Dielulula 4:25 - MUKANDA WA MYIDI MUKULU

²⁵ Nuenu bamane kushala matuku a bungi mu ditunga edi, didi Maweja-Nangila munulaye, nuenu bamane kulela bana, bapete ne bikulu, kanuenji bibi to. Kanusongi mpingu, kanuzodi bimfuanyi, bia tshintu nansha tshimue. Kanuenji malu mabi makuabu, adi Maweja-Nangila Mvidi Mukulu wenu ubenga, amufikisha munda.

Mukanda wa Nzambi Dihungila Dikulukulu ne Dihungila Dihia-dihia 2003

²⁵ Hanuadia bana, ne bana ba bana benu, hanuashala mu buloba musangu mule, hanuona mitshima yenu bua kudisongela luhingu ne tshifuanyikishi tshia tshintu, hanuenza malu mabi ku mesu kua Yehowa, Nzambi wenu, bua kumufuisha tshiji;

Dielulula 4:25 교차 참조

2 Bakalenga 21:2

Menashe kuenza malu avua Maweja-Nangila mubenge, kuenza ne malu mabi onsu a bantu ba bisamba bikuabu, bavua Maweja-Nangila muipate bua kushilabu bena Izrayele ditunga.

Misambu 78:58

Kupendabu Maweja-Nangila, batendelela pa mikuna miaba ya bantu benyi, mvidie ya bantu ba bisamba bikuabu, kumufikishabu munda ne disonga dia mpingu ya mvidie ya patupu.

Ekesode 20:4

“Kusongi mpingu ya mvidie. Kuenji tshimfuanyi tshia tshintu nansha tshimue, nansha tshidi mulu mu mavuba, nansha tshidi panshi pa buloba, nansha tshidi mu mayi adi muinshi mua buloba.

Ekesode 32:7

Maweja-Nangila kuambila Moshe ne: — Tuluka lukasa, bualu bantu bauvua mupatule mu Ejipitu mbenze bualu bubi bupite.

Yezekiyele 8:10

Meme kubuelela mu tshimana, kumona nseke yonsu muvua bantu bazole bimfuanyi bia bilandadi ne bia nyama mibi mikuabu ku bimana. Bavua bazolepu mpala ya mvidie yonsu idi bena Izrayele batendelela.

Osheya 9:17

— Mvidi Mukulu wanyi, kena munange kabidi bena Efrayime to, bualu kabena bamuteleja. Nebikale balalakanyi munkatshi mua bisamba bikuabu.

Osheya 9:9

Nudi benza buenzayi bapitshishe, anu bu munuvua benze ku Ngibeya. Kadi, Maweja-Nangila kena mupue buenzayi buenu muoyi, neanunyoke bua malu mabi anuvua benze.

1 Korente 10:22

Tudi basue kujula Mfumu mukawu anyi? Nudi nuela meji ne: tudi bamupite bukole anyi?

Dielulula 16:22

Kanuena mua kuimanyika dibue dia kutendelela mvidie muaba awu to. Bualu Maweja-Nangila kena musue bintu bia mushindu awu to.

Dielulula 27:15

“Muntu yonsu udi wenza lupingu lua mvidie, nansha lua dibue, lua mutshi, nansha lua tshiamu, kutendelela mu musokoku, mmuena diakabi. Bualu Maweja-Nangila Mvidi Mukulu wenu kena musue bintu bia mushindu ewu, bienza kudi bantu. Muntu ewu asangane muena tshibawu kuenza anyi?” Bena Izrayele nebandamune bonsu ne: “Enze!”

Dielulula 28:45

Makenga onsu neanukuate, nukenga bikole too ne panuabutuka bonsu, bualu nuvua babenge kuitaba ne kukumbaja meyi ne mikenji bia Maweja-Nangila Mvidi Mukulu wenu.

Dielulula 28:61

Neanutumine masama ne mputa bia mishindu yonsu, nansha bidibu kabayi bafunde mu mukanda ewu, too ne panuabutuka bonsu.

Dielulula 30:18

nenubutuke bonsu. Ndi ndianza kunuambila lelu ne: nuenu benze nanku, panuafika dishiya dia musulu wa Yardene, kanuakushala ne muoyi matuku a bungi mu ditunga dinuakuata adi to.

Dielulula 30:19

Nanku ndi nnujadikila lelu kumpala kua diulu ne buloba ne: nusungule tshinudi basue: ndi nteka muoyi ne diakalenga luseke, lufu ne diakabi lukuabu. Mbimpe nusungule muoyi, bua nushale bena diakalenga, nuenu ne ndelanganyi yenu.

Dielulula 31:29

Ndi mumanye ne: pambafua, bena Izrayele nebenze bibi, nebabenge bionsu bimvua mubambile. Nanku nebikale bena diakabi, bualu bavua benza muabu muonsu bua kutombokela Maweja-Nangila, kumufikisha munda.

Dielulula 32:5

Kadi nuenu, bena Izrayele, nudi bantu babi, bapale. Nudi babenge Maweja-Nangila, batufuisha bundu. Kanutshiena bana bende kabidi to.

Dielulula 4:16

Nanku kanuenji bibi to. Kanusongi mpingu, kanuzodi bimfuanyi bileja mvidie, nansha bayileja bu bantu balume nansha bakaji,

Dielulula 4:23

Nudimuke, kanupu ndondu muoyi, uvua Maweja-Nangila Mvidi Mukulu wenu mutue nenu. Kanusongi mpingu. Kanuenji tshimfuanyi tshia tshintu nansha tshimue tshidiye munukandike.

Yoshua 23:16

Nuenu banyange ndondu uvua Maweja-Nangila mutume diyi bua kunemeka, nuenu biname kumpala kua mvidie ya bantu benyi bua kuyitendelela, Maweja-Nangila neanufuile munda, anujimije lukasa mu ditunga edi dimpe, didiye mumane kunupa.

Yoshua 24:20

Nuenu babenge Maweja-Nangila, nuenu batendelele mvidie ya bantu benyi, Maweja-Nangila neanuluishe. Neanukengeshe, anubutule, nansha yeye mumane kunuenzela malu mimpe a bungi.