Yezekiyele 8:3 - MUKANDA WA MYIDI MUKULU

³ Tshintu atshi kuolola tshintu bu tshianza, kunkuata ku nsuki. Nanku, pavua Mvidi Mukulu undeja bionsu ebi, meme kumvua Mueyelu wende ungambula mulu mu kapepe, kuya kuntuluila mu Yerushalayime. Uvua muntuluile munda mua tshimenga, pabuipi ne tshiibi tshia tshimenga tshidi luseke lua ku mutu, muaba uvuabu bateke kabidi lupingu ludi lufikisha Mvidi Mukulu munda.

Mukanda wa Nzambi Dihungila Dikulukulu ne Dihungila Dihia-dihia 2003

³ Yeye wakolola tshinfuanyi tshia tshianza, wakankuata ku tshisuba tshia nsuki ya ku mutu kuanyi; Nyuma wakambisha mulu hankatshi ha buloba ne diulu, wakaya nʼanyi mu bikena kumona bia Nzambi to ne ku Yelushalema, ku tshibi tshia ku tshibuelelu tshia ku luseke lua node tshidi tshibuela mu tshiendelu tshia munda mua ntempelo, kuakadi luhingu lua mukau, ludi lusonsola mukau.

Yezekiyele 8:3 교차 참조

1 Bakalenga 18:12

Kadi, patuikala bashiyangana nebe, Mueyelu wa Maweja-Nangila neuye nebe muaba mukuabu undi tshiyi mumanye. Pangikala mumane kuambila Akabe ne: muambi Eliya wafiki, pikalabu kabayi bakumona, nebanshipe! Meme Obadya ndi ngitaba Maweja-Nangila muanyi muonsu, biangatshile ku buana buanyi.

2 Bakalenga 16:14

Pashishe kumushaye tshilambuilu tshia tshiamu tshikunze tshivuabu bajidile mu dina dia Maweja-Nangila. Tshilambuilu atshi, tshivua pabuipi ne mushiku wa nzubu wa Mvidi Mukulu, pankatshi pa tshilambuilu tshipiatshipia ne nzubu wa Mvidi Mukulu. Kutshitekaye panyima pa tshilambuilu tshipiatshipia ku mutu.

2 Bakalenga 2:16

bamuambila ne: Tangila, tudi ne bantu makumi atanu badi ne bukitu. Tudi basue kubatuma bua baye kukeba mfumuebe Eliya. Bualu Mueyelu wa Maweja-Nangila uvua muambule Eliya, udi mua kuikala mumuimanshe pa mikuna, nansha mu tshibandabanda. Kadi, Elisha kubakandika bua kabatumi bantu abu to.

2 Bakalenga 21:7

Uvua muenze kabidi lupingu lua mvidie mukaji, Ashera, mubiteke mu nzubu wa Mvidi Mukulu. Kadi, Maweja-Nangila uvua muambile Davide ne muanende wa balume Shelomu ne: “Nzubu ewu udi mu Yerushalayime, tshimenga tshindi mumane kusungula ku bimenga bionsu bidi mu bisamba dikumi ne bibidi bia bena Izrayele, ke muaba undi nsomba kashidi munkatshi mua bantu.

Misambu 78:58

Kupendabu Maweja-Nangila, batendelela pa mikuna miaba ya bantu benyi, mvidie ya bantu ba bisamba bikuabu, kumufikishabu munda ne disonga dia mpingu ya mvidie ya patupu.

Ekesode 20:4

“Kusongi mpingu ya mvidie. Kuenji tshimfuanyi tshia tshintu nansha tshimue, nansha tshidi mulu mu mavuba, nansha tshidi panshi pa buloba, nansha tshidi mu mayi adi muinshi mua buloba.

Ekesode 20:5

Kukukuidi mpingu ya nanku. Kuyitendeledi, bualu meme ndi Maweja-Nangila Mvidi Mukulu webe. Ndi musue kuikala Mvidi Mukulu webe, meme nkayanyi. Nennyoke bantu bonsu badi bankina too ne ku ndelanganyi yabu ya musangu muisatu nansha muinayi.

Ekesode 34:14

Nuenu kanuena mua kukukuila mvidie wa tshisamba tshikuabu to. Bualu meme Maweja-Nangila ndi ne mukawu. Bushuwa, ndi Mvidi Mukulu wenu nkayanyi.

Yirmeya 32:34

Kabidi bavua bateke mpingu yabu indi mbenga mu nzubu udi munjidila. Ke muvuabu bamunyanga ne mikiya.

Yirmeya 7:30

Maweja-Nangila udi wamba ne: Ndi mubenge buenzavi bonsu bua bena Yuda. Mbateke mpingu yabu mibi indi mbenga mu nzubu wanyi wa tshijila, bua nzubu awu ikale ne mikiya.

Yezekiyele 1:1

Mu matuku atanu a ngondu muinayi wa tshidimu tshianyi tshia makumi asatu, meme Yezekiyele, muana wa mutuangaji Buzi, mvua musombe munkatshi mua bena tshimuangi ba bena Yuda, batata ku muelelu wa musulu wa Kebare. Meme kumona diulu diunzuluka, Maweja-Nangila undeja malu.

Yezekiyele 10:3

Diba divuaye uya, bakerubine bavua ku luseke lua balume lua lupangu luvua lunyungulula nzubu wa Mvidi Mukulu. Kabidi divuba dia muinshi divua diuwula mu lupangu lua mu nzubu wa Mvidi Mukulu tente.

Yezekiyele 11:1

Mueyelu wa Maweja-Nangila kungambula pa buloba, kuya kunteka ku tshiibi tshia luseke ludi diba dipatukila lua nzubu wa Mvidi Mukulu. Pabuipi ne tshibuelelu tshia nzubu wa Mvidi Mukulu, meme kumona bantu balume makumi abidi ne batanu. Ku bantu abu mvua mumanye balombodi babidi ba bantu: ke Yazaniya, muana wa Azure, ne Pelatiya, muana wa Benaya.

Yezekiyele 11:24

Meme kumvua Mueyelu wa Mvidi Mukulu ungambula pa buloba, uya kumpingaja ku Babilone mu bantu bavua mu bupika. Nanku, Maweja-Nangila kena mundeje kabidi malu makuabu to.

Yezekiyele 2:9

Nanku, meme kumona tshianza tshingoluela, tshitua ne mukanda mutunga.

Yezekiyele 3:12

Nanku, Mueyelu wa Mvidi Mukulu kungambula pa buloba. Meme kumvua panyima panyi tshiona tshikole tshia diyi, diamba ne: “Tutumbishe Maweja-Nangila, muaba udiye uleja butumbi buende!”

Yezekiyele 3:14

Mueyelu wa Mvidi Mukulu uvua mungambule pa buloba, muye nanyi. Bukole bua Maweja-Nangila buonsu buvua bumbuele munda, tshiyi mua kubenga. Ke meme kudiunwua mubungame, mudiumvue bibi.

Yezekiyele 37:1

Bukole bua Maweja-Nangila kuntulukila. Mueyelu wende kungambula, kuya kunteka mu tshibandabanda tshialabale, tshivua tshiuwule ne mifuba ya bantu tente.

Yezekiyele 40:2

Meme kumvua muvua Mvidi Mukulu ungambula, uya nanyi mu ditunga dia Izrayele. Uvua munteke mu katongobela ku mukuna mupite bule. Mu tshibandabanda tshia mukuna, luseke lua kuinshi kuatshi, muvua nzubu miasa mifuanangane ne tshimenga.

Yezekiyele 43:5

Mueyelu wa Mvidi Mukulu kungambula pa buloba, kunteka mu lubanza lua munda mua nzubu wa Mvidi Mukulu. Meme kumona butumbi bua Maweja-Nangila buvua tente mu nzubu amu.

Yezekiyele 43:8

Bakalenga mbateke mushiku wa mbelu ne makunji bia ku nzubu wabu wa bukalenga, anu luseke lua mushiku wa mbelu ne makunji bia ku nzubu wanyi, bitangilangane. Mudi amu tshimana tshimue pankatshi pa nzubu wanyi ne wabu. Nanku bavua banyanga dina dianyi dia tshijila pavuabu benza malu mabi. Ke pamvua mubabutule ne tshiji.

Yezekiyele 5:11

“Meme Maweja-Nangila Mvidi Mukulu udi ne muoyi, ndi nnumanyisha ne: nudi banyange nzubu wanyi ne ditendelela dienu dibi, kabidi ne mpingu yenu indi mubenge. Nanku meme nennubutule, tshiyi nnufuila luse. Tshiena mua kunushiya ne muoyi to.

Yezekiyele 7:20

Bavua baditambisha bua bintu bia mushinga bivuabu nabi. Bavua benza nabi mpingu ya kutendelela nayi mvidie mibi ya patupu. Ke padi Maweja-Nangila wamba ne: Biamu biabu ebi nebaatangile bu bintu bidi bikuatshisha muenge.

Yezekiyele 8:5

Mvidi Mukulu kungambila ne: — Yezekiyele, tangila ku luseke lua ku mutu wa ditunga. Meme kutangila ku luseke alu. Ku mutu kua tshiibi, kuvua tshilambuilu. Meme kumona lupingu ludi lufikisha Maweja-Nangila munda ku mushiku udi mutangilangane ne tshilambuilu.

Yezekiyele 9:2

Nanku meme kumona bantu balume basambombu bapatukila mu tshiibi tshia nzubu wa Mvidi Mukulu tshidi luseke lua ku mutu menemene. Muntu yonsu uvua ne tshiende tshia mvita mu bianza. Munkatshi muabu muvua muntu umue muvuale bilamba bia buanda bua ndanda. Muntu awu uvua mupayika ku mikaba kabuta kavua ne bintu bia kufunda nabi. Bonsu kusemena, kuimana pabuipi ne tshilambuilu tshienza ne tshiamu tshikunze.

Danyele 10:10

Pashishe tshianza kundenga, kunjula. Ke luzakalu kungenza ku binu ne ku bianza.

Danyele 10:18

Diakamue, uvua mufuanangane ne muntu awu kundenga tshiakabidi, bua kumpingajila bukole.

Danyele 5:5

Diba adi, tshianza tshia muntu kumuenekela pabuipi ne tshitekelu tshia miendu. Tshianza kufunda bualu ku tshimana tshia nzubu wa bukalenga tshivuabu balaba lupemba. Mukalenga pakumonaye tshianza etshi tshifunda,

Bienzedi 8:39

Bobu bamane kupatuka mu mayi, Mueyelu wa Tshijila kuambula Filipe. Muena Kushe nanshaye kumumona kabidi to. Kutungunukaye ne luendu, wenda usanka.

Dielulula 32:16

Bena Izrayele bavua bafikisha Maweja-Nangila munda, benza malu mabi, batendelela mvidie ya bisamba bikuabu.

Dielulula 32:21

Bena Izrayele mbamfikishe munda, bajule tshiiji tshianyi, bualu neatendelele mvidie ya dishima. Nanku meme nembasongakaje ne tshisamba tshia bantu, tshidi katshiyi tshisamba mene. Nenjule tshiiji tshiabu, ne bantu badi kabayi ne lungenyi.

Dielulula 4:24

Bualu Maweja-Nangila Mvidi Mukulu wenu udi wosha, ubutula bu kapia. Yeye nkayende mmusue kuikala Mvidi Mukulu wenu.

Dielulula 5:9

Kanukukuidi mpingu ya nanku, kanuyitendeledi. Meme nkayanyi ndi Maweja-Nangila Mvidi Mukulu wenu. Nanku muntu yonsu udi umbenga, ndi mmunyoka too ne ku ndelanganyi yende ya musangu muisatu nansha muinayi.

Dielulula 6:15

Bualu Maweja-Nangila, Mvidi Mukulu wenu, udi munkatshi muenu. Mmusue kuikala amu Mvidi Mukulu nkayende. Kanumufikishi munda to, bualu udi mua kunubutula, kunumusha panu.

Yoshua 24:19

Ke Yoshuwa kuambila bena Izrayele ne: — Kanuena ne mushindu wa kuenzela Maweja-Nangila mudimu to. Bualu udi Mvidi Mukulu wa tshijila. Mmusue bua ikale nkayende Mvidi Mukulu wenu. Kakunufuila luse bua dimutombokela dienu ne buenzayi buenu.