Ebrewu 9:4 - MUKANDA WA MYIDI MUKULU

⁴ Muaba awu uvua tshilambuilu tshienza ne tshiamu tshia mpawungi tshivuabu boshela musenga wa manananshi. Muvua kabidi mushete wa ndondu mulamika mpawungi mubidi mujima. Munda mua mushete muvua dibungu dia mpawungi dikale ne mana, dikombu dia Arone disase bilongu, ne mabue avuabu bafundile mikenji ya ndondu.

Mukanda wa Nzambi Dihungila Dikulukulu ne Dihungila Dihia-dihia 2003

⁴ wakadi ne tshioshelu tshia mananashi tshia ngolo, ne mushete wa tshihungidi mulamika ne ngolo ku nseke yonso; munda muau muakadi tshifuadi tshia ngolo tshitekelamu mana, ne mulangala wa Alona wakela ntonga, ne mabue akadi ne mei a tshihungidi mafundahu;

Ebrewu 9:4 교차 참조

1 Bakalenga 7:50

malongu, binta bia kusukula nabi miendu, makopu a kumiamina nawu, makopu makuabu ne mbabula, bia tshiamu tshia mpawungi menemene; biamu bia biibi bia ku tshibambalu tshivuabu babikila ne: muaba wa tshijila menemene, ne bia ku biibi bia tshibambalu tshinene, bia tshiamu tshia mpawungi.

1 Bakalenga 8:21

Mu nzubu emu, ndi mulongololemu muaba wa kuteka mushete, udi ne mabue a ndondu uvua Maweja-Nangila mutue ne bankambua betu, tshikondu tshivuaye mubapatule mu Ejipitu.

1 Bakalenga 8:9

Mu mushete amu, muvua anu mabue abidi avua ne mikenji. Moshe ke uvua muteke mabue awu mu mushete. Uvua muapete ku mukuna wa Sinayi pavua Maweja-Nangila utua ndondu ne bena Izrayele, mumane kubapatula mu Ejipitu.

2 Kulondolola 5:10

Mu mushete amu, muvua anu mabue abidi avua ne mikenji, avua Moshe muteke mu mushete. Uvua muapete ku mukuna wa Sinayi, muaba uvua Maweja-Nangila mutue ndondu ne bena Izrayele, pavuaye mumane kubapatula mu Ejipitu.

Ekesode 26:33

Ulembeleje tshilamba ku nkanu. “Usokoke mushete udi ne meyi ne mikenji panyima pa tshilamba atshi. Tshilamba atshi netshikale tshilembeleja bua kunuleja muaba wa tshijila ne muaba wa tshijila menemene.

Ekesode 31:18

Nanku, Maweja-Nangila mumane kujikija diyuki ne Moshe ku mukuna wa Sinayi, kupeshaye Moshe mabue abidi ne mikenji ivuaye mudifundile nkayende.

Ekesode 32:15

Pashishe, Moshe kutuluka ku mukuna, muikale ne mabue abidi a mikenji mu bianza, mafunda emu ne emu.

Ekesode 34:29

Moshe kutuluka ku mukuna wa Sinayi ne mabue abidi a ndondu makuate ku bianza. Kadi kavua mumanye ne: pavuaye utuluka apu, mpala wende uvua ukenka, bualu uvua muyukile ne Maweja-Nangila.

Ekesode 37:25

Pashishe Beshalele kuenza tshilambuilu tshia mutshi wa ndunga, bua kuoshilapu milambu ya manananshi a tshijila. Tshilambuilu atshi, tshivua ne santimetre makumi atanu mu nseke yatshi yonsu. Butumbuke buvua ne metre umue. Kadi mu matumba onsu, muvua nsengu milamakane ne tshilambuilu atshi.

Ekesode 39:35

— mushete wa ndondu udi ne mabue a mikenji, pamue ne mitshi yawu, ne tshibuikidiji tshiawu;

Ekesode 40:3

Batekemu mushete wa ndondu, baujika ne tshilamba tshilembeleja, bua kabaumonu kudi bantu to.

Lewitiki 16:12

Neambule makala a kapia adi pa tshilambuilu tshia muaba wa tshijila, ela mu mbabula. Neambule manza abidi a musenga wa manananshi. Neaye ne bionsu ebi panyima pa tshilamba tshidi tshilembeleja muaba wa tshijila menemene.

Dibadika 17:10

— Umukayi muaba udi bantu aba bimane. Ndi musue kubabutula bonsu amu mpindiewu. Moshe ne Arone kudiela mpala panshi.

Dibadika 17:5

Bitata abi bivua bivuluija bena Izrayele ne: muntu udi kayi wa ku ndelanganyi ya Arone, kena mua kuoshila Maweja-Nangila musenga wa kamonya to. Maweja-Nangila ukavua mumane kuambila Moshe bua kumanyisha Arone ne: “Pikala muntu mukuabu muoshile Maweja-Nangila musenga wa kamonya, neapete dinyoka bu dia Kora ne bonsu bavuaye nabu.”

Dibadika 17:8

Moshe ne Arone kuya kumpala kua ntenta wa kusambakena.

Dielulula 9:11

Nanku matuku makumi anayi a munya ne butuku mamane kukumbana, Maweja-Nangila kumpesha mikenji ya ndondu,

Dielulula 9:9

Meme Moshe mvua mubande ku mukuna bua kuangata mabue, avua ne mikenji ya ndondu wenu ne Maweja-Nangila. Meme kulalaku matuku makumi anayi a munya ne a butuku, tshiyi mua kudia nansha kunua.

Didimanyisha 11:19

Ke nzubu wa Mvidi Mukulu udi mu diulu, kunzuluka. Mushete wa ndondu kumuenekamu. Mikenya, mikungulu, makubakuba, tshikumina kuenzeka, kabidi mvula mukole wa mabue kuloka.

Didimanyisha 8:3

Mutumibue mukuabu kufika, kuimana ku tshilambuilu. Uvua ne mbabula muenza ne mpawungi, wa kuoshila manananshi. Kumupeshabu musenga wa manananshi wa bungi, wa kulambula pamue ne ditendelela dia bantu bonsu ba Mvidi Mukulu, pa tshilambuilu tshia mpawungi tshivua kumpala kua nkuasa wa butumbi.