Ekesode 23:31 - MUKANDA WA MYIDI MUKULU

³¹ Nanku, ditunga dienu nedikale dialabale, dituadijile ku Mayi manene makunze too ne ku mayi a bena Peleshete. Nedikale dituadijile kabidi ku tshipela tshia Sinayi too ne ku musulu wa Perate. Meme nennupeshe bukole bua kuipata bena matunga onsu aa.

Mukanda wa Nzambi Dihungila Dikulukulu ne Dihungila Dihia-dihia 2003

³¹ Nenteke mikalu yenu ku Dishiba Dikunze tô ne ku mai manene a Bena Peleshete, ne ku tshihela tô ne ku musulu wa Pelata, bualu bua meme nenfile bena buloba mu bianza bienu, nuenu nenubihate ku mpala kuenu.

Ekesode 23:31 교차 참조

Genese 15:18

Dituku adi, Maweja-Nangila kutua ndondu ne Abrame muaba awu, kumulaya ne: — Matunga aa nengapeshe ndelanganyi yebe, biangatshile ku musulu wa Ejipitu ne ku musulu munene wa Perate.

1 Bakalenga 11:2

Kadi Maweja-Nangila uvua mumane kuambila bena Izrayele bua bisamba ebi ne: “Kanusedi bantu ba bisamba ebi to. Kanuitabi bua bantu ba bisamba ebi basele bana benu. Bualu badi mua kunuibidija bua nuenu kutendelela mvidie yabu.” Kadi, Shelomu kuangata bakaji ba bisamba bikuabu abu, bualu uvua mubanange bikole.

1 Bakalenga 20:13

Ke muambi kampande kuya kudi Akabe, mukalenga wa bena Izrayele, umuambila ne: — Maweja-Nangila udi wamba ne: “Udi mumone musumba munene wa bena mvita! Ndi mbafila mu bianza biebe anu lelu, bua wewe kumanya ne: meme ndi Maweja-Nangila.”

1 Bakalenga 8:65

Anu tshikondu atshi, Shelomu ne bena Izrayele bonsu, bavua muaba awu bapite bungi, kuenzabu tshibilu tshia tuzubu tua Bisasa. Bena Izrayele abu, bavua bafumine mu ditunga dijima dia bena Izrayele, biangatshile ku Lebo-Amate ku mutu mu ditunga, too ne ku musulu wa Ejipitu udi kuinshi mu ditunga. Nanku, munkatshi mua matuku muanda mutekete, bena Izrayele kuenza tshibilu atshi muaba uvua Maweja-Nangila Mvidi Mukulu.

2 Kulondolola 9:26

Bamfumu bonsu bavua ku bumfumu bua mukalenga Shelomu, biangatshile ku musulu munene wa Perate, too ne ku ditunga dia bena Peleshete, kabidi too ne ku mukalu wa ditunga dia bena Ejipitu.

Misambu 72:8

Mukalenga adie bumfumu ku mayi manene too ne ku makuabu, ku musulu wa Perate too ne ku ntengu ya buloba.

Dibadika 21:34

Maweja-Nangila kuambila Moshe ne: — Kutshinyi mukalenga ewu to. Nenkuambuluishe bua umutshimune, umunyenge ditunga edi dijima. Umuenzele muuvua muenzele Sihone, mukalenga wa bena Amore, uvua musombe mu tshimenga tshia Eshebone.

Dibadika 34:2

bua kumanyisha bena Izrayele ne: — Panuafika mu ditunga dia Kenaane, dindi mumane kunupesha, mikalu yadi idi mushindu ewu:

Dielulula 1:7

Mpindiewu bangayi luendu tshiakabidi. Nuye luseke ludi ne mikuna, muaba udibu base kudi bena Amore. Nuye kabidi mu buloba budi mutumba ne bena Amore, budibu base kudi bena Kenaane: ke ku mpata ya Yardene, ku mikuna, mu mpata ya luseke lua Mayi manene, mu tshitupa tshia kuinshi tshia ditunga, ne ku luseke lua muelelu wa Mayi manene. Nutungunuke ne luendu too ne ku mikuna ya Lebanone, ne ku musulu munene wa Perate.

Dielulula 1:8

Ditunga edi dijima ke dimvua mulaye bankambua benu Abrahame, Izake, Yakobe, ne ndelanganyi yabu. Ndi nnupeshadi. Nuye kudikuata.”

Dielulula 11:24

Ditunga dijima ndienu. Mikalu yadi idi mushindu ewu: kutuadija ku tshipela tshidi kuinshi mu ditunga, too ne ku mikuna ya Lebanone, idi ku mutu mu ditunga; ku musulu munene wa Perate luseke lua kudi diba dipatukila, too ne ku Mayi manene a pankatshi pa matunga, luseke lua kudi diba dibuelela.

Dielulula 2:33

Maweja-Nangila Mvidi Mukulu wetu kutuambuluisha. Tuetu kutshimuna Sihone, bana bende ba balume, ne tshiluilu tshiende tshionsu.

Dielulula 2:36

Maweja-Nangila Mvidi Mukulu wetu, uvua mutuambuluishe bua kukuata bimenga bionsu bivua pankatshi pa tshimenga tshia Aroyere, tshidi pabuipi ne musulu wa Amone, ne tshimenga tshikuabu tshidi mu tshibandabanda tshine atshi, too ne ku ditunga dia Ngilaade. Tshimenga nansha tshimue tshia mu bimenga ebi, katshivua ne bukole bua kutuluisha.

Dielulula 20:16

Kadi mu bimenga bia mu ditunga didi Maweja-Nangila Mvidi Mukulu wenu munupe bua nudikuate, nenushipemu bantu bonsu, kanuyi nushiya nansha umue ne muoyi.

Dielulula 3:2

Ke Maweja-Nangila kungambila meme Moshe ne: “Kutshinyi mukalenga uvuavua awu to! Nkadi mumane kumufila mu bianza biebe, yeye ne bantu bende bonsu, kabidi ne ditunga diende dijima. Neumuenze muuvua muenze Sihone, mukalenga wa bena Amore, uvua muase mu Eshebone.”

Dielulula 6:19

Nenuipatemu baluishi benu, bu muvua Maweja-Nangila mumane kuamba.

Dielulula 9:3

Lelu nenujadike ne: Maweja-Nangila Mvidi Mukulu wenu, udi wenda kumpala kuenu. Yeye udi bu kapia kadi kabutula bintu bionsu. Nanku Maweja-Nangila neabipate. Nenubatshimune lukasa, mubabutule bonsu, mbanyenge bintu biabu, bu muvua Maweja-Nangila mulaye.

Yoshua 1:4

Ditunga dienu nedialabale, biangatshile ku tshipela, kuinshi mu ditunga, too ne ku mikuna ya Lebanone ku mutu mu ditunga, biangatshile ku musulu munene wa Perate, luseke ludi diba dipatukila, dipitshila mu ditunga dia bena Iti, too ne ku Mayi manene a pankatshi pa matunga adi luseke ludi diba dibuelela.

Yoshua 10:19

Kadi kanunengakanyi muaba awu to. Londakajayi baluishi benu. Bajikilayi njila, bua kabafiki mu bimenga biabu to. Bualu Maweja-Nangila Mvidi Mukulu wenu mmumane kubafila mu bianza bienu.

Yoshua 10:8

Maweja-Nangila kuambila Yoshuwa ne: — Kubatshinyi to. Ndi mbafila kuudi. Muntu nansha umue kakukupita bukole to.

Yoshua 13:6

Nenukuate kabidi ditunga dia mikuna didi pankatshi pa Lebanone ne Misrefote-Mayime. Bena ditunga adi bonsu badi amu bena Sidone. Padi bena Izrayele basemena ku kakese ku kakese, Meme Maweja-Nangila nembumushile ku bukole bena matunga aa bonsu. Pashishe wewe Yoshuwa, newabanyine bena Izrayele ditunga mu bitupa bishilangane. Neubitshinke anu bu mumvua mukuambile.

Yoshua 2:24

Kujadikilabu Yoshuwa ne: — Eyowa, Maweja-Nangila mmumane kutupa ditunga edi dijima. Bena ditunga mbamane kuteketa mu maboku. Kabena mua kutufuila nkanana to.

Yoshua 21:44

Maweja-Nangila kubapesha ditalala ku mikalu yabu yonsu, bu muvuaye mumane kulaya bankambua babu. Bobu kutshimuna baluishi babu bonsu ku bukole bua Maweja-Nangila. Kakuvua muntu nansha umue uvua mua kupita bena Izrayele ku bukole to.

Yoshua 23:14

Meme nkadi pa kufua. Kadi mpindiewu, munda muenu ne mu meji enu, numanye ne: kakuena bualu nansha bumue buvua Maweja-Nangila Mvidi Mukulu wenu munulaye, budiye kayi mukumbaje. Bionsu bivuaye munulaye, mmumane kubikumbaja.

Yoshua 24:11

Nuenu kusabuka Yardene, kufika mu tshimenga tshia Yeriko. Bena mu Yeriko kunuluisha. Bavua banuluisha kabidi kudi bena Amore, bena Perizi, bena Kenaane, bena Iti, bena Ngirgashi, bena Ivi, ne bena Yebusa. Meme kubafila bonsu mu bianza bienu.

Yoshua 24:12

Meme kutuma mangulunge kumpala kuenu. Kunyemeshawu bakalenga babidi ba bena Amore. Nanku miele yenu ya mvita, nansha mata enu a mikete, kabiena ne tshidibi bienza to.

Yoshua 24:18

Maweja-Nangila ke uvua muipate bisamba bionsu bivua kumpala kuetu, nangananga bena Amore bavua mu ditunga ditudi edi. Nanku tuetu netuenzele amu Maweja-Nangila mudimu. Bualu Yeye ke Mvidi Mukulu wetu.

Yoshua 24:8

Pashishe meme kunuendesha mu ditunga dia bena Amore, divua luseke ludi diba dipatukila lua Yardene. Bena Amore kunuluisha, kadi meme kubafila mu bianza bienu. Nuenu kukuata ditunga diabu, bualu meme mvua mubabutule panuvua nusemena pabuipi.

Yoshua 8:18

Nanku Maweja-Nangila kuambila Yoshuwa ne: — Sempela ne difuma diebe mutangile luseke lua tshimenga tshia Ayi, bualu ndi nkupesha tshimenga etshi, bua utshikuate. Yoshuwa kuenza muvua Maweja-Nangila mumuambile.

Yoshua 8:7

Diba adi, nuenu nenujuke miaba inudi basokome. Nenukuate tshimenga, bualu Maweja-Nangila Mvidi Mukulu wenu udi munupatshi.

Yoshua 9:7

Bena Izrayele kubandamuna ne: — Misangu mikuabu nudi bena mutumba. Nanku katuena mua kutua nenu ndondu to.

Balombodi 1:4

Kuyabu kuluisha bena Kenaane. Maweja-Nangila kubambuluisha, bua batshimune bena Kenaane ne bena Perizi. Kushipabu bantu balume binunu dikumi mu Bezeke.

Balombodi 11:21

Maweja-Nangila Mvidi Mukulu wa bena Izrayele, kufila Sihone ne bena mvita bende mu bianza bia bena Izrayele. Bena Izrayele kutshimuna Sihone. Kukuatabu buloba buonsu buvuabu basomba kudi bena Amore,

1 Samuele 23:4

Davide kukonka Maweja-Nangila tshiakabidi, Maweja-Nangila kuandamuna ne: — Juka, uye mu tshimenga tshia Keyila! Nemfile bena Peleshete mu bianza biebe.