1 थिस्सलुनीकियो 1 - बारेली पावरी

सुभेच्छा

¹ पौलुस एने सिलवानुस एने तीमथी जुव गोथू थेस्सलुनीका काजे मंडवीन नावे जो परमेश्वर बास एने प्रभू येसु मसिहमा छे; दया एने शांती तुमुक जोळती रोये.

थिस्सलुनीकियोन वारलो उदाहरण

² आमु आमरी प्रार्थना तुमरी फोम कोरतेला एने बासोन सामने तुमरा भुरसान आखान बारामा परमेश्वरोन धन्यवाद कोरतेला,

³ एने आपना परमेश्वर एने बासोन सामने तुमरा भुरसान काम, एने मोंगोन मेहनत एने आपना प्रभू येसु मसिहमा आसोन धीरोज काजे एक सारखा फोम कोरतेला.

⁴ हे भाशो परमेश्वरोन मोंगावा माणसे, आमुक मालूम छे कि तुमु नेवाळलान छे.

⁵ काहाकि आमरी वारली खोबर तुमरेनचा निस्तो बुलोमा नि पुन ताकत एने पवित्र आत्मा एने मोटला पाका वातो पुठी पुगलो छे; जोसो तुमुक मालूम होयो कि आमु तुमरा इनाम कोसा बोन गोयला होता.

⁶ तुमु मोटा तोकलीतमा, पवित्र आत्मान खुशी पुठी, वचन काजे मानीन आमरी एने प्रभून तोसी चाल चालने बाज गोया.

⁷ या तोक मकीदुनीया एने अखायान विश्वासीन कोरीन तुमु आदर्श बोने.

⁸ काहाकि तुमरेनचा गोथा जी मकीदुनीया एने अखायामा प्रभून वचन सोमवाळ्या बाकीन तुमरा भुरसान जो परमेश्वर पोर छे, हर जागे ओसी वात पोसरी गोयली कि आमुक कोयनेन जोरुरत नि होय.

⁹ काहाकि चे खुद आमरा बारामा कोयतेला कि तुमरेनचा आमरो आवनो कोसो होयो; तुमु कोसा मूर्तीनचा गोथा परमेश्वर भूनी फिऱ्या काहाकि जीवतला एने खोरला परमेश्वरोन सेवा कोर.

¹⁰ एने तेरा पुऱ्यान सोरगोपोर गोथू आवनेन वाट जुवता रोयू जीनाक चू मोरलामा गोथू जीवाळ्यु, मतलब येसुन, जो आवने वावा मोटला दोंडोन गोथो वाचाडलो छे.