Yeshaya 9:12 - MUKANDA WA MYIDI MUKULU

¹² Ke muvua Mvidi Mukulu munyoke bantu bende nanku. Kadi bena Izrayele, nansha bobu bamone bionsu abi, kabena bapingane kudi Mvidi Mukulu wabu to. Kabena balonda tshidi Maweja-Nangila muena bukole bonsu musue.

Mukanda wa Nzambi Dihungila Dikulukulu ne Dihungila Dihia-dihia 2003

¹² Bena Sulia ku luseke lua esete, ne Bena Peleshete ku luseke lua wesete bakudia Bena Isalele mukana muabo mubulula. Bua malu â onso tshiji tshiandi katshiena tshikudimuke, kadi tshianza tshiandi tshitshidi tshiolola.

Yeshaya 9:12 교차 참조

2 Bakalenga 16:6

Tshikondu atshi, Reshine, mukalenga wa bena Arame, mumane kuipata bena Yuda bavua mu tshimenga tshia Elate, kutshipingajilaye bena Edome. Bena Edome kuasa tshiakabidi mu tshimenga atshi. Batshidimu too ne mpindiewu.

2 Kulondolola 28:18

Bena Peleshete kabidi bavua babuele ne mvita mu bimenga bivua mu mpata ya ku muelelu wa Mayi manene, ne mu buloba bua bena Yuda buvua kuinshi mu ditunga. Bavua bakuate bimenga ebi: Bete-Shemeshe, Ayalone, Ngederote, Soko, Timna, Ngimzo, ne misoku ivuabu nayi mutumba. Bena Peleshete kuasamu.

Misambu 79:7

Bualu bavua bapawule Izrayele, bavua banyangakaje muaba wende.

Yeshaya 10:4

Diba adi, nudi mua kusungula amu malu abidi: kubuelakana ne bena lukanu, nansha kufua. Kadi tshiji tshia Maweja-Nangila katshiena tshijika, tshianza tshiende tshitshidi tshiela mulu.

Yeshaya 11:14

Nebaye bonsu pamue batangile luseke ludi diba dibuelela, ku mikuna ya bena Peleshete. Bonsu babidi nebaye batangile luseke ludi diba dipatukila, bua kupawula bisamba bidi mu tshipela. Nebakuate ditunga dia bena Edome ne dia bena Mowabe. Bena Amone nebikale ku bumfumu buabu.

Yeshaya 31:1

Bantu badi baya mu Ejipitu bua kukeba diambuluisha, mbena diakabi! Badi batekemena ku nyama ya tubalu, ne ku matempu mavule a bena Ejipitu, ne ku babandi babu ba pa tubalu, bualu badi bilobu. Kadi kabena bakeba Mvidi Mukulu wa tshijila wa Izrayele. Kabena bakeba lungenyi kudi Maweja-Nangila.

Yeshaya 5:25

Nanku Maweja-Nangila mmufikile bantu bende munda. Mmubakanyine, mubatume. Mikuna imona nanku, kuzakalayi. Bitalu bia bantu kushala panshi mu misesu, bu butu bua kuimansha mu dyala. Kadi tshiji tshia Maweja-Nangila katshiena tshijike to. Udi amu ukanyina bantu bende.

Yeshaya 9:17

Eyowa, bubi budi butampakana kudi bantu bu kapia katua ku tshisuku, kalambuluka mu ditu, kajuula muishi mupite bungi bu mavuba.

Yirmeya 10:25

Tshiji tshiebe utshitekele bantu ba bisamba bikuabu abu, badi kabayi basue kukumanya, badi kabayi bakutendelela. Bualu badi biba bintu bia bantu bebe, badi bapawula bintu bietu bionsu, banyanga ditunga dietu dijima.

Yirmeya 15:7

Mu tshimenga tshionsu tshia ditunga, mvua muenze ne bantu banyi bu muntu udi upepula bintu, bua lupepele luya ne bisota. Mvua mutangalaje bantu banyi. Mvua mushipe bana badibu balela. Kadi kabavua bapingane kundi.

Yirmeya 35:11

Kadi tshikondu tshivua Nebukadnesare, mukalenga wa mu Babilone mubuele mu ditunga, tuvua bumvuangana bua kubuela mu Yerushalayime bua kunyema bena mvita ba bena Babilone ne ba bena Ashure. Nanku lelu, tudi tusomba mu Yerushalayime.

Yirmeya 4:8

Vualayi bilamba bikayapale, nudile miadi, nudituute bianza pa tshiadi. Bualu Maweja-Nangila utshidi ne tshiji, unulondakaja ne tshiji tshiende tshikole.

Yezekiyele 16:27

Ke meme kukuleja panyi bukole buanyi, kukupala biakudia, kukufila mu bianza bia baluishi bebe, bua baye nebe mu bimenga bia bena Peleshete, batua bumvua bundu bua malu mabi auvua muenze.

Yezekiyele 6:14

Nembaleje bukole buanyi. Nennyange ditunga diabu, nembutule bantu badi basombamu, biangatshile ku luseke lua ku tshipela tshidi kuinshi mu ditunga, too ne ku tshimenga tshia Ribla tshidi ku mutu wa ditunga. Bantu bonsu nebajadike ne: meme ndi Maweja-Nangila.”

Osheya 7:10

Ditambisha dia bena Izrayele, ke didi dibasonguela. Kadi, nansha bobu bamona makenga onsu aa, kabena bapingana kundi meme Maweja-Nangila Mvidi Mukulu wabu to.

Amosa 4:10

Ndi mutumine bimuna bienu masama, mumvua muenze kale mu Ejipitu. Ndi muanyishe bua baluishi benu, bashipe bansongalume benu mu mvita, banunyenge nyama ya tubalu. Mu mitanda yenu, mupuya wa bitalu mmunubuele mu mimpempe. Kadi kanuena bapingane kundi. Meme Maweja-Nangila ndi njadika nanku.

Amosa 4:11

Meme mvua munyangakaje misoku mijima, mumvua muenze kale mu Sodome ne Ngomore. Nuenu kupatukamu amu bakese, bu tshishelele tshia lukunyi, tshidibu bapatule lukasa muiku. Kadi kanuena bapingane kundi. Meme Maweja-Nangila ndi ngamba nanku.

Amosa 4:6

Mu bimenga bienu bionsu nuvua balale ne nzala, mu misoku yenu yonsu kamuvua tshiakudia! Uvua munutumine tshiyole atshi, ke meme! Kadi nansha nanku, kanuena bapingane kundi! Meme Maweja-Nangila ndi njadika nanku.

Amosa 4:8

Bantu ba mu bimenga bibidi, bisatu, bavua benda, bakoka makasa panshi, bakeba mayi a kunua mu tshimenga tshikuabu, kabayi baapeta makumbane. Kadi nansha biobi nanku, kanuena bapingane kundi. Meme Maweja-Nangila ndi njadika nanku.

Amosa 4:9

Mvua mutumine bia pa madimi emu mabeedi, bua bifube, bibolele mu madimi. Ndi munyange mitshi yenu, ne mionji ya mvinyo; mpasu kudia mitshi ya mfiku, ne ya olive. Kadi kanuena bapingane kundi. Meme Maweja-Nangila ndi njadika nanku.

Sefanya 1:6

Nembutule bonsu badi bambenga meme Maweja-Nangila, badi kabayi bakeba diambuluisha kundi, kabayi bankonka meji.”

Sefanya 3:2

Kavua uteleja diyi dia Maweja-Nangila. Kavua witaba mibelu yende. Kavua utekemena Maweja-Nangila. Kavua ukeba diambuluisha kudi Mvidi Mukulu.

Dielulula 31:17

Nanku nembafikile munda, mbalekela, bua babakengeshe bikole kudi bisamba bikuabu. Nebajadike mudi makenga aa abenzekela, bualu meme Mvidi Mukulu tshiena kabidi munkatshi muabu.