Malaki 1:10 - MUKANDA WA MYIDI MUKULU

¹⁰ Bivua mua kuikala bimpe, bua muntu wa munkatshi muenu, akange biibi bia ku nzubu wa Mvidi Mukulu, bua kanutemeshi kabidi kapia pa tshilambuilu tshianyi. Bualu kanuena ne tshia nsongu tshinudi nuenzamu. Bualu meme Maweja-Nangila wa bukole buonsu ndi njadika ne: tshiena nsanka bua kunumona. Milambu inudi nundambula kayena indengelela nansha.

Mukanda wa Nzambi Dihungila Dikulukulu ne Dihungila Dihia-dihia 2003

¹⁰ Nakadi kusua bua muntu wa munkatshi muenu inshile bibi bia ku biendelu bia mu ntempelo bua nuenu kanutemeshi kahia ha tshioshelu tshianyi tshianana! Yehowa wa misumba udi wamba ne, Tshiena ne disanka bua malu enu, tshiena ngitabusha mulambu ku tshianza tshienu.

Malaki 1:10 교차 참조

Nsumuinu 15:8

Maweja-Nangila udi udiwula milambu ya bantu babi. Kadi udi wanyisha bikole dilomba dia bantu ba diyi dimue.

Yirmeya 14:10

Maweja-Nangila udi wamba ne: “Eyowa, bantu abu mbasue kuendakana miaba yonsu, banshiya meme.” Kadi ebi kabiena bisankisha Maweja-Nangila. Nenku tshiena mua kupua malu mabi abu muoyi. Nembanyoke.

Yirmeya 14:12

Nansha bobu bajila biakudia, tshiena nteleja dilomba diabu to. Nansha bobu balambula milambu ya kuosha anyi milambu mikuabu, tshiena mua kuyanyisha to. Kadi nembashipe ku mvita, ku tshiyole tshia nzala, ne ku disanka dia tshiambu.

Yirmeya 6:13

Bualu bantu aba bonsu, bana ne bantu bakole, badi amu ne lukuka lua bintu, bakeba biuma ne buivi. Bambi ne batuangaji mene badi amu badinga bantu.

Yirmeya 6:20

Milambu yabu ya ku Saba, ne mitshi ya dipembu ya mu ditunga dia kule, bidi mua kungenzela tshinyi? Nyama idibu bangoshila pa tshilambuilu, kayena insankisha to. Tshiena musue milambu yabu.

Yirmeya 8:10

Maweja-Nangila udi wamba ne: Bakaji babu, nembafile kudi bakuabu. Madimi abu, nengafile kudi badimi bakuabu. Bualu bantu bonsu, bana ne bantu bakole, badi amu ne lukuka lua biuma. Muambi ne mutuangaji, bonsu badi anu badingangana.

Osheya 5:6

Badi baya ne ngombe ne mikoku, bua kuyilambula Maweja-Nangila. Badi bakeba Maweja-Nangila, kadi kabakumusangana to. Bualu mmumane kubabenga.

Mika 3:11

Bakoshi ba nsambu badi balumbuluisha bantu, amu padibu bamane kudia mabuejila. Batuangaji badi balongesha mikenji, amu bua kupeta difutu. Bambi badi bambila bantu malu, amu bamane kupeta makuta. Kadi badi badiamba ne: “Tudi bantu ba Maweja-Nangila! Maweja-Nangila udi netu! Bualu bubi nansha bumue kabuena mua kutukuata.”

Malaki 1:13

Nudi nuamba kabidi ne: “Udi utupungija ne mudimu mukole be.” Nudi amu numpetula meme Mvidi Mukulu wa bukole buonsu. Nudi nundambula nyama miiba, mikale itebuka, nansha isama. Ndi nnukonka ne: mundi mua kuanyisha milambu ya mushindu ewu mmunyi?

Malaki 2:12

Maweja-Nangila umushe muntu yonsu udi wenza malu mabi a nanku munkatshi mua ndelanganyi ya Yakobe, nansha yeye ulambula Maweja-Nangila wa bukole buonsu milambu!

Malaki 2:13

Bualu buibidi bunudi nuenza mbobu ebu: nudi nubolesha tshilambuilu tshia Maweja-Nangila ne binsonji; nudi nudila, nutua mikemu, bualu Maweja-Nangila katshiena utangila milambu yenu, katshiena wanyisha binudi numulambula.

Yowanane 10:12

Muntu udi ukuata mudimu amu bua kupeta difutu, kayi mulami wa mikoku, kabidi kayi muena mikoku, padiye umona nyama wa lonji ufika, udi ulekela mikoku, unyema. Nanku nyama wa lonji udi uyikuata, uyitangalaja.

1 Korente 9:13

Nudi bamanye bimpe ne: badi benza mudimu mu nzubu wa Mvidi Mukulu, badi bapeta biakudia biabu ku bidi bantu bela mu nzubu amu. Badi balambula milambu pa tshilambuilu, badi bapeta tshiabu tshitupa tshia milambu eyi.

Filipe 2:21

Bantu bakuabu bonsu badi batata anu bua bidi bibalengelela bobu nkayabu. Kabena bakeba bidi bilengelela Kristu.

Ebrewu 10:38

Kadi, muntu udi wenza bindi musue, neikale ne muoyi, bualu udi witaba. Kadi padiye upingana tshianyima, tshiena nsanka kabidi bualu buende nansha.”

1 Petro 5:2

nuludike bu balami ba nsongu mikoku idi Mvidi Mukulu munupe. Mvidi Mukulu udi musue bua nuyilame bimpe ne muoyi wenu mujima, kanuyi ne tshimfulamuoyi. Nuenze mudimu muenu muonsu, kabidi ne disanka, kanuyi nukeba biuma.