso, me a roquemelani mela, meta viqomo! Vo Baṉara ta lula o pitoema se peuru ma peuru kale ama ozaoza kamu tu seta piza kama oqu saṉa ke elo ni jiku ke iko vo Baṉara oma inainaekako quli voko lekasa puo kale seke roquevani vo.

⁶ Melai meta me quratima se ozaoza kamu! Sea batiro amu inio tapata ke imelani me ni ke melati olani me titizato kale!

⁷ Se batiro amu inio ko se, seke ruqe kasekani vo Jisu ko raura kama ṉi ko lula ko katiziako mekasi.

⁸ Meta me zorikou tuvevo avole vo Baṉara ko lekasa puo ko bazu, koko kaseivako Tabu ama Riki kale, ko eri, “Meta roquemomo kiadamu omadeuvo me ṉavi me roquiva jari,” ko ikio ko sidopu ko ereko.

⁹ Melai meta meda ma paṉaovou se maba poso seko topi ama melo kale pala ta, meta kuirikuiria mela inio sarueko poso kale, ni vo Baṉara ko bazu ta ko melai kuirikou ta me inio bazu me niumaekani mela.

¹⁰ Ako vo o bikoirikani omadeu pado bazu ta o koa ko kuiripato omadeuvo koa kiadama o bikoirikani jari.

¹¹ Ako voa omadeula Baṉara inio o kasekani, “Pui zavemato,” ni so jari, “Pui ereko ko vouvato,” so sole pui mebe zavematou melai, me inio bazu me bikoirikani mela vouvato ko kio kale.

¹² Meta uria pesimo uri ama kalo sate, ako meta maba madu ko rupasimako bazu kale inio me ditiziovou sole.

¹³ Ako vo Baṉara ta pui opa katimou ko akoekato sama roquano voko titizimo keru, se pui ke katimani ko akoekato sama roquano edolomu, melai seke katimani ko akoekato sama roquano edolomu ta pui opa titizimou vo Baṉara.

¹⁴ Me a lolo poso mela, pui uri tu kala ta eri kiovou, aṉata oqu salala kiovou, melai voko iruruputo poso ta pui ko kasa pueka ko oqu. Soama oqu ta maba pui kopa roveovou pakievo vo.

¹⁵ Esa kama lotu tamania poso ta ruajaruaja suma kamu ni luapiluapi amu.

¹⁶ Pui uri tu meta eri ma kio se, “Baṉara ta mauru o imelou me! Olamo pade kasi suma kovole ni pa uria keazatomo!” puliako me katimo se saevo ko korotikako quli.

¹⁷ Soama oqu ta puliama iruruputo sama ni kota vouma ni utu ama.

¹⁸ Melai esa kala ta eri kiovou, “Kala ta oqu sala, kala ta iruruputo sala.” Aṉako opato ta eri, “Ṉota pui ṉoba roveovou la kasevo kala maba vo o ṉeamukani ko iruruputo pide ama oqu. Melai aṉata aṉa kasekou aṉako oqu aṉako iruruputo kale.”

¹⁹ Ṉota ṉo duvevo pueka ta omadeu Baṉara ta inevoana kio? So ta uri jari— melai ko ziolo poso melai ke tuvevo pueka ko so—melai seta keta matu ṉava, ako soama tuvevo puto ta puju ama sole.

²⁰ Ṉoa sarubea laṉa! Ṉota ṉoqai zaria tu aṉata kasa a iko koa oqu iruruputo pide ama ta vouma, kio? Ta eri nio.

²¹ Vo animevo taite Ebarahami sidopu okai evevo vo Baṉara kasi ta voko iruruputo kale inio, so keru vo opa puarivo kiove keru vovo meqora Aisake siqato ko sara topi.

²² Ṉota pui ṉoqai nianiia, kio? Voko oqu ni iruruputo poso ta omadeu ko eve, voko oqu ta okotoma ko eve voko iruruputo poso kale.

²³ Ni ko Tabu ama Riki ta tuvevo ko evake so kikovema, “Ebarahami ta o ṉeamuve vo Baṉara, ni voko oqu kale Baṉara ta ovai nokaekake ta vota sidopu ala.” So sole vo Ebarahami ta Baṉara vo baerebaere va kikelake.

²⁴ Meta paqumukomo muli, ko iruruputo poso kale inio vo maba ta sidopu o eva Baṉara kasi, pui voko oqu kale pala ko kiada.

²⁵ Omadeuvo koko ereima kama pado reko kasi, sasave ko evema kuleto, Rehabi ṉi sama. Kota sidopu ko evake Baṉara kasi koko erekema quli kale, koko baroekimo ni koko soroemo kale se Izireli ama soukori madu edoloma keve kale kude.

²⁶ So inio, ko auvana pide ama tupu ta vouma, ni so jari nio ko iruruputo pide ama oqu ta mata vouma.