Yirmeya 4:13 - MUKANDA WA MYIDI MUKULU

¹³ Monayi mubishi udi ubanda, bu mavuba a mvula wa tshipupu. Matempu ende a mvita adi anyema lubilu bu mvunde. Nyama yende ya tubalu idi inyema mipite nyunyi wa tshiminyi ku lubilu. Tuajiminyi, tuabutuku!

Mukanda wa Nzambi Dihungila Dikulukulu ne Dihungila Dihia-dihia 2003

¹³ Monai! Yeye udi ubandaku bu mudi matutu abanda, makalu andi a nvita nende lubilu bu nvunde; tubalu tuandi tudi tuhita nyunyu ya mikanku lubilu. Mulau udi utukuata! Bualu bua tuakubutuka.

Yirmeya 4:13 교차 참조

2 Samuele 1:23

Matuku abu onsu Shawule ne Yonatane bavua banangangana bikole. Dia lufu luabu, kabena bashiyangana. Bavua banyema lubilu, bapite biminyi. Bukitu buabu buvua bupite bua ntambue.

Yeshaya 13:5

Badi batumina ku matunga a kulekule, muaba udi diulu ne buloba bituangene, bua kuya kunyanga ditunga dijima: ke Maweja-Nangila ne badiye muangate, bua kunyoka bantu ba buloba bujima.

Yeshaya 19:1

Badi bamanyisha malu adi atangila “Ejipitu”. Maweja-Nangila ukadi ufika mu Ejipitu, muimane pa divuba didi diya lukasa. Mvidie ya tshianana ya mu Ejipitu, neizakale kumpala kuende. Bena Ejipitu nebatekete mu maboku.

Yeshaya 3:8

Yerushalayime mmubutuke, Yuda mmudishinde panshi. Bualu bidi bena Yuda bamba, ne bidibu benza, bidi amu bileja mudibu babenga Maweja-Nangila, bamutuila nkanana.

Yeshaya 5:28

Mikete yatshi idi minona bimpe, mata adi mamana kunana. Tubalu tuatshi, tudi ne bikonu bikole bu mabue. Nkata ya matempu atshi, idi inyema lubilu mifuane mvunde.

Yeshaya 66:15

Tangilayi Maweja-Nangila udi ufika mu kapia. Matempu ende a mvita adi afika bu mvula wa tshipupu. Maweja-Nangila mmuwule ne kanyinganyinga, udi ufika bua kujikija tshiji tshiende, kukumbaja mu ndimi ya kapia bivuaye muambile bantu ne mikanu.

Yirmeya 10:19

Eyi ndi ndila, dikenga ndintonde. Kabena mua kuondapa mputa yanyi minene. Meme kuela meji ne: dikenga ki ndinene menemene to. Ndi mua kudiunwua ne lutulu.

Yirmeya 4:12

Lupepele ludi lufuma luseke alu ku diyi dianyi, nebikale lukole lupite. Mpindiewu ndi musue kunulumbuluisha.”

Yirmeya 4:31

Ndi mumvue muadi bu wa mukaji ukeba kulela, mikemu ya nsongakaji udi ukeba kulela muanende wa kumpala. Lubila alu ndua Siyone, udi utua mikemu, utendakana, muolole bianza ne: “Eyi, nungambuluishe, bakadi banshipa!”

Yirmeya 46:18

— Mukalenga udibu babikila ne: “Maweja-Nangila wa bukole buonsu”, udi wamba uditshipa ne: Bu mundi ne muoyi bulelela, bu mudi mukuna wa Tabore munkatshi mua mikuna mikuabu, bu mudi mukuna wa Karmele mupite mayi manene bule. muluishi neafike munkatshi muenu ne bukole bupite.

Yirmeya 48:40

Maweja-Nangila udi wamba ne: “Baluishi badi bajemba padi bena Mowabe, mudi nyunyi ya mikanku ijemba mulu.”

Yirmeya 49:22

Baluishi nebatantshile pabuipi ne Bosra mudi nyunyi wa mukanku ujinguluka mulu. Dituku adi, bilobu bia mvita bia bena Edome nebikenge bu mukaji udi pa lulelu.

Yirmeya 6:23

Bena mvita ba mu tshisamba atshi badi ne buta bua mikete ne misongolu, badi ne tshikisu kabayi ne luse. Badi benza mutoyi bu tshiona tshia mayi manene. Badi babanda pa nyama ya tubalu, bamane kudilongolola bua kubanga mvita, bamane kuela mualu wa mvita, bua kukuluisha wewe, Siyone!

Yirmeya 9:19

Nanku, nuenu bakaji, telejayi diyi dia Maweja-Nangila. Telejayi tshidiye wamba. Longeshayi bana benu ba bakaji mua kuela muyenga. Nsongakaji yonsu alongeshe muena mutumba nende, mudi kudila mushindu ewu:

Muadi 4:19

Batukengeshi betu badi ne lubilu lupite lua nyunyi wa tshiminyi udi ubuka mulu. Badi batuipata pa mikuna, batualamina miaba idi kayiyi bantu.

Yezekiyele 26:10

Lupuishi ludi tubalu tuabu tua bungi tujule panshi nelukubuikile. Bimana biebe nebizakale ne mikuma ya nyama ya tubalu, kabidi ne mutoyi wa matempu abu a mvita. Nanku, nebabuele ku biibi biebe, anu bu mudibu babuela mu tshimenga padibu bamane kushimbula tshitupa tshia tshimana tshia tshimenga.

Yezekiyele 38:9

Kadi wewe Ngoge Mubaluishe ne tshiluilu tshiebe, kabidi ne bantu ba mu bisamba bikuabu baudi nabu. Neubuele ne mvita mu ditunga diabu ne lubilu bu lua mvula wa tshipupu. Newikale bu matuba adi abuikila ditunga diabu.

Danyele 11:40

“Mu tshikondu tshia ku nshikidilu, mukalenga wa ditunga dia kuinshi neabangulule mvita. Kadi mukalenga wa ditunga dia ku mutu neamupishe ne matempu a mvita, ne badi babanda pa nyama ya tubalu, kabidi ne matu mavule a mvita. Neabuele mu matunga mashilangane ne bena mvita bende. Neasambuke mikalu, bu mudi mayi a musulu apasalala.

Danyele 7:4

Nyama wa kumpala uvua mufuanangane ne ntambue, kadi uvua ne mapuapua bu nyunyi wa tshiminyi. Pantshivua mutangile, kutulabu mapuapua ende. Kumuelabu panshi, kumuimanyika pa mikonu ibidi ya nyima bu muntu. Kupetaye lungenyi lua muntu.

Osheya 8:1

Maweja-Nangila udi ungambila ne: Ela mpungi ya myita! Ela bibingu! Baluishi badi babuela mu ditunga dia Maweja-Nangila, bu nyunyi ya tshiminyi. Bualu Maweja-Nangila udi wamba ne: “Bena Izrayele mbanyange ndondu umvua mutue nabu. Kabena balonda mikenji yanyi.

Mika 2:4

Tshikondu atshi, nebimbe musambu, nebanuelele kasala ka muadi ne; “Eyi! Mbatubutule bonsu. Mbanyenge tshisamba tshietu maloba atshi. Badi batuipata mu madimi etu, badi baabanyangana. Mbatunyenge bintu bietu bua tshinyi?”

Nahume 1:3

Maweja-Nangila kena ufika munda lukasa, udi ne bukole bupite. Kadi kena ubingisha muntu udi mupile. Padi Maweja-Nangila wenda, tshipepele tshikole tshidi tshijuka. Mavuba ke lupuishi ludiye ujula padiye wenda.

Abakuke 1:8

Nyama yabu ya tubalu mmipite ya nkashama ku lubilu. Idi ne lonji lupite lua nyama ya bimungu idi yenda ne nzala. Babandi babu ba pa tubalu, badi bafumina kule, benda batupika. Badi ne lubilu bu lua nyunyu ya mikanku, idi imona nyama wa kudia, yikila ne lukuka pambidi pende.

Zekâya 6:1

Maweja-Nangila kundeja kabidi bualu bukuabu. Meme kumona matempu a mvita anayi apatukila pankatshi pa mikuna ibidi ya tshiamu tshikunze.

Matayi 24:30

Tshimanyinu tshia Muana wa muntu netshimueneke mulu. Bisamba bionsu bia pa buloba nebidile miadi. Nebimone Muana wa muntu utuluka mu mavuba, ne bukole bua bungi, kabidi ne butumbi buonsu.

Dielulula 28:49

Maweja-Nangila neanutumine baluishi, bafume kule ku ndekelu wa buloba, banudi kanuyi bamanye muakulu wabu. Maweja-Nangila neele bantu abu munkatshi muenu, bu mudi nyunyi wa tshiminyi wikila pa biakudia biende.

Didimanyisha 1:7

Tangila: udi upueka mu mavuba! Bantu bonsu nebamumone, nansha bavua bamutubule mubidi. Bisamba bionsu bia pa buloba nebidile muadi bualu buende. Eyowa, nebikale nanku! Amene.