Danyele 2:48 - MUKANDA WA MYIDI MUKULU

⁴⁸ Pashishe mukalenga kupesha Daniyele mianzu minene, ne bintu bia disanka bia bungi, bia mushinga mukole. Kumutekaye mulombodi wa buloba bua Babilone, kabidi mfumu munene wa bena meji bonsu ba mu Babilone.

Mukanda wa Nzambi Dihungila Dikulukulu ne Dihungila Dihia-dihia 2003

⁴⁸ Hashishe mukelenge wakavuisha Danyele muntu munene, wakamuha bintu bia bungi, wakamuvuisha mukokeshi wa ha mutu ha province mujima wa Babulona, wakamuteka mukokeshi munene ku mutu kua bena meji bonso ba mu Babulona.

Danyele 2:48 교차 참조

2 Samuele 19:32

Barzilayi, wa mu musoku wa Rogelime, mu ditunga dia Ngilaade, uvua mupueke kabidi ku Yardene. Yeye ke uvua musabuke musulu awu ne mukalenga Davide, bua kushiya mukalenga dishiya.

2 Bakalenga 5:1

Mukalenga wa bena Siriya, uvua ne mfumu mulombodi wa bena mvita bende, dina diende Namane. Mukalenga wa bena Siriya uvua usanka bua bionsu bivua Namane wenza. Kabidi uvua wenzela Namane bimpe, bualu Maweja-Nangila uvua mupeshe Namane bukole, bua bena Siriya bamone mua kutshimuna baluishi babu. Nanku, Namane ewu, uvua tshilobu tshia mvita tshia kalanda-musenga, kadi uvua ne disama dia nsudi.

Yobe 1:3

Uvua ne mikoku binunu muanda mutekete, nyama ya tumelu binunu bisatu, nyama ya ngombe milume ne mikaji tshinunu, ya mpunde mikaji nkama itanu. Uvua kabidi ne bena mudimu bavule. Bantu bonsu bavua basombe ku luseke lua Palestine ludi diba dipatukila, amu yeye ke uvua mubapite ku bubanji ne ku biuma.

Yirmeya 5:5

Ndi musue kuyukila ne bantu baneme. Bobu badi bamanye tshidi Maweja-Nangila musue. Badi bamanye mikenji ya Mvidi Mukulu wabu.” Kadi, bantu bonsu badi amu mushindu umue, kabena batshina kabidi Maweja-Nangila. Badi babenga mikenji ya ndondu ivuabu batue nende.

Danyele 2:6

Kadi nuenu bangambila tshilota tshianyi, nennupeshe bintu bivule. Nenuikale kabidi ne lumu lunene. Nenku nungambile tshindi mulote, nutshingumvuije.

Danyele 3:1

Mukalenga Nebukadnesare kuenzeja lupingu lua tshiamu tshia mpawungi, lua metre makumi asatu mu bule, ne metre asatu mu butshiama. Kuluimanyikaye mu mpata wa Dura, mu buloba bua Babilone.

Danyele 3:12

Kadi kudi bena Yuda bakuabu, baudi muteke ku mutu kua malu a bulongolodi bua ditunga dia Babilone, mena abu adi: Shadrake, Meshake ne Abede-Nego. Mukalenga, bantu aba kabena banemeka diyi diebe diudi muele, kabena benzela mvidie yebe mudimu, kabena bakukuila lupingu lua tshiamu tshia mpawungi luudi muenzeje.

Danyele 3:30

Pashishe mukalenga kupesha Shadrake, Meshake ne Abede-Nego mianzu minene mipite ya kumpala mu buloba bua Babilone.

Danyele 4:6

Beltashare, mfumu wa babuki ba mbuku, ndi mumanye ne: udi ne mueyelu wa mvidie ya tshijila. Nanku kakuena bualu busokome budi mua kukukolela. Unjinguluile tshilota.

Danyele 4:9

Uvua ne mabeji mimpe matambe, ukuama bimuma bipite bungi, bua bonsu bamone mua kubidia, kuukuta. Nyama ya mu mpata ivua ikisha mu dileji dia mutshi awu. Nyunyi ivua ibaka masua ayi mu matamba awu. Tshifukibua tshionsu tshidi ne muoyi tshiwa tshipetelaku tshiakudia tshiatshi.

Danyele 5:11

Kudi muntu mu bukalenga buebe udi ne mueyelu wa mvidie ya tshijila. Mu tshikondu tshia tatuebe, bakasangana muntu awu muikale udianza kumona malu, muikale ne lungenyi ne meji bu bidi mvidie nabi. Ke pavua tatuebe, mukalenga Nebukadnesare, mumuteke mfumu wa babuki ba mbuku, wa benji ba majimbu, wa bena bilengulengu ne bajinguludi ba malu a mitotu.

Danyele 5:16

Kadi mvua mumvue lumu luebe ne: wewe udi ne lungenyi lua kujingulula nshinga ne kumvuija malu masokome. Wewe mubale bualu budibu bafunde ebu, mubumvuije kabidi, nebakuvuadike bilamba bia lumu, bakuele mabue a tshiamu tshia mpawungi mu nshingu. Newikale umue wa ku balombodi banene ba mu ditunga.

Danyele 5:29

Diakamue Baltazare kutuma diyi bua bavuadike Daniyele bilamba bia lumu, bamuele mabue a tshiamu tshia mpawungi mu nshingu. Kumuvuijabu umue wa ku balombodi banene ba mu ditunga.

Danyele 5:7

Mukalenga kuela diyi dikole ne: bafike ne bena meji ba mu Babilone, benji ba majimbu, bena bilengulengu ne bamanyi ba malu a mitotu. Kubambilaye ne: — Muntu yonsu wabala tshidibu bafunda etshi, watshinjinguluila, nebamuvuadike bilamba bia lumu. Nebamuele mabue a tshiamu tshia mpawungi mu nshingu. Neikale umue wa ku balombodi banene ba mu ditunga.

Danyele 8:27

Diba adi, meme Daniyele, kupungila, kuteketa, disama kunkuata manga matuku. Meme mumane kusanguluka, ke meme kubanga tshiakabidi kukuatshila mukalenga mudimu. Ntshivua amu mpampakana bua bivua Mvidi Mukulu mundeje, bualu tshiwa mubijingulule to.”

Dibadika 24:11

Mpindiewu umbuka, upingane kuebe! Mvua mukulaye bua kukusankisha bikole! Kadi Maweja-Nangila wakunyengi bintu biebe!

1 Samuele 17:25

Kuambilanganabu ne: “Udi mumone muntu ewu! Udi wenza bionsu ebi amu bua kutubunda. Kadi muntu wikale mumutshimune, mumushipe, mukalenga neamunemeshe ne bubanji bua bungi. Neamupe muanende wa bakaji, bua kuikalaye mukajende. Kabidi mu bena Izrayele, mu bena diku dia muntu awu, kabakuikala ne tshilumbu tshia kulambula tshitadi to.”

1 Samuele 2:8

Udi ujula mupela uvua mudishinde panshi. Umushe ku diala muena dikenga udibu bimansha, bua kumusombesha miaba ya lumu, pamue ne bantu banene. Buloba bujima budi bua Maweja-Nangila. Yeye ke udi mubuimanyike pa makunji abu.

1 Samuele 25:2

Mu musoku wa Mayone muvua muntu mubanji. Uvua ne mikoku binunu bisatu ne mbuji tshinunu. Uvua kabidi ne mpangu yende ku musoku wa Karmele. Muntu ewu, uvua muye ku Karmele bua kukosa miosa ya bimuna biende.