Yeshaya 14:1 - MUKANDA WA MYIDI MUKULU

¹ Bushuwa, Maweja-Nangila nealeje tshiakabidi mudiye munange ndelanganyi ya Yakobe, mudiye musungule bena Izrayele. Neapingaje bantu bende mu matunga abu. Bantu benyi nebadisange kudibu, nebapetangane ne bena tshisamba tshia Yakobe.

Mukanda wa Nzambi Dihungila Dikulukulu ne Dihungila Dihia-dihia 2003

¹ Bualu bua Yehowa neafuile Yakoba luse, neasungule ba mu Bena Isalele bu bantu bandi kabidi, ne neabashikike mu buloba buabo bua diambedi. Bantu ba bende nebadisangishe nʼabo, nebadilamike kudi ba mu bana ba Yakoba.

Yeshaya 14:1 교차 참조

Estere 8:17

Ku ditunga dionsu, mu tshimenga tshionsu, ne konsu kuvua mukanda ewu ufika, bena Yuda bavue amu ne disanka. Bavua benzeja didia dinene dia tshibilu. Bantu ba bisamba bikuabu bavua babuela mu tshisumbu tshia bena Yuda, bua bowa buvuabu babakuatshisha kudi bena Yuda.

Misambu 102:13

Kadi wewe, Maweja-Nangila, udi mukalenga wa kashidi, udi Mvidi Mukulu wa bikondu bionsu.

Misambu 102:14

Wewe neujuke, neufuile Siyone luse, bualu diba dia kumuambuluisha ndimane kukumbana. Eyowa, diba diuvua muambe ndimane kufika.

Misambu 143:12

Wewe muena bulenga buonsu, upuwishe baluishi banyi, ubutule bena lukuna banyi bonsu, bualu ndi muena mudimu webe.

Misambu 98:3

Uvua muvuluke malu ende makane, ne bulelela buende kudi bena Izrayele. Bantu bonsu too ne ku ndekelu kua buloba, badi bamona Mvidi Mukulu wetu uvua mutusungidile.

Yeshaya 19:18

Dituku dikuabu, mu Ejipitu mu bimenga bitanu, bantu nebakule muakulu wa bena Ebrewu. Nebatshipe mitshipu, batela dina dia Maweja-Nangila muena bukole buonsu. Tshikuabu tshia ku bimenga ebi, nebatshibikile ne nTshimenga tshia Diba.

Yeshaya 21:1

Badi bamanyisha malu adi atangila Babilone, “Tshipela tshidi ku musulu.” Muena lukuna udi utumina ku tshipela, ku ditunga didi dikuatshisha bantu bowa, amu mudi mvunde ukosolola tshipela tshia Negebe.

Yeshaya 27:6

Matuku adi kumpala, bena Izrayele, bena tshisamba tshia Yakobe, nebeele miji mipiamipia. Nebeele bilongu, nebasampile, nebuwuje buloba bujima ne bimuma biabu.

Yeshaya 41:8

Izrayele, muena mudimu wanyi, tshisamba tshia Yakobe tshimvua musungule, ndelanganyi ya Abrahame, mulunda wanyi, teleja.

Yeshaya 41:9

Meme kukukeba too ne ku nshikidilu kua buloba. Meme kukubikila, pauvua ku matunga a kule. Meme kukuambila ne: “To, tshiena mukubenge nansha. Ndi mukusungule. Muena mudimu wanyi ke wewe.”

Yeshaya 44:1

Kadi mpindiewu, teleja, wewe tshisamba tshia Yakobe. Wewe Izrayele, muena mudimu wanyi, undi musungule.

Yeshaya 45:14

Izrayele, Maweja-Nangila udi ukuambila ne: tshionsu tshidi bena Ejipitu bapeta ku mudimu wabu, makasa adi bena Kushe, nansha bantu bale ba kafiondu ba mu Seba bapeta, bionsu ebi nebipitshile muebe, nebikale bintu biebe. Bantu aba nebakulonde, bamane kubasuika ne nkanu. Nebadiele panshi kumpala kuebe, bakutondela ne: “Mvidi Mukulu udi amu kuebe. Kena munga muaba to.”

Yeshaya 47:1

Maweja-Nangila udi wamba ne: Wewe Babilone, tuluka mu nkuasa webe wa lumu. Somba mu lupuishi. Eyowa, somba panshi pa buloba, bualu kutshiena mukalenga mukaji to. Udi mujimije mianzu yebe, kabatshiena bakuinyika ne: “Babilone, mukaji mulengele”, “Babilone, nsongakaji muimpe”.

Yeshaya 49:10

Kabakufua kabidi nzala nansha nyota to. Nansha tshipepele tshia mu tshipela, nansha munya mukole kabiakubakuata to. Bualu Meme udi ubaludika, ndi mbananga. Nembanuishe mayi matalale a mu mpokolu.

Yeshaya 49:13

Diulu, lejaku disanka diebe! Buloba, Sankaku! Mikuna minene, imbayi misambu ne meyi makole. Bualu Maweja-Nangila udi usamba bantu bende. Bantu bende badi bakenga, udi ubafuila luse.

Yeshaya 49:15

Kadi Maweja-Nangila udi wandamuna ne: Mukaji udi mua kupua muana udiye wamusha mabele muoyi anyi? Udi mua kubenga kunanga muana uvuaye muambule mu difu diende anyi? Bushuwa, misangu mikuabu udi mua kumupua muoyi, kadi meme tshiena nkupua muoyi to.

Yeshaya 49:25

Kadi meme Maweja-Nangila ndi ngamba ne: Eyowa, nennyenge tshilobu tshia mvita, muntu uvuaye muele mu lukanu. Nendiapule mukalenga wa tshikisu tshintu tshivuaye mupawule mu mvita! Yerushalayime, meme nkayanyi, nenduangane ne bena lukuna bebe, bua kupandisha bana bebe.

Yeshaya 49:7

Maweja-Nangila, wa tshijila wa bena Izrayele, udi mudiangatshile mu bianza tshilumbu tshia tshisamba tshiende. Mpindiewu, wewe udibu bapepeja, udibu badiombola, udi mupika wa bakalenga ba tshikisu, Maweja-Nangila udi ukuambila ne: “Pamona bakalenga muudi mupatuke mu bupika, nebajuke mu nkuasa yabu. Balombodi ba matunga pamonabu, nebadiele panshi bua kukunemekela.” Nebaleje mudibu banemeka Maweja-Nangila, wa tshijila wa Izrayele. Bualu yeye uvua mukusungule, udi ukumbaja kabidi bivuaye mulaye.

Yeshaya 54:3

Bualu neuvulangane ku nseke yonsu. Bana bebe ba balume nebangatulule maloba adi mu bianza bia bena mutumba. Nebasulule kabidi mu bimenga, muvua mushale dikolu.

Yeshaya 55:7

Muntu mubi alekele njila yende mibi. Udi kayi ne meji makane, alekele meji ende mabi! Bantu bapingane bonsu kudi Maweja-Nangila, bualu neabafuile luse! Bapingane kudi Mvidi Mukulu wetu, bualu neabalekele mibi yabu!

Yeshaya 56:3

Muena tshisamba tshikuabu, udi mulamate Maweja-Nangila, kena mua kuela meji a ne: “Maweja-Nangila mmunteke ku luseke. Mmungumushe munkatshi mua bantu bende.” Muntu mutungula kambi ne: “Ndi amu bu lukunyi luume.”

Yeshaya 60:10

Maweja-Nangila udi wambila Yerushalayime ne: Benyi nebibakulule bimana biebe. Bakalenga babu nebikale bena mudimu bebe. Bualu mvua mukunyoke bushiwa, pamvua ne tshiji. Kadi ndi ne disanka mpindiewu, dia kukuleja mundi mukunange.

Yeshaya 60:14

Bantu bavua bakukengesha, nebasemene kuudi, nebiname panshi. Bantu bonsu bavua bakulembakaje, nebadiele ku makasa ebe. Nebakuinyike ne: “Ke tshimenga tshia Maweja-Nangila”, “Ke Siyone musoku wa wa tshijila wa bena Izrayele.”

Yeshaya 66:20

Nenku bisamba ebi nebipingaje kuabu bana benu bonsu bavua muabu. Nebabande pa tubalu, mu matempu a mvita, ne pa bipoyi. Nebende panyima pa mpunde ne pa tumelu. Nebafike ku mukuna wanyi wa tshijila mu Yerushalayime. Maweja-Nangila udi wamba ne: ke mulambu udibu bandambula. Nenguanyishe amu mundi nganyishe mulambu udi bena Izrayele bantuadila mu nzubu wanyi, mu ngesu milengeja.

Yirmeya 16:15

Kadi nebambe ne: “Ndi nditshipa mu dina dia Maweja-Nangila udi ne muoyi, udi mumushe bena Izrayele mu ditunga dia ku mutu, ne mu matunga makuabu avuaye mubatume mu bupika!” Bualu nembapingaje mu buloba buabu, bumvua mupeshe bankambua babu.

Yirmeya 29:14

Nennumushe mu bisamba bionsu ne miaba yonsu imvua munutangalaje. Nennusangishe, nnupingaje muaba ewu umvua munukuatshishe bua kunutuma mu bupika. Meme Maweja-Nangila ndi njadika nanku.

Yirmeya 30:8

Maweja-Nangila wa bukole buonsu udi wamba ne: Pafika matuku awu, nentshibule mutshi wa bupika udi pa makaya abu. Nenkose mionji yabu. Nanku kabakuikala kabidi bapika ba bantu bakuabu to.

Yirmeya 31:4

Izrayele wanyi munanga, ndi nkujula tshiakabidi, ndi ngasulula tshimenga tshiebe. Bantu nebimbe ngoma. Nebaje maja, basanka.

Yirmeya 50:33

Maweja-Nangila, Mvidi Mukulu wa Izrayele udi wamba ne: Bena Izrayele ne bena Yuda badi babakengesha kudi bantu badi babakuate mu bupika. Badi babalame ku bukole, babenga bua bapingane kuabu.

Yirmeya 51:51

Tuvua ne bundu bua bungi patuvua tunwua bipendu! Tuvua ne bundu patuvua bamone bantu ba bisamba bikuabu, babuele mu muaba wa tshijila mu nzubu wa Maweja-Nangila.

Yezekiyele 16:60

Kadi, meme nennemeke ndondu umvua mutue nebe ku buana buebe. Nengenze bua ndondu wetu nebe ashale kashidi.

Yezekiyele 47:22

Nutshinke tshitupa tshionsu, nutshiabanyangane munkatshi muenu. Nuvuluke benyi badi munkatshi muenu, bakadi bamane kulelela bana mu ditunga. Bantu aba badi amu bu bena Izrayele. Mubenzele bionsu bidibu ne bua kuenzela bena Izrayele. Nanku, nebapete yabu miaba, munkatshi mua bisamba bia bena Izrayele.

Zekâya 1:17

Pashishe mutumibue wa Mvidi Mukulu kungambila ne: Ambila kabidi bantu mu dina dia Maweja-Nangila wa bukole buonsu ne: “Bimenga bianyi nebipete bubanji tshiakabidi. Nensungule Yerushalayime kabidi, nengambuluishe Siyone.”

Malaki 1:11

Meme Maweja-Nangila wa bukole buonsu, ndi njadika ne: kudi diba dipatukila too ne kudidi dibuelela bantu ba bisamba bionsu badi bannemeka. Miaba yonsu badi bangoshila musenga wa kamonya, badi bandambula milambu minkumbanyine. Bulelela, bisamba bia bende bidi binnemeka.

Luke 1:54

Uvua muambuluishe bena Izrayele, bantu bende. Kavua mupue muoyi dinanga divuaye mubanange nadi,

Luke 2:32

Ke butoke budi bumanyisha bisamba bionsu muudi, bupetesha bena Izrayele, bantu bebe, lumu.