Mika 3:11 - MUKANDA WA MYIDI MUKULU

¹¹ Bakoshi ba nsambu badi balumbuluisha bantu, amu padibu bamane kudia mabuejila. Batuangaji badi balongesha mikenji, amu bua kupeta difutu. Bambi badi bambila bantu malu, amu bamane kupeta makuta. Kadi badi badiamba ne: “Tudi bantu ba Maweja-Nangila! Maweja-Nangila udi netu! Bualu bubi nansha bumue kabuena mua kutukuata.”

Mukanda wa Nzambi Dihungila Dikulukulu ne Dihungila Dihia-dihia 2003

¹¹ Badi ha mutu ha musoko budi balumbulula bilumbu anu bua mbueshilu, bakuidi badi bayisha anu bua difutu, ne baprofete badi bajingulula bantu malu anu bua kuheta argent. Kadi badi beyemena Yehowa, ne badi bamba ne, Yehowa kena munkatshi muetu, anyi? Bualu bubi kabuena mua kutukuata.

Mika 3:11 교차 참조

Nsumuinu 17:23

Muntu mubi udi wanyisha mabuejila adibu bafila bua amone mua kunyanga tshilumbu.

Yeshaya 1:23

Bamfumu benu bakadi bantomboji, badi bumvuangana ne bivi. Badi banyisha mabuejila, basue bonsu bua bantu babasankishe. Kabena bakuila bana ba nshiye ku kabadi! Kabena bateleja mukaji mukamba.

Yeshaya 48:2

Nuenu nudi nudisua, bua padibu banuinyika ne: “Bena tshimenga tshijidila.” Nudi nuditemba nuamba ne: tudi tunemenena kudi Mvidi Mukulu wa bena Izrayele, udibu binyika ne: “Maweja-Nangila muena bukole buonsu.” Kadi telejayi bualu ebu:

Yeshaya 5:23

Badi babingisha muena tshibawu, bualu udi ubakosa mishiku. Badi bapisha muntu udi kayi ne bualu.

Yeshaya 56:11

Badi kabidi bu mbua idi ne lumpukusu, idi idia kayiyi yukuta. Badi amu ne dina patupu dia balami ba mikoku! Kadi kabena bajingulula bualu nansha bumue. Badi benza amu mudibu basue. Muntu yonsu wa kudibu udi udikebela amu tshiende tshidiye ujinga.

Yirmeya 23:17

Bantu badi baseka tshindi ngamba, bambi badi ne dikamakama dia kubambila ne: ‘Bionsu nebiende amu bimpe.’ Bantu batshimbakane badi batungunuka ne tshitunu tshiabu, bambi badi babambila ne: ‘Dikenga kadiakunukuata to.’

Yirmeya 26:7

Batuangaji, bambi, ne bantu bonsu bavua muaba awu, kumvuabu muvua Yirmeya umanyisha bantu bualu ebu mu lupangu lua nzubu wa Mvidi Mukulu.

Yirmeya 5:12

Bena Yuda badi bayila Maweja-Nangila, bamba ne: “Kena ne tshidiye mua kutuenzela. Tuetu katuena mua kukenga. Kabena mua kutuluisha. Katuena mua kupeta tshiyole tshia nzala to.

Yirmeya 6:13

Bualu bantu aba bonsu, bana ne bantu bakole, badi amu ne lukuka lua bintu, bakeba biuma ne buivi. Bambi ne batuangaji mene badi amu badinga bantu.

Yirmeya 7:4

Kanutekemenyi miaku ya dishima inudi nuamba nuambulula ya ne: ‘Tuetu tudi bimpe bitambe, bualu ewu ke nzubu udi Maweja-Nangila usomba, ke nzubu wa Maweja-Nangila, eyowa, ke nzubu wa Maweja-Nangila.’

Yirmeya 8:10

Maweja-Nangila udi wamba ne: Bakaji babu, nembafile kudi bakuabu. Madimi abu, nengafile kudi badimi bakuabu. Bualu bantu bonsu, bana ne bantu bakole, badi amu ne lukuka lua biuma. Muambi ne mutuangaji, bonsu badi anu badingangana.

Yezekiyele 22:12

Muebe, badi bangata bantu ku mudimu, babafuta bua bashipe bantu bakuabu. Badi basombeshangana makuta bua kupeta kasombele ka bungi. Badi banyenga bintu bia muena mutumba bua kunema nabi. Kadi badi bampua muoyi kashidi meme Maweja-Nangila Mvidi Mukulu. Ke malu andi mujadike awu.

Yezekiyele 22:27

Balombodi benu badi bashipangana anu bua kunema, bu mudi nyama ya lonji ishipa nyama, iyipandabipese bipese.

Yezekiyele 34:2

— Muntu, kanyina bamfumu ba bena Izrayele, ubamanyishe mikanu indi mbakanyina nayi meme Maweja-Nangila. Ndi mbambila ne: “Nuenu balami ba mikoku ba bena Izrayele, nudi bena diakabi. Nudi badivuluke amu nuenu nkayenu! Balami kabena ne bua kudisha mikoku anyi?

Osheya 4:18

Padibu bajikija kunua kua maluvu, badi batuadija kuenda tshiendenda. Bamfumu babu badi babafikisha ku malu mabi mapite.

Osheya 4:8

Badi bapeta bubanji ku milambu idi bantu banyi bena buenzayi bandambula. Ke mudibu basue bua bena Izrayele benze buenzayi.

Amosa 5:14

Enzayi malu mimpe, nubenge bidi bibi. Nanku nenushale ne muoyi. Diba adi Maweja-Nangila, Mvidi Mukulu wa bukole buonsu, neikale nenu menemene, munudi nuamba amu kuamba.

Amosa 9:10

Munkatshi mua bantu banyi, mvita neishipe bonsu badi bena tshibawu, badi baditemba, bambila muambi ne: Mvidi Mukulu kakututumina makenga audi utukanyina nawu nansha!”

Mika 3:5

Telejayi bidi Maweja-Nangila wamba, bua bambi badi badinga bantu banyi. Udi wamba ne: “Bambi badi bambila bantu ne: ditalala didiku, amu padibu babafuta difutu dia bungi. Kadi muntu udi kayi ubapesha biakudia, badi bamuluisha mvita.

Mika 7:3

Badi bamanye bimpe, mudibu mua kuenza malu mabi. Bamfumu ne bakoshi ba nsambu, badi balomba mabuejila. Bantu banene badi bamba majinga abu patoke, bashima bantu bua kuakumbaja.

Sefanya 3:3

Bamfumu ba tshimenga etshi badi bu nyama ya ntambue idi ikungula. Balumbuluishi babu badi bu bimungu, bidi bikeba biakudia dilolu. Kadi kabiena bishiya tshintu tshia kudia mu dinda.

Sefanya 3:4

Bambi babu badi baditemba, banyanga mudimu wabu. Batuangaji babu kabena banemeka bintu bia tshijila; badi banaya ne mikenji ya Mvidi Mukulu.

Malaki 1:10

Bivua mua kuikala bimpe, bua muntu wa munkatshi muenu, akange biibi bia ku nzubu wa Mvidi Mukulu, bua kanutemeshi kabidi kapia pa tshilambuilu tshianyi. Bualu kanuena ne tshia nsongu tshinudi nuenzamu. Bualu meme Maweja-Nangila wa bukole buonsu ndi njadika ne: tshiena nsanka bua kunumona. Milambu inudi nundambula kayena indengelela nansha.

Malaki 2:9

Nanku, meme nensake bena Izrayele bonsu bua banupepeje, banufuishe bundu, bualu kanuena nuenza mundi musue. Nudi nuenzela bantu malu ne kansungansunga.”

Dibadika 16:15

Moshe kufika munda bikole bua diandamuna diabu adi. Kuambilaye Maweja-Nangila ne: — Kuitabi milambu yabu to. Katshia meme tshiena mubenzele bibi. Tshiena mubanyenge tshintu, nansha mpunde mene.

Dibadika 22:7

Bakulu ba bena Mowabe ne ba bena Madiyane bavuabu batume, kuangata bintu bia kufuta nabi muambi. Kuyabu kumonangana ne Balaame, bamuambila mikenji ya kudi mukalenga Balake.

Matayi 3:9

Kadi lekelayi kuela meji ne: “Tudi mua kupanduka ku dinyoka, bualu Abrahame nnkambua wetu.” Bualu ndi nnujadikila ne: mabue aa, Mvidi Mukulu udi mua kuandamuna ndelanganyi ya Abrahame!

1 Timote 3:3

Kikadi munuavi, nansha musue mvita. Kadi ikale muena bupole, muntu wa disanka, kayi mutshima wa biuma.

Tite 1:11

Nanku ubakandike, ubabuikidije mukana, bualu badi bajula bimvundu mu meku majima, balongesha malu adi kaayi makane, anu bua kupeta biuma mushindu mubi.

1 Petro 5:2

nuludike bu balami ba nsongu mikoku idi Mvidi Mukulu munupe. Mvidi Mukulu udi musue bua nuyilame bimpe ne muoyi wenu mujima, kanuyi ne tshimfulamuoyi. Nuenze mudimu muenu muonsu, kabidi ne disanka, kanuyi nukeba biuma.

Yuda 1:11

Bantu abu mbena diakabi. mBabuele mu njila wa Kayine; mbapambuke mu njila, bu Balaame, bua lukuka lua biuma. mBabutuke, bualu bavua batomboka, bu muvua Kora muenze.

1 Samuele 8:3

Kadi bana abu, kabawa balonda tshilejilu tshia tatuabu Samuwele to. Bavua ne lukuka lua biuma, bangata mabuejila, bakose bilumbu bia bantu bibi.